តើលោកស្រី ហ៊ីឡារី ក្លីនតុន ត្រូវធ្វើបែបណាដើម្បីបង្រួបបង្រួមអ្នកគាំទ្រគណបក្សប្រជាធិបតេយ្យ?
ចុះផ្សាយនៅថ្ងៃ៖
ស្តាប់ - ០៤:២៥
លោកស្រី Hillary Clinton បានឈ្នះការបោះឆ្នោតចុងក្រោយនៅរដ្ឋធានីវ៉ាស៊ីងតោន កាលពីថ្ងៃអង្គារ ទី១៤ មិថុនានេះ។ នេះជាជ័យជំនះប្រកបដោយនិមិត្តរូបមុននឹងលោកស្រីត្រូវទទួលការតែងតាំងជាបេក្ខនារីផ្លូវការប្រចាំគណបក្សប្រជាធិបតេយ្យ។ ប៉ុន្តែទោះបីជាយ៉ាងក៏ដោយ លោកស្រីហាក់នៅមិនទាន់រីករាយនឹងជ័យជំនះនេះទេ។ កិច្ចការបន្ទាប់របស់លោកស្រី គឺបង្រួមបង្រួមអ្នកគាំទ្រគណបក្សប្រជាធិតេយ្យ ដើម្បីផ្តួលគូប្រជែង គឺលោក Donald Trump មកពីគណបក្សសាធារណរដ្ឋ សំរាប់ការបោះឆ្នោតប្រធានាធិបតីអាមេរិក ដែលនឹងប្រព្រឹត្តទៅនាដើមខែវិច្ឆិការខាងមុខនេះ។ ដើម្បីអាចធ្វើបែបនេះបាន លោកស្រីត្រូវការសំលេងឆ្នោតពីក្រុមអ្នកគាំទ្រលោក Bernie Sanders។
ការបោះឆ្នោតជ្រើសរើសបេក្ខជនប្រធានាធិបតីប្រចាំបក្សនៅសហរដ្ឋអាមេរិកបានបញ្ចប់ហើយ។ សំរាប់គណបក្សប្រជាធិបតេយ្យ លោកស្រី Hillary Clinton នឹងទទួលបានការតែងតាំងជាបេក្ខនារីផ្លូវការ នាសមាជបក្សដែលនឹងប្រព្រឹត្តទៅចន្លោះពីថ្ងៃទី ២៥ ដល់២៨ ខែកក្កដាខាងមុខនេះ។ សមាជបក្សនេះនឹងរៀបចំឡើងនៅទីក្រុង Philadelphia នៃរដ្ឋ Pennsylvania។ បើតាមការបូកសរុបលទ្ធផលរបស់ទីភ្នាក់ងារសារព័ត៌មាន AP លោកស្រី Hillary Clinton ទទួលបានសំលេងប្រតិភូចំនួន ២ ៨06 នាក់ ហើយគូប្រជែងក្នុងបក្ស គឺលោក Bernie Sanders ទទួលបានប្រតិភូតែ ១ ៨៨០ នាក់ប៉ុណ្ណោះ។
សូមបញ្ជាក់ថា ប្រតិភូទាំងអស់នេះ គឺជាអង្គបោះឆ្នោតដើម្បីតែងតាំងបេក្ខជនប្រធានាធិបតីផ្លូវការតំណាងឲ្យបក្សរបស់ខ្លួន។ បើតាមការគណនាតួលេខ វាគ្មានមន្ទិលសង្ស័យអ្វីឡើយដែលលោកស្រី Hillary Clinton នឹងក្លាយជាស្រ្តីតំបូងគេបង្អស់ក្នុងប្រវត្តិសាស្រ្តអាមេរិក សំរាប់ការបោះឆ្នោតប្រធានាធិបតី។ គិតមកដល់ពេលនេះ វាជាជំហានដ៏ធំមួយដែលលោកស្រីបានឈានដល់។ ប៉ុន្តែ ជំហានបន្ទាប់ គឺត្រូវឈ្នះការបោះឆ្នោតប្រធានាធិបតី ដោយផ្តួលលោកDonald Trump មកពីគណបក្សសាធារណរដ្ឋ។
ដើម្បីអាចសំរេចក្តីស្រមៃនេះបាន កិច្ចការអាទិភាពរបស់លោកស្រី Clinton គឺបញ្ចុះបញ្ចូលលោក Bernie Sanders ឲ្យគាំទ្រយុទ្ធនាការឃោសនាបោះឆ្នោតរបស់លោកស្រី។ សូមបញ្ជាក់ថា ភ្លាមៗក្រោយការប្រកាសលទ្ធផលនៃការបោះឆ្នោតក្នុងរដ្ឋធានីវ៉ាស៊ីងតោន លោក Bernie Sanders និងលោកស្រី Hillary Clinton បានជួបសន្ទនាទល់មុខគ្នា។ ហើយរហូតមកដល់ពេលនេះ លោក Sanders នៅពុំទាន់ទទួលស្គាល់បរាជ័យខ្លួនឡើយ។
ម៉្យាងទៀត លោកអះអាងប្រាប់អ្នកគាំទ្រខ្លួនថានឹងតស៊ូរហូតដល់ទីបញ្ចប់ ពោលគឺ តថ្លៃជាមួយលោកស្រី Clinton ដើម្បីឲ្យបក្សអនុម័តកម្មវិធីនយោបាយរបស់ខ្លួន នាសមាជបក្សក្នុងកំឡុងចុងខែកក្កដាខាងមុខនេះ។ តើលោក Bernie Sanders តថ្លៃកម្មវិធីនយោបាយអ្វីខ្លះ?
១) កំណែទម្រង់គណបក្សប្រជាធិបតេយ្យ
លោក Sanders ប្រាថ្នាចង់ឲ្យគណបក្សនេះបើកទូលាយឲ្យពលរដ្ឋអាមេរិកទូទៅ បានន័យថាអ្នកបោះឆ្នោតឯករាជ្យគ្មានឈ្មោះក្នុងបញ្ជីសមាជិកបក្សណាមួយឡើយ អាចចូលរួមក្នុងដំណើរការបោះឆ្នោតជ្រើសរើសបេក្ខជនប្រធានាធិបតីតំណាងបក្សប្រជាធិបតេយ្យ។ បច្ចុប្បន្ន គណបក្សប្រជាធិបតេយ្យអនុញ្ញាតិឲ្យតែសមាជិកបក្សខ្លួនប៉ុណ្ណោះ ដែលមានសិទ្ធិចូលរួមក្នុងដំណើរការបោះឆ្នោតផ្ទៃក្នុងបក្សរបស់ខ្លួន។លោក Sanders ក៏យល់ឃើញថា យុវជនអាមេរិកបច្ចុប្បន្នខុសពីមនុស្សជំនាន់មុន។ យុវជនទាំងនោះជាអ្នកបោះឆ្នោតឯករាជ្យគ្មានស្លាកគណបក្សនយោបាយជាប់ខ្លួនឡើយ។
២) អព្យាក្រឹត្យភាពប្រធានគណកម្មាធិការជាតិបក្ស
លោក Sanders ស្នើឲ្យដកលោកស្រី Debbie Wasserman Schultz ដែលមានតួនាទីប្រធានគណកម្មាធិការជាតិប្រចាំគណបក្សប្រជាធិបតេយ្យចេញពីមុខតំណែង។ មូលហេតុ គឺលោក Sanders មិនពេញចិត្តនឹងភាពលម្អៀងកន្លងមករបស់លោកស្រី Schultz ដែលប្រកាសអះអាងគាំទ្រលោកស្រី Hillary Clinton។ សំរាប់លោក Sanders ទង្វើនេះជាអំពើអយុត្តិធម៌មិនស្របនឹងដំណើរការប្រជាធិបតេយ្យ ជាពិសេស គឺតួនាទីប្រធានគណកម្មាធិការជាតិបក្ស។
៣) លប់ចោលប្រតិភូជាន់ខ្ពស់ (Super-délégués)
លោក Sanders ក៏ស្នើឲ្យលប់ចោលប្រតិភូជាន់ខ្ពស់ (Super-délégués) ចេញពីដំណើរការបោះឆ្នោតក្នុងបក្ស។ ប្រតិភូជាន់ខ្ពស់នេះ គឺរាប់បញ្ចូលឥស្សរជនសំខាន់ៗក្នុងបក្ស អតីតៈប្រធានាធិបតី តំណាងរាស្រ្ត និងសមាជិកព្រឹទ្ធសភាមួយចំនួន។ ប្រតិភូជាន់ខ្ពស់នេះមានសម្លេងអាចបោះឆ្នោតជ្រើសរើសបេក្ខជនប្រធានាធិបតី នាសមាជតែងតាំងបេក្ខជនផ្លូវការ។ សូមបញ្ជាក់ក្នុងចំណោមប្រតិភូជាន់ខ្ពស់ចំនួន ៦៣៥ នាក់ ក្នុងនោះមាន ៥៨៧ នាក់បានបង្ហាញជំហរលំអៀងតាំងពីដើមយុទ្ធនាការបោះឆ្នោត ដោយគាំទ្រលោកស្រី Hillary Clinton។ សំរាប់លោក Sanders នេះក៏ជាទង្វើអយុត្តធម៌ផងដែរ។
សំណើផ្សេងទៀត គឺទាក់ទងនឹងកម្មវិធីនយោបាយ ដែលមានលក្ខណៈឆ្វេងនិយមបែបគោលការណ៍សង្គមនិយម ក្នុងនោះមានដូចជា ការសិក្សាថ្នាក់ឧត្តមសិក្សាមិនគិតថ្លៃ, ការតំឡើងប្រាក់ម៉ោងការងារអប្បបរមាដល់ពលរដ្ឋអាមេរិកឲ្យបាន ១៥ ដុល្លារក្នុងមួយម៉ោង, ការផ្តល់ការធានារ៉ាប់រងសុខភាពមិនគិតថ្លៃដល់ពលលរដ្ឋ និងការបញ្ចប់ការធ្វើអាជីវកម្មប្រេងក្រោមដី តាមរយៈវិធីសាស្រ្តប្រើសារជាតិគីមីលាយជាមួយទឹកដើម្បីបំបែកផ្ទាំងក្រោមដី។
តើលោកស្រី Hillary Clinton អាចទទួលយកកម្មវិធីនយោបាយទាំងនោះដែរឬទេ? ហេតុអ្វីបានជាលោកស្រី Hillary Clinton ត្រូវការសំលេងអ្នកគាំទ្រលោក Bernie Sanders ខ្លាំងម្ល៉េះ? បើតាមលោក Larry Sabato សាស្រ្តាចារ្យនយោបាយប្រចាំសាកលវិទ្យាល័យ Virginia បានវិភាគថា លោកស្រី Clinton ចាំបាច់ត្រូវការជំនួយពីលោក Sanders ដើម្បីបង្រួបបង្រួមអ្នកគាំទ្របក្សប្រជាធិបតេយ្យ។ លោកស្រីគ្មានលទ្ធភាពធ្វើកិច្ចការនេះតែម្នាក់ឯងឡើយ។
ក្នុងចំណោមអ្នកបោះឆ្នោតប្រជាធិតេយ្យចំនួន ២៧ លាននាក់ លោក Sanders បានទទួលសំលេងគាំទ្រពីពលរដ្ឋអាមេរិកចំនួន ១២ លាននាក់។ អ្នកគាំទ្រទាំងនោះភាគច្រើនជាយុវជន ស្រ្តីវ័យកណ្តាល កម្មករ និងកសិករ។ មានមនុស្សសរុបជាងមួយលាននាក់បានចូលរួមក្នុងជំនួបប្រមូលផ្តុំកន្លងមករបស់លោក Sanders។
កន្លងមក អ្នកគាំទ្រលោក Sanders បានបង្ហាញពីការមិនពេញចិត្តចំពោះលោកស្រី Clinton។ នេះក៏ដោយសារតែលោកស្រីបានទទួលប្រាក់រាប់រយលានដុល្លារពីក្រុមហ៊ុនឯកជន ធនាគារ ផ្សារភាគហ៊ុន និងក្រុម Lobby ជាដើម ដើម្បីដឹកនាំយុទ្ធនាការឃោសនា។ ហើយវាខុសពីលោក Sanders ដែលបានទទួលប្រាក់កាក់សេនពីពលរដ្ឋសាមញ្ញ។ សំរាប់អ្នកគាំទ្រទាំងនោះ លោកស្រី Clinton ប្រៀបដូចជាផលិតផលមួយអញ្ចឹងតំណាងអោយក្រុមហ៊ុនឯកជន ដែលសម្លឹងតែប្រយោធន៍ទាំងនោះ។ ហើយពួកគេចាត់ទុកលោកស្រី Clinton ជាឥស្សរជនតំណាងឲ្យក្រុមវរជនឆ្នើមក្នុងក្រុងវ៉ាស៊ីងតោន ដែលគិតតែពីផលប្រយោធន៍នយោបាយជាជាងឆ្លើយតបតំរូវការពិតប្រាកដរបស់ពលរដ្ឋថ្នាក់ក្រោម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ