លោកស្រី គ្លីនតុនក្លាយជាបេក្ខជនប្រធានាធិបតីភេទស្រីដំបូងនៅអាមេរិក
លោកស្រី ហ៊ីឡារី គ្លីនតុន បានទទួលសំឡេងគាំទ្រគ្រប់គ្រាន់ សម្រាប់អាចក្លាយជាបេក្ខជនប្រធានាធិបតីបក្សប្រជាធិបតេយ្យបាន ដើម្បីទៅប្រកួតប្រជែងជាមួយលោក ដូណាល់ ត្រាំ នៃបក្សសាធារណរដ្ឋបានហើយ។ នេះបើតាមភ្នាក់ងារសារព័ត៌មាន និងទូរទស្សន៍អាមេរិក។ លោកស្រី បេក្ខនារី នឹងក្លាយជាស្ត្រីដំបូងគេបង្អស់ ដែលមកប្រកួតប្រជែងយកតំណែងជាប្រធានាធិបតីអាមេរិក។ ប៉ុន្តែគូប្រជែងក្នុងបក្ស លោក ប៊ែរនី សេនដឺ មិនទាន់ប្រកាសចុះចាញ់ទេ។ ការប្រកួតប្រជែងនៅតែបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៩
គ្រប់ប្រព័ន្ធឃោសនាព័ត៌មានអាមេរិក ភ្នាក់ងារសារព័ត៌មាន ទូរទស្សន៍ NBC ABC CBS … បានជូនដំណឹងព្រោងព្រាត អំពីជោគជ័យរបស់លោកស្រីគ្លីនតុន ថាបានទទួលសំឡេងគាំទ្រ ឬចំនួនប្រតិភូ ភាគច្រើនដាច់ខាត (២៣៨៣ លើ៤៤៨៣) សម្រាប់ក្លាយជាជាបេក្ខជនប្រធានាធិបតីបក្សប្រជាធិបតេយ្យហើយ។ លោកស្រីគ្លីនតុនបាននាំមុខលោក សេនដឺ ជាគូប្រជែងក្នុងបក្សដល់ទៅជាង៨០០ប្រតិភូ។
ហើយម្យ៉ាងទៀត លោកស្រី ត្រូវរក្សាការប្រុងប្រយ័ត្ន មិនទាន់អាចស្រែក ជយោ ភ្លាមទេ ព្រោះលោកស្រី ខ្លាចសកម្មជនគាំទ្រលោកស្រីទម្លាក់ដៃនៅថ្ងៃនេះ។ ថ្ងៃបោះឆ្នោតចុងក្រោយ នៅក្នុងរដ្ឋចំនួន៦ ក្នុងនោះ មានរដ្ឋកាលីហ្វ័រនីញ៉ាមួយដែលលោកសេនដឺ ជាគូប្រជែងអាចឈ្នះជានិម្មិតរូបផង។
បន្ថែមពីលើនេះទៀត លោកសេនដឺ មិនទាន់ប្រកាសចុះចាញ់ទេ ហើយថែមទាំងបានរិះគន់ប្រព័ន្ធឃោសនាព័ត៌មានថា ផ្សព្វផ្សាយដំណឹងលឿនជ្រុល។
លោកសេនដឺ មិនព្រមប្រកាសចុះចាញ់
លោកសេនដឺ នៅតែបន្តមានក្តីសង្ឃឹម អាចតស៊ូទល់នឹងលោកស្រី គ្លីនតុនបានទៀត ព្រោះថ្វីបើពេលនេះលោកស្រី គ្លីនតុនមានសំឡេងប្រជាជន សំឡេងប្រតិភូ ភាគច្រើនដាច់ខាតគាំទ្រមែន តែនៅមានការបោះឆ្នោតសម្រេចចុងក្រោយនៅថ្ងៃទី ២៥-២៨កក្កដា របស់អ្នកទទួលខុសត្រូវបក្ស និងសមាជិកសភា-ព្រឹទ្ធសភារបស់បក្ស ដែលភាសាអង់គ្លេសហៅថា Superdelegate និងដែលជាថ្ងៃប្រកាសផ្លូវការ ឈ្មោះបេក្ខជនប្រធានាធិបតីរបស់បក្សប្រជាធិបតេយ្យ។
Superdelegate អាចធ្វើព្យុះធ្វើភ្លៀងបាន ដោយអាចបោះឆ្នោតគាំទ្របេក្ខជនណាក៏បាន ទៅតាមជម្រើសរបស់បុគ្គលផ្ទាល់។ ៥៧១នាក់នាក់ក្នុងចំណោម៧១២នាក់ បានគាំទ្រលោកស្រី គ្លីនតុន ទល់៤៥នាក់គាំទ្រលោកសេនដឺ។
ប៉ុន្តែទោះជាយ៉ាងដូច្នេះ លោកសេនដឺ ដែល ពីមុនមកលោកមិនដែលទាំងសង្ឃឹមលើខ្លួនឯង ថាអាចបានឈ្នះ ដល់២០រដ្ឋផង ស្រាប់តែបានដឹកនាំធ្វើយុទ្ធនាការឃោសនា គួរជាទីគាប់ចិត្ត ទទួលជោគជ័យ ដ៏គួរឱ្យភ្ញាក់ផ្អើល និងអាចទាក់ទាញយុវជន ឱ្យគាំទ្រលោកបានយ៉ាងសន្ធឹកសន្ធាប់។ ដូច្នេះវាជាលំបាកខ្លាំងណាស់ដែលលោកត្រូវបោះបង់ការប្រយុទ្ធនៅកណ្តាលទី នាពេលនេះ។ លោក ទំនងជាមិនអាចប្រកាសចុះចាញ់ទេ ដរាបណាល្បែងប្រកួតប្រជែងមិនទាន់ចប់នោះ។
លោកអូបាម៉ា អន្ទះសារចង់បង្ហាញជំហរគាំទ្រលោកស្រីគ្លីនតុន
នៅពីក្រោយប្រកួតប្រជែងរកបេក្ខជនប្រធានាធិបតី គឺការរួបរួមបក្សដើម្បីប្រជែងជាមួយបក្សផ្សេងទៀត ដើម្បីឈានឆ្ពោះទៅដណ្តើមកៅអីប្រធានាធិបតី។ បេក្ខជននីមួយៗសុទ្ធតែបានយល់ដឹងលើខសន្យានេះ។ គេនៅចងចាំបានថា កាលពីឆ្នាំ២០០៨ លោកស្រីគ្លីនតុនបានប្រកាសចុះចាញ់លោកអូបាម៉ាភ្លាម ក្រោយបានដឹង គុណគិតលទ្ធផលបែបគណិតវិទ្យាទៅឃើញលោកអូបាម៉ាឈ្នះបោះឆ្នោត។
ហេតុផលរបស់លោក សេនដឺ ដែលនៅក្រាញ ពន្យារសេចក្តីសម្រេចចិត្តដល់ចុងខែកក្កដា ក៏ព្រោះតែលោក ចង់ដាក់សម្ពាធ ចង់មានឥទ្ធិពលលើកម្មវិធីនយោបាយរបស់បក្ស និង ចង់បានការគិតគូរយកគំនិតនិងសំណើនយោបាយលោកទៅប្រើប្រាស់ផង។
តែលោកប្រធានាធិបតីអូបាម៉ាអាចនឹងជំរុញអន្តរកាលបានលឿន។ បើតាមសារព័ត៌មាន មានការជជែកគ្នាយ៉ាងយូរតាមទូរស័ព្ទរវាងលោកអូបាម៉ា និងលោកសេនដឺ។ ម្យ៉ាងវិញទៀត សេតវិមានបានព្រលយឱ្យដឹងថា លោកអូបាម៉ា ដែលតាមដាននិងមានជំនក់ចិត្តក្នុងយុទ្ធនាការឃោសនា ទំនងជាងនឹងប្រកាសជំហរ គាំទ្របេក្ខភាពលោកស្រី ហ៊ីឡារី គ្លីនតុន នៅក្នុងពេលឆាប់ៗនេះ ឬក្នុងសប្តាហ៍នេះផង។
ពីមុនមក ទោះបីជាគេដឹងថាលោកអូបាម៉ា មានទំនោរលើលោកស្រីគ្លីនតុនក្តី ក៏លោកប្រធានាធិបតីបានរក្សាអព្យាក្រឹត្យភាព មិនប្រកាសកាន់ជើងបេក្ខជនខាងណា ក្នុងអំឡុងពេលបោះឆ្នោត។ ប៉ុន្តែពេលវេលាកាន់ខើច និងប្រឈមមុខនឹងគូប្រជែងបក្សសាធារណរដ្ឋ ដូចយ៉ាងលោក ដូណាល់ ត្រាំ លោកប្រធានាធិបតីអាមេរិកទំនងជាត្រូវបង្ហាញជំហរច្បាស់លាស់ ចុះជួយឃោសនាបេក្ខជនបក្សប្រជាធិបតេយ្យរបស់លោក មុនការគ្រោងទុកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ