អាមេរិក៖លោកអូបាម៉ាអំពាវនាវឲ្យបក្សប្រជាធិបតេយ្យគាំទ្រលោកស្រីហ៊ីឡារី គ្លីនតុន
នៅសហរដ្ឋអាមេរិក លោកប្រធានាធិបតីអូបាម៉ាបានផ្តើមលូកដៃកាន់តែជ្រៅនៅក្នុងយុទ្ធនាការឃោសនាបោះឆ្នោតជ្រើសរើសបេក្ខជនផ្ទៃក្នុងសម្រាប់ចូលរួមការបោះឆ្នោតប្រធានាធិបតីនៅខែវិច្ឆិកាខាងមុខ។ បន្ទាប់ពីបានផ្តល់បទសម្ភាសន៍ឲ្យទូរទស្សន៍ NBC លោកអូបាម៉ាក៏បានទទួលជួបលោកប៊ែរនី សេនដឺនៅសេតវិមានក្នុងថ្ងៃព្រហស្បតិ៍ ទី៩ មិថុនា។ លោកសេនដឺ គឺជាបេក្ខជនប្រធានាធិបតីម្នាក់តំណាងឲ្យគណបក្សប្រជាធិបតេយ្យ និងដែលរូបលោកនៅមិនបានទទួលស្គាល់ជោគជ័យរបស់លោកស្រីហ៊ីឡារី គ្លីនតុនដែលជាគូប្រជែងនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
រហូតមកដល់ពេលនេះ និងបើទោះបីជាលោកស្រីគ្លីនតុនបានប្រកាសក្តែងៗពីជោគជ័យរបស់លោកស្រីតាំងពីយប់ថ្ងៃអង្គារ ទី៧ មិថុនាក៏ដោយ ក៏លោកសេនដឺមិនព្រមទទួលស្គាល់ និងប្តេជ្ញាបន្តយុទ្ធនាការឃោសនារហូតដល់នាទីចុងក្រោយ។ គឺនៅចំពោះមុខភាពរឹងរួសរបស់លោកសេនដឺនេះហើយដែលលោកអូបាម៉ាបានចូលខ្លួនអន្តរាគមន៍ តាមរយៈការផ្តល់បទសម្ភាសន៍ឲ្យទូរទស្សន៍ NBC និងទទួលជួបលោកសេនដឺផ្ទាល់នៅឯសេតវិមាន។ ទន្ទឹមគ្នានេះ និងក្នុងនាមជាអ្នកប្រជាធិបតេយ្យម្នាក់ លោកអូបាម៉ាក៏មិនញញើតនឹងវាយប្រហារគូប្រជែងមកពីគណបក្សសាធារណរដ្ឋដែលគេស្គាល់ថាលោកដូណាល់ ត្រាំ។
ទាក់ទងនឹងគណបក្សប្រជាធិបតេយ្យរបស់លោក លោកអូបាម៉ាបានយល់ឃើញថា វាជារឿងល្អណាស់ដែលមានគូប្រជែងនៅក្នុងបក្ស តែអ្វីដែលលោកអូបាម៉ាចង់បាននាសប្តាហ៍ខាងមុខ គឺការរួមសាមគ្គីគ្នាជាធ្លុងមួយដើម្បីគាំទ្របេក្ខជនតែម្នាក់ក្នុងការចូលរួមតទល់នឹងបេក្ខជនមកពីគណបក្សសាធារណរដ្ឋសម្រាប់ការបោះឆ្នោតប្រធានាធិបតីនាថ្ងៃទី៨ វិច្ឆិកាខាងមុខ។ ការរួមសាមគ្គីជាធ្លុងមួយនៅក្នុងបក្សប្រជាធិបតេយ្យដែលលោកអូបាម៉ាចង់ស្នើលោកសេនដឺឲ្យទទួលស្គាល់ភាពបរាជ័យរបស់ខ្លួន និងទទួលស្គាល់ជោគជ័យរបស់លោកស្រីគ្លីនតុន។
សូមជម្រាបជូនថា ការគាំទ្ររបស់លោកអូបាម៉ាចំពោះលោកស្រីគ្លីនតុនលែងជារឿងសម្ងាត់ទៀតឡើយ គ្រាន់តែថាលោកអូបាម៉ាមិនសូវបានបង្ហាញជាសាធារណៈប៉ុណ្ណោះ។ ទន្ទឹមគ្នានេះ លោកអូបាម៉ាក៏បានបន្តរក្សាទំនាក់ទំនងល្អជាមួយលោកសេនដឺតាំងពីថ្ងៃចាប់ផ្តើម និងក្នុងរយៈពេលយុទ្ធនាការឃោសនាដែរ ពិសេសសម្តែងសាទរលោកសេនដឺដែលប្រធានបទស្តីពីការកាត់បន្ថយវិសមភាពសេដ្ឋកិច្ចក្នុងសង្គមបានទាក់ទាញអ្នកបោះឆ្នោតឲ្យលោករាប់សិបលាននាក់ ពិសេសអ្នកបោះឆ្នោតវ័យក្មេង។
លោកអូបាម៉ាបានដឹងច្បាស់ណាស់ថា លោកសេនដឺជាឥស្សរជននយោបាយម្នាក់ដែលកំពុងមានឥទ្ធិពល និងមានទម្ងន់នៅក្នុងគណបក្សប្រជាធិបតេយ្យ តែអ្វីដែលលោកអូបាម៉ាចង់បាន គឺការបញ្ចប់ភាពប្រទាញប្រទង់គ្នារវាងលោកស្រីគ្លីនតុន និងលោកសេនដឺនៅមុនសមាជបក្សនាដំណាច់ខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ