លោកដូណាល់ ត្រាំ បេក្ខជនបក្សសាធារណរដ្ឋធ្លាក់ក្នុងអន្លុងនៃការរិះគន់កាន់ជ្រៅ
ចុះផ្សាយនៅថ្ងៃ៖
ស្តាប់ - ០៦:៥២
លោក បារ៉ាក់ អូបាម៉ា លោកស្រី ហ៊ីឡារី គ្លីនតុន ទន្ទេញជាប់នឹងមាត់ ថា លោកដូណាល់ ត្រាំ គ្មានសមត្ថភាពក្លាយជាប្រធានាធិបតីអាមេរិកទេ ! ព្រោះលោកត្រាំ មិនស្គាល់សំណុំរឿងអន្តរជាតិ។ អតីតនាយកទីភ្នាក់ងារចារកិច្ច សេអ៊ីអា ដែលមានបទពិសោធន៍ការងារជាង៣៣ឆ្នាំ បានដំពន្លិចបន្ថែមមួយកំរិតទៀត នៅថ្ងៃសុក្រម្សិលមិញ ដោយចោទលោកដូណាល់ត្រាំ ថាអាចជាគ្រោះថ្នាក់សម្រាប់សន្តិសុខជាតិអាមេរិក។
តាមរយៈទំព័រកាសែត New York Times អតីតនាយកទីភ្នាក់ងារចារកិច្ចអាមេរិក លោក Michael Morell មិនត្រឹមតែមិនជឿលើសមត្ថភាពរបស់បេក្ខជនបក្សសាធារណរដ្ឋ ដូណាល់ត្រាំ ក្នុងការកាន់តំណែងជាប្រធានាធិបតីអាមេរិកទេ តែថែមទាំងបានបានបង្ហាញភាពសង្ស័យរបស់ខ្លួន ថា លោក ដូណាល់ត្រាំ អាចជាគ្រោះថ្នាក់សម្រាប់សន្តិសុខជាតិផង។ ព្រោះ លោក ត្រាំ គឺជាភ្នាក់ងារចារកិច្ចរបស់រុស្ស៊ី ដោយអចេតនា។
ចារកិច្ចរុស្ស៊ី
សម្រាប់លោក ម៉ូរែល ប្រធានាធិបតីរុស្ស៊ី លោក វ្លាដេមៀ ពូទីន ដែលជាអតីតភ្នាក់ងារចារកិច្ចKGB ចេះកេងចំណេញពីចំណុចខ្សោយរបស់លោកត្រាំ ដែលបានបណ្តោយខ្លួន ឱ្យលង់នឹងសំដីក្អេងក្អាង បញ្ចើចបញ្ចាលរបស់ពូទីន។ ហើយជាការតបស្នងទៅវិញ លោកដូណាល់ ត្រាំក៏បានសរសើរ និងចាត់ទុកលោកពូទីន ជា “ប្រមុខ” ដឹកនាំដ៏ធំម្នាក់។ សម្រាប់ពិភពអ្នកចារកិច្ច ប្រើពាក្យប៉ុណ្ណឹង គេហៅថាប្រលង ជាប់ ដោយមិនដឹងខ្លួន ជាភ្នាក់ងារសំងាត់របស់សហព័ន្ធរស្ស៊ី ដែលផ្តល់ប្រយោជន៍ឱ្យរុស្ស៊ីហើយ។
អតីតនាយកភ្នាក់ងារចារកិច្ចអាមេរិករូបនេះ បានសម្តែងការគាំទ្រដោយច្បាស់ៗ និងត្រង់ៗ លើកតម្កើងលោកស្រីគ្លីនតុន ថាជាអ្នកដែលអាចធានារ៉ាប់រងការពារសន្តិសុខជាតិអាមេរិកបាន។ ទោះបីមិនមែនជាសមាជិកបក្សប្រជាធិបតេយ្យក្តី ក៏លោកបានប្រកាសថានឹងបោះឆ្នោតជូនលោកស្រី គ្លីនតុន នៅថ្ងៃទី ៨ វិច្ឆិកា២០១៦។
គេពិបាកកំណត់អំពីឥទ្ធិពលនៃ ការបរិហារ ដែលចេញពីមាត់ឥស្សរជន មិនសូវមានមុខមាត់សម្រាប់ហ្វូងមហាជន ទៅលើការបោះឆ្នោតមែន តែវាបានឆ្លុះបញ្ឆាំងឱ្យឃើញអំពីក្តីព្រួយបារម្ភកាន់ខ្លាំងឡើងៗ នៅក្នុងរង្វង់ថ្នាក់ដឹកនាំ លើបុគ្គលិកលក្ខណៈនិងភាពរឹងប៉ឹងរបស់បេក្ខជន ដូណាល់ ត្រាំ បន្ថែមពីលើទស្សនៈនយោបាយផ្ទុយគ្នា។
លោក ដូណាល់ ត្រាំ ធ្លាក់ប្រជាប្រិយភាពខ្លាំង
ប៉ុន្តែការរិះគន់របស់ឥស្សរជនម្នាក់ ដែលមិនស្ថិតនៅក្នុងបក្ស ពេលនេះ ប្រៀបបានទៅនឹងដំណាក់ទឹកស្រក់តែមួយតក់សោះ ក៏អាចធ្វើទឹកមួយពាងឬមួយថូអាចហៀបាន។ ប្រជាប្រិយភាពរបស់លោកដូណាល់ត្រាំ ធ្លាក់ចុះយ៉ាងខ្លាំង និងមានគម្លាតកាន់តែឆ្ងាយពីលោកស្រី គ្លីនតុន។ ពេញមួយសប្តាហ៍នេះ លោក ដូណាល់ ត្រាំ បានរងការរិះគន់ និងវាយប្រហារចំៗ ពីគ្រប់មជ្ឈដ្ឋាន សូម្បីតែឥស្សរជនក្នុងជួរបក្សសាធារណរដ្ឋតែមួយ ក៏ទ្រាំមិនបានធ្លាយយោបល់ប្រឆាំងនឹងរូបបេក្ខជនរបស់បក្សដែរ។
ក្លឹបអ្នកសាធារណរដ្ឋ នៅមហាវិទ្យាល័យ ហាតវា ដ៏ល្បីល្បាញលើពិភពលោក ដែលជាសមាគមអ្នកបញ្ញាវន្តសាស្ត្រាចារ្យអាមេរិក បានសម្រេចចិត្តជាលើកទីមួយ ផ្តាច់ទម្លាប់ជាប្រវត្តិសាស្ត្រ តាំងពី ១២៨ឆ្នាំមក មិនបោះឆ្នោតឱ្យបេក្ខជនប្រធានាធិបតីសាធារណរដ្ឋទេ នៅថ្ងៃទី ៨វិច្ឆិកា ២០១៦ខាងមុខ។ រដ្ឋអភិរក្សនិយមបំផុតហ្ស័កហ្ស៊ី ដែលមិនធ្លាប់គាំទ្របេក្ខជនប្រជាធិបតេយ្យសោះតាំងពីឆ្នាំ១៩៩២មក ក៏បើតាមការស្ទង់មតិ ត្រូវនាំមុខដោយលោកស្រីគ្លីនតុនដែរ។
ទាំងនេះ គឺបណ្តាលមកពីភាពជ្រុលនិយមរបស់លោកដូណាល់ ត្រាំ ផ្ទាល់តែម្តង ៖ សំឡុតអ្នកជាម្តាយដែលមានទារកយំពេលស្តាប់មិទ្ទិញលោក ឬប្រើពាក្យវាយប្រហារទៅលើគ្រួសារទាហានអាមេរិកម្នាក់ ស្លាប់លើសមរភូមិ … សំដីអសុរសរបស់លោកដូណាល់ត្រាំ ចំអកឱ្យម្តាយទាហាន ជារឿងដែលអាមេរិកមិនអាចអនុគ្រោះឱ្យបានឡើយ។ ជីវិតទាហានអាមេរិកមានតម្លៃណាស់ព្រោះជាអ្នកការពារសន្តិសុខសុវត្ថិភាពជាតិ។
គ្រប់គ្រងសំណុំរឿងអន្តរជាតិមិនជុំ
លោកដូណាល់ត្រាំ កំពុងដើរជាន់កែងខ្លួនឯងហើយ ! ក្នុងរឿងនេះ។ កាលពីថ្ងៃពុធ លោក ដូណាល់ត្រាំ បានប្រកាសថាមានវីដេអូមួយបង្ហាញពីអំពីការផ្តោះប្តូរលុយ ដើម្បីរំដោះចំណាប់ថ្នូរ ដែលរដ្ឋាភិបាលអូបាម៉ា បានបដិសេធយ៉ាងដាច់អហង្ការ មិនដោះស្រាយតាមការបង់លុយទេ។ ទើបតែល្ងាចមិញ លោកបានទទួលស្គាល់ថា ច្រលំប្រធានបទនៅពេលវីដេអូនៃការដោះដូរសងពាណិជ្ជកម្មរវាងអាមេរិកនិងអ៊ីរ៉ង់។
កំហុសបែបនេះ ចង់ឬមិនចង់ បានមកពង្រឹងជំហររបស់លោកអូបាម៉ានិងលោកស្រីគ្លីនតុន ដែលតែងទន្ទេញដដែលៗ ថាលោកត្រាំអសមត្ថភាព គ្រប់គ្រងសំណុំរឿងអន្តរជាតិ។ នៅពីរសប្តាហ៍ទៀតខាងមុខ បេក្ខជនសាធារណរដ្ឋនឹងត្រូវចូលខ្លួនទៅស្តាប់ព័ត៌មានសំងាត់ផ្សេងៗ ផ្តល់ដោយភ្នាក់ងារស៊ើបការណ៍សម្ងាត់ ស្របតាមប្រពៃណី និងជាការត្រៀមខ្លួន មុននឹងចូលកាន់តួនាទី ជាអ្នកគ្រប់គ្រងប្រទេស។ សម្រាប់លោកអូបាម៉ា នេះជាវិញ្ញាសាមួយដែលលោកដូណាល់ ត្រាំ ត្រូវជំនះឱ្យបាន បើចង់ក្លាយជាប្រធានាធិបតី។ មានន័យថា បេក្ខជនរូបនេះនឹងរឿងរ៉ាវ តែមិនត្រូវទម្លាយខ្លឹមសារអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ