ប្រេស៊ីល៖ជោគវាសនាប្រធានាធិបតីលោកស្រីឌីលម៉ា រូសេហ្វនឹងត្រូវចប់នៅក្រោយកីឡាអូឡាំពិច
ចុះផ្សាយនៅថ្ងៃ៖
ស្តាប់ - ០៦:២៩
នៅក្នុងប្រទេសប្រេស៊ីល ព្រឹទ្ធសភាទើបបានសម្រេចនាថ្ងៃពុធ ទី១០ សីហានេះឲ្យបន្តនីតិវិធីទម្លាក់លោកស្រីឌីលម៉ា រូសេហ្វចេញពីតំណែងប្រធានាធិបតីជាស្ថាពរ។ តំណែងប្រធានាធិបតីដែលត្រូវបានព្យួរតាំងពីខែឧសភា និងកំពុងកាន់ជំនួសបណ្តោះអាសន្នដោយលោកមីសែល តេមែរដែលជាអនុប្រធានាធិបតី។ ការសម្រេចរបស់ព្រឹទ្ធសភាពេលនេះបានធ្វើឡើង ចំពេលដែលប្រេស៊ីលកំពុងធ្វើជាម្ចាស់ផ្ទះរៀបចំល្បែងកីឡាអូឡាំពិច។
សេចក្តីសម្រេចរបស់ព្រឹទ្ធសភាអាចជារឿងមួយភ្ញាក់ផ្អើល និងមិនភ្ញាក់ផ្អើល។ ភ្ញាក់ផ្អើលព្រោះបានធ្លាក់មក ចំពេលដែលពិភពលោកកំពុងផ្តោតចក្ខុមើលការប្រកួតកីឡាផ្សេងៗដែលប្រេស៊ីលកំពុងធ្វើជាម្ចាស់ផ្ទះរៀបចំល្បែងកីឡាអូឡាំពិចឆ្នាំនេះ។ មិនភ្ញាក់ផ្អើលព្រោះអ្វីៗជាផែនការដែលបានគ្រោងទុករួចហើយ។ តែទោះជាយ៉ាងនេះក្តី រឿងវិបត្តិនយោបាយផ្ទៃក្នុងប្រេស៊ីលពេលនេះមិនអាចចូលទៅគ្របដណ្តប់ព្រឹត្តិការណ៍កីឡាអូឡាំពិចបានទេ ហើយទស្សនិកជនជាតិ និងអន្តរជាតិក៏ប្រហែលជាមិនសូវចាប់អារម្មណ៍ប៉ុន្មានដែរ។
បន្ទាប់ពីបានជជែកដេញដោលគ្នាអស់រយៈពេលជិត ២០ម៉ោង មានសមាជិកព្រឹទ្ធសភាចំនួន ៥៩នាក់ក្នុងចំណោម ៨១នាក់បានបោះឆ្នោតឲ្យមានការបន្តនីតិវិធីទម្លាក់លោកស្រីឌីលម៉ា រូសេហ្វចេញពីតំណែងប្រធានាធិបតីជាស្ថាពរ។ ដំណើរការជជែកដេញដោលនៅក្នុងព្រឹទ្ធសភាជិត ២០ម៉ោងបានដឹកនាំដោយលោកប្រធានតុលាការកំពូលរីកាដូ លីវ៉ានដូស្គ៊ី។ គួររម្លឹកជូនថា តំណែងប្រធានាធិបតីរបស់លោកស្រីឌីលម៉ា រូសេហ្វត្រូវបានព្រឹទ្ធសភាដដែលព្យួរតាំងពីថ្ងៃទី១២ ឧសភា ដោយដាក់លោកមីសែល តេមែរដែលជាអនុប្រធានាធិបតីឲ្យជំនួសបណ្តោះអាសន្ន។
នីតិវិធីផ្តាច់ព្រាត់នឹងចាប់ផ្តើមនៅក្រោយបិទបញ្ចប់ល្បែងកីឡាអូឡាំពិច
នីតិវិធីបន្ទាប់ គឺជានីតិវិធីនៅក្នុងព្រឹទ្ធសភាដដែល និងដែលជានីតិវិធីផ្តាច់ព្រាត់ មានន័យថា ជោគវាសនាប្រធានាធិបតីរបស់លោកស្រីឌីលម៉ា រូសេហ្វនឹងត្រូវចប់ជាស្ថាពរត្រឹមណេះ។ សូមជម្រាបជូនថា នីតិវិធីទម្លាក់លោកស្រីឌីលម៉ា រូសេហ្វបានឆ្លងកាត់ជាច្រើនដំណាក់កាល តាំងពីការបោះឆ្នោតនៅក្នុងគណៈកម្មការសភារហូតដល់ការបោះឆ្នោតនៅក្នុងសភា និងការបោះឆ្នោតនៅក្នុងព្រឹទ្ធសភា។
ហើយការបោះឆ្នោតនៅក្នុងព្រឹទ្ធសភាក៏ត្រូវមានច្រើនដំណាក់កាល ដោយចាប់ផ្តើមពីការបោះឆ្នោតព្យួរតំណែងលោកស្រីឌីលម៉ា រូសេហ្វយ៉ាងយូរបំផុត ១៨០ថ្ងៃ ក្នុងពេលរង់ចាំការបោះឆ្នោតរបស់ព្រឹទ្ធសភាជាពីរដំណាក់កាល ទី១ ការបោះឆ្នោតដែលត្រូវការសម្លេងគាំទ្រ ៥០បូក១ ដើម្បីអាចបន្តនីតិវិធីទម្លាក់លោកស្រីឌីលម៉ា និងដំណាក់កាលទី២ ចុងក្រោយ គឺការបោះឆ្នោតដែលត្រូវការសម្លេងគាំទ្រចំនួន ២ភាគ៣ ដើម្បីអាចបញ្ចប់តំណែងលោកស្រីឌីលម៉ាជាស្ថាពរ។
ឥឡូវនេះ ការបោះឆ្នោតនៅព្រឹទ្ធសភាក្នុងដំណាក់កាលទី១ បានចប់ដោយសមាជិកភាគច្រើនយល់ព្រមឲ្យបន្តនីតិវិធីទម្លាក់លោកស្រីឌីលម៉ា។ ចំណែកការបោះឆ្នោតក្នុងដំណាក់កាលទី២ នឹងគ្រោងធ្វើនៅថ្ងៃទី២៥ សីហាខាងមុខ ពោល ៤ថ្ងៃក្រោយការបិទបញ្ចប់ល្បែងកីឡាអូឡាំពិច។ តែអ្វីៗលែងស្រពិចស្រពិលទៀតឡើយ ជោគវាសនាប្រធានាធិបតីរបស់លោកស្រីឌីលម៉ាត្រូវចប់ មានន័យថា ទំព័រសករាជសោយរាជ្យរបស់គណបក្សពលករជាង ១៣ឆ្នាំកន្លងទៅនឹងត្រូវបិទបញ្ចប់ត្រឹមនេះ។ នៅពេលនោះ លោកមីសែល តេមែរដែលមានអាយុ ៧៥ឆ្នាំនឹងត្រូវជំនួសកន្លែងលោកស្រីឌីលម៉ារហូតដល់ដំណាច់អាណត្តិនាឆ្នាំ ២០១៨។
ធ្លាក់ពីអំណាចដោយរឿងអាស្រូវពុករលួយ និងការគ្រប់គ្រងគ្មានតម្លាភាព
ដើមហេតុចម្បងដែលនាំឲ្យមាននីតិវីធីទម្លាក់លោកស្រីឌីលម៉ា រូសេហ្វចេញពីតំណែងគឺរឿងអាស្រូវពុករលួយដែលបានបែកធ្លាយក្នុងខែមីនា ឆ្នំា ២០១៤ និងដែលមានជាប់ពាក់ព័ន្ធនឹងក្រុមហ៊ុនប្រេងឥន្ធនៈប៉េត្រូប្រា និងក្រុមហ៊ុនសំណង់សាធារណៈ BTP។ ក្រុមហ៊ុនទំាងពីរនេះបានសហការណ៍គ្នាដើម្បីទទួលគម្រោងសាងសង់សំខាន់ៗរបស់រដ្ឋ។ តែដើម្បីអាចទទួលបានចំណែកទីផ្សារពីក្រុមហ៊ុនប៉េត្រូប្រាដែលជាក្រុមហ៊ុនរបស់រដ្ឋ ក្រុមហ៊ុនសំណង់សាធារណៈ BTP បានសូកលុយទៅឲ្យគណបក្សនយោបាយក្នុងរដ្ឋាភិបាលចម្រុះកណ្តាលឆ្វេងនិយមនាជំនាន់លោកប្រធានាធិបតីលូឡាចន្លោះឆ្នំា ២០០៣ និងឆ្នំា ២០១០។ លុយសូបប៉ាន់ទំាងនោះប្រហែលជាត្រូវបានគណបក្សនយោបាយយកទៅចាយវាយនៅក្នុងយុទ្ធនាការឃោសនាបោះឆ្នោត និងក៏ប្រហែលជាបានធ្លាក់ចូលក្នុងហោបៅថ្នាក់ដឹកនំាក្រុមហ៊ុន និងអ្នកនយោបាយមួយចំនួនផង។
តែរឿងអាស្រូវពុករលួយមួយនេះបានបែកធ្លាយនៅមុនលោកស្រីឌីលម៉ា រូសសេហ្វក្លាយជាប្រធានាធិបតី។ លោកស្រីឌីលម៉ាមិនមាននៅក្នុងបញ្ជីឈ្មោះជាជនសង្ស័យរបស់រដ្ឋអាជ្ញាទេ តែរឿងរ៉ាវនោះបានផ្ទុះឡើងក្នុងពេលលោកស្រីឌីលម៉ាមានតួនាទីជារដ្ឋមន្រ្តីក្រសួងថាមពលរបស់លោកប្រធានាធិបតីលូឡា។ អ៊ីចឹងហើយបានជាមតិមហាជនប្រេស៊ីលភាគច្រើនយល់ឃើញថា លោកស្រីមិនអាចនិយាយថា មិនដឹងអ្វីទំាងអស់នោះទេ។ គួររម្លឹកជូនថា មានអាយុ ៦៩ឆ្នាំ លោកស្រីឌីលម៉ាបានក្លាយជាប្រធានាធិបតីប្រេស៊ីលក្នុងឆ្នាំ ២០១០ និងបានជាប់មួយអាណត្តិទៀតក្នុងឆ្នាំ ២០១៤។
តែគេមិនត្រូវភ្លេចនិយាយទេថា ប្រជាប្រិយភាពរបស់លោកស្រីឌីលម៉ាបន្តធ្លាក់ដាំក្បាលចុះយ៉ាងគំហុកតាំងពីជិត ៨០% មកនៅត្រឹមតែ ៨% ប៉ុណ្ណោះ។ គឺជាប្រធានាធិបតីប្រេស៊ីលដែលមានអប្រជាប្រិយភាពជាងគេ គិតតាំងពីក្រោយការបិទបញ្ចប់របបយោធាផ្តាច់ការនៅប្រេស៊ីលក្នុងឆ្នំា ១៩៨៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ