ប្រេស៊ីល៖ជោគវាសនាប្រធានាធិបតីរបស់លោកស្រីឌីលម៉ា រូសេហ្វឈានដល់ទីបញ្ចប់ !
នៅក្នុងប្រទេសប្រេស៊ីល និតិវិធីទម្លាក់លោកស្រីប្រធានាធិបតីឌីលម៉ា រូសេហ្វកំពុងស្ថិតក្នុងកណ្តាប់ដៃព្រឹទ្ធសភាដែលការបោះឆ្នោតត្រូវធ្វើឡើងជាពីរដំណាក់កាល។ ដំណាក់កាលទី១ គឺការបោះឆ្នោតដែលត្រូវការសម្លេងគាំទ្រ ៥០បូក ១ និងដំណាក់កាលទី២ គឺការបោះឆ្នោតដែលត្រូវការសម្លេងគាំទ្រចំនួន ២ភាគ៣។ ទីបំផុតនៅក្នុងការបោះឆ្នោតដំណាក់កាលទី១ នានៅថ្ងៃព្រហស្បតិ៍ ទី១២ ឧសភានេះ ព្រឹទ្ធសភាបានបោះឆ្នោតព្យួរតំណែងលោកស្រីឌីលម៉ា រូសេហ្វរយៈពេល ១៨០ថ្ងៃ ហើយតំណែងនេះបានប្រគល់ទៅឲ្យលោកអនុប្រធានាធិបតីមីសែល តេមែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៨
នៅទីបំផុតដូចដែលបានគ្រោងទុក ព្រឹទ្ធសភាបានបោះឆ្នោតព្យួរតំណែងប្រធានាធិបតីរបស់លោកស្រីឌីលម៉ា រូសេហ្វដោយមានសម្លេងគាំទ្រ ៥៥សម្លេងក្នុងចំណោម ៨១សម្លេងនៅក្នុងព្រឹទ្ធសភា។ តែមុននឹងឈានដល់ការបោះឆ្នោត សមាជិកព្រឹទ្ធសភាម្នាក់ៗក្នុងចំណោមសមាជិកព្រឹទ្ធសភាទាំង ៨១នាក់បានឡើងផ្តល់ចំណាប់អារម្មណ៍ម្តងម្នាក់ៗរយៈពេល ១៥នាទីទាក់ទងនឹងការទម្លាក់លោកស្រីឌីលម៉ា រូសេហ្វពីតំណែងប្រធានាធិបតី។ នៅក្នុងការផ្តល់ចំណាប់អារម្មណ៍ មានសមាជិកព្រឹទ្ធសភាភាគច្រើនបានប្រកាសឲ្យដឹងពីជំហររបស់ខ្លួនក្នុងការបោះឆ្នោតទម្លាក់លោកស្រីឌីលម៉ា រូសេហ្វរួចជាស្រេច។
គួររម្លឹកជូនឡើងវិញបន្តិចថា ដើម្បីអាចទម្លាក់លោកស្រីឌីលម៉ា រូសេហ្វជាស្ថាពរបាន ព្រឹទ្ធសភាត្រូវរៀបចំបោះឆ្នោតជាពីរដំណាក់កាល គឺដំណាក់កាលទី១ ដែលត្រូវការសម្លេងគាំទ្រ ៥០បូក ១ និងដំណាក់កាលទី២ ដែលត្រូវការសម្លេងគាំទ្រចំនួន ២ភាគ៣។ ការបោះឆ្នោតក្នុងដំណាក់កាលទី២ នឹងត្រូវរៀបចំនៅខែកញ្ញាខាងមុខ។ តែចាប់ពីថ្ងៃនេះតទៅ និងដោយរង់ចាំលទ្ធផលបោះឆ្នោតក្នុងដំណាក់កាលទី២ របស់ព្រឹទ្ធសភា លោកស្រីឌីលម៉ា រូសេហ្វត្រូវបានព្យួរតំណែងរយៈពេលយ៉ាងយូរបំផុត ១៨០ថ្ងៃ និងប្រគល់តំណែងនេះទៅឲ្យលោកអនុប្រធានាធិបតីមីសែល តេមែរ។
បរិយាកាសនយោបាយអាប់អួរ និងតានតឹង
ក្រោយការបោះឆ្នោតរបស់ព្រឹទ្ធសភា បរិយាកាសនយោបាយនៅប្រេស៊ីលមានការអាប់អួរ និងតានតឹងដល់កំពូល។ នៅម្ខាង គឺក្រុមសកម្មជនដែលចង់បិទទំព័រសករាជគ្រប់គ្រងដោយគណបក្សពលករក្នុងរយៈពេល ១៣ឆ្នាំកន្លងទៅ និងចង់បញ្ចប់អំណាចរបស់លោកស្រីឌីលម៉ា រូសេហ្វ រួមទាំងបក្សពួកនិយម។ ចំណែកនៅម្ខាងទៀត គឺក្រុមសកម្មជនដែលបន្តចេញមុខគាំទ្រលោកស្រីឌីលម៉ា រូសេហ្វដោយពួកគេចាត់ទុកនិតិវិធីទម្លាក់លោកស្រីថាជារដ្ឋប្រហារស្ថាប័ន។ នៅថ្ងៃនេះ គណបក្សពលករបានកោះហៅក្រុមតំណាងរាស្រ្ត និងសកម្មជនរបស់ខ្លួនឲ្យជួបជុំគ្នានៅពីមុខវិមានប្រធានាធិបតីដើម្បីធ្វើការប្រឆាំងតវ៉ាក្រោមពាក្យស្លាកថា « យើងនឹងមិនទទួលយករដ្ឋាភិបាលខុសច្បាប់ទេ »។
នៅថ្ងៃព្រហស្បតិ៍ ទី១២ ឧសភានេះ លោកស្រីឌីលម៉ា រូសេហ្វបានវេចបង្វេចចេញពីវិមានប្រធានាធិបតី Planalto ទៅបន្តរស់នៅជាមួយម្តាយក្នុងលំនៅដ្ឋានប្រធានាធិបតី Alvorada។ ដំណើរចាកចេញពីវិមានប្រធានាធិបតីរបស់លោកស្រីឌីលម៉ា រូសេហ្វត្រូវបានហែហមដោយក្រុមសកម្មជនគាំទ្រលោកស្រី។ សូមបញ្ជាក់ជូនថា អំណាចប្រធានាធិបតីរបស់លោកស្រីឌីលម៉ា រូសេហ្វត្រូវបានព្យួរមែន តែលោកស្រីអាចបន្តរស់នៅក្នុងលំនៅដ្ឋានប្រធានាធិបតីដោយរង់ចាំការបោះឆ្នោតរបស់ព្រឹទ្ធសភានាដំណាក់កាលទី២ នៅខែកញ្ញាខាងមុខ។
បរិយាកាសក្រៀមក្រំជាងគេគឺនៅក្នុងវិមានប្រធានាធិបតី ព្រោះក្រៅពីការចាកចេញរបស់លោកស្រីឌីលម៉ា រូសេហ្វ ក៏មានការចាកចេញរបស់បុគ្គលិកជាច្រើននាក់ដែលបានបម្រើការឲ្យលោកស្រីដែរ។ ភាគច្រើនបានចាកចេញដោយស្ម័គ្រចិត្ត និងកំពុងស្វែងរកការងារថ្មី ព្រោះមិនសង្ឃឹមថាលោកប្រធានាធិបតីស្តីទីមីសែល តេមែរបន្តរក្សាទុកពួកគេទេ។ តែមានអ្នកខ្លះទៀតនៅផ្សងព្រេងដោយសង្ឃឹមមេថ្មីបន្តទុកកូនចៅចាស់។
លោកមីសែល តេមែរកំពុងទទួលអម្រែកធ្ងន់របស់លោកស្រីឌីម៉ា រូសេហ្វ
ការឡើងជំនួសកន្លែងលោកស្រីឌីលម៉ា រូសេហ្វរបស់លោកមីសែល តេមែរពេលនេះបានកើតមានឡើង ចំពេលដែលប្រេស៊ីលកំពុងផុងខ្លួនយ៉ាងជ្រៅទៅក្នុងវិបត្តិនយោបាយ សេដ្ឋកិច្ច និងសង្គម។ លោកមីសែល តេមែរមិនមែនជាមនុស្សចេញមកពីគណបក្សពលករដូចលោកស្រីឌីលម៉ា រូសេហ្វទេ ហើយក៏មិនមែនជាមនុស្សថ្មីស្រឡាងដែលទើបជាប់ឆ្នោតដែរ តែជាអនុប្រធានាធិបតីរបស់លោកស្រីឌីលម៉ា រូសេហ្វ។ គឺរូបលោកមីសែល តេមែរនេះឯងដែលត្រូវបានគណបក្សពលករចោទពីបទឃុបឃិតរៀបចំឆាកល្ខោនទម្លាក់លោកស្រីឌីលម៉ា រូសេហ្វពេលនេះ។
ក្នុងនាមជាប្រធានគណបក្សចលនាប្រជាធិបតេយ្យប្រេស៊ីល លោកមីសែល តេមែរបានរៀបចំជើងព្រួលក្នុងការទទួលតំណែងប្រធានាធិបតីប្រេស៊ីលអស់រយៈពេលជាច្រើនខែកន្លងមកហើយ។ តែគេមិនត្រូវភ្លេចនិយាយទេថា មានអាយុ ៧៥ឆ្នាំ និងជាកូនអន្តោប្រវេសន៍ជនជាតិលីបង់ ឈ្មោះលោកមីសែល តេមែរមិនសូវនរណាស្គាល់ទេ ហើយបើមានការបោះឆ្នោតប្រធានាធិបតីខាងមុខ លោកមីលែល តេមែរបានទទួលការគាំទ្រពីពលរដ្ឋប្រេស៊ីលមិនដល់ ៣% ផង។ ចាប់ពីពេលនេះដល់ខែកញ្ញាខាងមុខ លោកមីសែល តេមែរមានតំណែងត្រឹមជាប្រធានាធិបតីស្តីទី តែលោកសង្ឃឹមនឹងទទួលតំណែងពេញមុខនៅក្រោយការទម្លាក់លោកស្រីឌីលម៉ា រូសេហ្វជាស្ថាពរពីព្រឹទ្ធសភា។
តែជាប្រធានាធិបតីស្តីទី ឬជាប្រធានាធិបតីពេញមុខ លោកមីសែល តេមែរមានកិច្ចការជាច្រើនដែលត្រូវបំពេញ ពិសេសបង្កើនជំនឿទុកចិត្តរបស់ពលរដ្ឋប្រេស៊ីលចំពោះរដ្ឋាភិបាលឡើងវិញ។ ប្រធានរឿងអាទិភាពដែលត្រូវដោះស្រាយរួមមាន ស្ថានភាពសេដ្ឋកិច្ចដើរថយក្រោយ កំណើនចំនួនអ្នកអត់ការងារធ្វើ អត្រាអតិផរណាខ្ពស់ បំបាត់អំពើពុករលួយស៊ីរូងផ្ទៃក្នុង កាត់បន្ថយបំណុលសាធារណៈ និងឱនភាពថវិកាជាតិ។ គេត្រូវរង់ចាំមើលនាប៉ុន្មានខែមុខដើម្បីដឹងពីស្នាដៃពិតរបស់លោកមីសែល តេមែរ។ តាមច្បាប់រដ្ឋធម្មនុញ្ញប្រេស៊ីល លោកមីសែល តេមែរត្រូវកាន់តំណែងប្រធានាធិបតីរហូតដល់ការរៀបចំបោះឆ្នោតក្នុងឆ្នាំ ២០១៨។
តែអ្វីដែលបានកើតឡើងចំពោះលោកស្រីឌីលម៉ា រូសេហ្វពេលនេះនាំឲ្យគេបារម្ភខ្លាចលោកមីសែល តេមែរទទួលវាសនាដូចលោកស្រីឌីលម៉ា រូសេហ្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ