ប្រេស៊ីល៖ ប្រធានសភា ចាត់ទុកលទ្ធផលបោះឆ្នោតទំលាក់លោកស្រីឌីលម៉ា ជាមោឃៈ
វិបត្តិនយោបាយនៅប្រទេសប្រេស៊ីល កំពុងតែដើរមកដល់ដំណាក់កាលមួយថ្មីទៀត ប្រកបដោយភាពចម្រូងចម្រាស ហើយធ្វើឲ្យគេលែងយល់អ្វីទាំងអស់។ នោះគឺដោយសារតែ កាលពីថ្ងៃចន្ទ លោកប្រធានបណ្តោះអាសន្ននៃសភាជាតិប្រេស៊ីល បានសម្រេចចាត់ទុកជាមោឃៈនូវលទ្ធផលបោះឆ្នោតរបស់តំណាងរាស្ត្រ ដែលបានផ្តល់សំលេងភាគច្រើន ដល់ការទម្លាក់លោកស្រីឌីលម៉ា ចេញពីកៅអីប្រធានាធិបតី។
ចុះផ្សាយនៅថ្ងៃ៖
ស្តាប់ - ០២:១៤
ភាពច្របូកច្របល់ ការផ្លាស់ប្តូរស្ថានការណ៍ថ្មីនៃវិបត្តិនយោបាយប្រេស៊ីល កំពុងតែធ្វើឲ្យមតិមហាជន ក៏ដូចជាអ្នកសារព័ត៌មាន លែងយល់អ្វីទាំងអស់។ តាមការគ្រោងទុក នីតិវិធីនៃការបោះឆ្នោតទម្លាក់លោកស្រី ឌីលម៉ា រូសែហ្វ ត្រូវដើរមកដល់ដំណាក់កាលមួយ ដែលព្រឹទ្ធិសភាត្រូវបើកសម័យប្រជុំពេញអង្គ នៅថ្ងៃពុធ ទី១១ ឧសភា ដើម្បីបោះឆ្នោតសម្រេច បន្ទាប់ពីសមាជិកសភា បានបោះឆ្នោតរួចរាល់ហើយ កាលពីថ្ងៃទី ១៧មេសា។
ក៏ប៉ុន្តែស្រាប់តែកាលពីថ្ងៃចន្ទទី៩ឧសភា ការភ្ញាក់ផ្អើលដ៏ធំមួយ បានលេចឡើងដោយសារលោក Waldir Maranhao ប្រធានបណ្តោះអាសន្ននៃសភាប្រេស៊ីស ដែលទើបតែចូលកាន់តំណែង បានប្រកាសទុកជាមោឃៈនូវលទ្ធផលបោះឆ្នោតរបស់តំណាងរាស្ត្រកាលពីថ្ងៃទី១៧មេសា។ ការប្រកាសបែបនេះ បានធ្វើឲ្យគេចោទសួរថា តើព្រឹទ្ធសភានឹងត្រូវបន្តនីតិវិធីបោះឆ្នោត ដែលគ្រោងធ្វើនៅថ្ងៃពុធនេះ ដែររឺទេ? ហើយថាតើ ការសម្រេចទុកជាមោឃៈ នូវលទ្ធផលបោះឆ្នោតរបស់តំណាងរាស្ត្រ ដែលលោកប្រធានបណ្តោះអាសន្ននៃសភាប្រេស៊ីល បានធ្វើនេះ វាស្របច្បាប់ និងមានសុពលភាពដែររឺទេ?
គ្រប់គ្នាកំពុងស្ថិតក្នុងភាពងឿងឆ្ងល់នៅឡើយ ស្រាប់តែនៅល្ងាចថ្ងៃចន្ទដដែល លោកប្រធានព្រឹទ្ធសភា បានប្រកាសថា សមាជិកព្រឹទ្ធសភានឹងនៅតែបន្តបើកអង្គប្រជុំពេញអង្គនៅថ្ងៃពុធដដែល ដើម្បីបន្តនីតិវិធីបោះឆ្នោតទម្លាក់លោកស្រី ប្រធានាធិបតីប្រេស៊ីល។
សម្រាប់ពេលនេះ សូម្បីតែលោកស្រីឌីលម៉ា រូសែហ្វ ក៏មានការវង្វេងវង្វាន់ដែរ។ លោកស្រីបានប្រកាសថា សូមឲ្យតំណាងរាស្ត្រ ទាំងក្នុងសភា ទាំងក្នុងព្រឹទ្ធសភា ធ្វើការក្នុងបរិយាកាសមួយដែលធូស្រាល និងគ្មានការកៀបសង្កត់ ដើម្បីគោរពទៅដល់ សិទ្ធិរបស់ប្រជាជនដែលជាម្ចាស់ឆ្នោត និងគោលការណ៍គ្រឹះនៃលទ្ធិប្រជាធិបតេយ្យ។
គួររំលឹកថា លោក Waldir Maranhao ទើបតែចូលកាន់តំណែងជាប្រធានសភាបណ្តោះអាសន្ន បន្ទាប់ពីលោក Eduardo Cunha ត្រូវបានតុលាការកំពូលប្រេស៊ីលសម្រេចព្យួមុខតំណែងពីប្រធានាសភា ដោយសារមានជាប់ពាក់ព័ន្ធ នឹងរឿងអាស្រូវពុករលួយដ៏ធំ ជាមួយក្រុមហ៊ុន Petrobras។
លោកប្រធានបណ្តោះអាសន្នសភាប្រេស៊ីល បានលើកអំណះអំណាងថា លោកសូមប្រកាសលប់ចោលលទ្ធផលបោះឆ្នោតកាលពីថ្ងៃ១៧មេសា គឺដោយសារមានចំណុចមិនប្រក្រតីពីរ ទីមួយគឺ តំណាងរាស្រ្តគ្រប់រូប មិនត្រូវទៅប្រកាសជាសាធារណៈនៅខាងក្រៅសភា ពីឆន្ទៈបោះឆ្នោតរបស់ខ្លួននោះឡើយ ហើយចំណុចទីពីរ គឺនៅថ្ងបោះឆ្នោតក្នុងសភា លោកស្រីឌីលម៉ា រូសែហ្វ គួរណាតែត្រូវបានគេអញ្ជើញឲ្យមកផ្តល់អំណះអំណាង ដើម្បីឲ្យលោកស្រីមានឱកាសការពារខ្លួន មុននឹងមានការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ