អាមេរិក៖ហេតុអ្វីបានជាពន្ធនាគារ Guantanamo កំពុងបន្តបំផុសឲ្យមានរឿងអាស្រូវខ្លាំងម្ល៉េះ?
ចុះផ្សាយនៅថ្ងៃ៖
សហរដ្ឋអាមេរិកបានប្រកាសឲ្យដឹងនៅថ្ងៃចន្ទ ទី១៥ សីហាពីការបញ្ជូនអ្នកទោសចំនួន ១៥នាក់ពីពន្ធនាគារ Guantanamo ក្នុងប្រទេសគុយបាទៅកាន់ប្រទេសអេមីរ៉ាអារ៉ាប់រួម។ នេះជាលើកទី១ ក្នុងជំនាន់រដ្ឋបាលអាមរិករបស់លោកប្រធានាធិបតីអូបាម៉ាដែលមានការបញ្ជូនអ្នកទោសដ៏ច្រើនពីគុក Guantanamo ទៅកាន់ប្រទេសផ្សេង។ លោកអូបាម៉ាធ្លាប់បានសន្យាឆ្នាំ ២០០៩ ថា លោកនឹងបិទពន្ធនាគារ Guantanamo ដ៏ចម្រូងចម្រាស។ តែ ៧ឆ្នាំក្រោយមក ពោលជិតដល់ថ្ងៃចាកចេញពីវិមានប្រធានាធិបតី លោកអូបាម៉ានៅតែមិនទាន់អាចបិទទ្វារពន្ធនាគារ Guantanamoដដែល។
កាលពី ១៥ឆ្នាំមុន ពោលតាំងពីក្រោយមហាភេរវកម្មថ្ងៃ១១ កញ្ញា ២០០១ នៅអាមេរិក និងនៅក្នុងក្របខ័ណ្ឌនៃយុទ្ធនាការប្រយុទ្ធប្រឆាំងនឹងភេរវនិយមដែលលោកប្រធានាធិបតី George W Bushបានបង្កើតឲ្យមានពន្ធនាគារ Guantanamoក្នុងទឹកដីគុយបា។គោលដៅ គឺដើម្បីឃុំពួកភេរវជន និងជនសង្ស័យក្នុងរឿងភេរវកម្ម។ ជាសរុប មានអ្នកទោសប្រមាណជា ៧៨០នាក់ដែលបានឆ្លងកាត់ពន្ធនាគារ Guantanamo។
ក៏ប៉ុន្តែ និងអ្វីដែលបានបង្កឲ្យមានរឿងអាស្រូវខ្លាំងជាងគេទាក់ទងនឹងគុក Guantanamo គឺការដែលអាមេរិកបានចាប់ភេរវជនពិត និងជនសង្ស័យទៅឃុំដោយគ្មានឆ្លងកាត់ការកាត់ទោសនៅតុលាការ។ មានអ្នកទោសភាគច្រើនបានជាប់នៅក្នុងគុក Guantanamoជាង ១០ឆ្នាំ ដោយមិនបានកាត់ទោសរកខុស រកត្រូវអ្វីទាំងអស់។ លើសពីនេះ អ្នកទោសគ្រប់រូបនៅក្នុងគុក Guantanamo បានទទួលរងការធ្វើទារុណកម្ម និងការវាយធ្វើបាបយ៉ាងសាហាវព្រៃផ្សៃពីសំណាក់ទាហានអាមេរិកាំងដើម្បីឲ្យពួកគេឆ្លើយសារភាព។
ទង្វើរបស់អាមេរិកពាក់ព័ន្ធនឹងពន្ធនាគារ Guantanamoនេះបានធ្វើឲ្យអាមេរិកទទួលរងការរិះគន់ ទិតៀនយ៉ាងខ្លាំងពីគ្រប់ទិសទី។ អ៊ីចឹងហើយបានជានៅពេលឃោសនាបោះឆ្នោត និងបន្ទាប់ពីបានជាប់ឆ្នោតជាប្រធានាធិបតីក្នុងឆ្នាំ ២០០៩ ភ្លាម លោកអូបាម៉ាបានសន្យាបិទពន្ធនាគារ Guantanamoជាស្ថាពរ។ តែរហូតមកដល់ពេលនេះ លោកអូបាម៉ានៅតែមិនទាន់អាចបិទគុក Guantanamoបាននៅឡើយទេ។
ឧបសគ្គដែលបន្តរារាំងលោកអូបាម៉ាក្នុងការបិទគុក Guantanamo
មានឧបសគ្គចម្បងពីរដែលជាការលំបាក ទី១ គឺចន្លោះប្រហោងផ្លូវច្បាប់ និងទី២ គឺការលំបាកក្នុងការស្វែងរកប្រទេសដែលសុទ្ធចិត្តទទួលយកអ្នកទោសដែលដោះលែងឲ្យរស់នៅ។ ឧបសគ្គចន្លោះប្រហោងផ្លូវច្បាប់ គឺមានតាំងពីដើមទី ពោលគឺការចាប់មនុស្សទៅឃុំនៅក្នុងពន្ធនាគារ Guantanamo អស់រយៈពេលជាច្រើនឆ្នាំដោយមិនបានឆ្លងកាត់ការកាត់ទោសនៅតុលាការ។ ពិតណាស់ថា អ្នកទោសដែលបានឆ្លងកាត់ពន្ធនាគារ Guantanamo មានអ្នកខ្លះជាភេរវជនពិត និងអ្នកខ្លះជាជនសង្ស័យ។ តែបញ្ហានៅត្រង់ថា អាមេរិកបានចាប់ញាត់ក្នុងទ្រុងតែមួយដោយមិនបានកំណត់ និងបែងចែងឲ្យបានច្បាស់លាស់ទេ។
នៅក្នុងជំនាន់លោកប្រធានាធិបតីអូបាម៉ា មានអ្នកទោសជាច្រើន ពិសេសអ្នកទោសដែលជាប់ត្រឹមការសង្ស័យ និងដែលអាចដោះលែងបានត្រូវបានអាមេរិកដោះលែងឲ្យមានសេរីភាពវិញ។ ចំណែកឧបសគ្គទី២ គឺការស្វែងរកប្រទេសណាដែលយល់ព្រមទទួលយកអ្នកទោសដោះលែង។ គួរជម្រាបជូនថា អ្នកទោសភាគច្រើនដែលអាចដោះលែងបានច្រើនជាជនជាតិយេម៉ែន។ តែដោយសារតែយេម៉ែនកំពុងធ្លាក់ក្នុងសង្រ្គាមស៊ីវិលតាំងពីឆ្នាំ ២០១៥ អាមេរិកមិនអាចបញ្ជូនពួកគេទៅកាន់ប្រទេសកំណើតបានឡើយ។
ដូច្នេះត្រូវរកប្រទេសទី៣ ដែលយល់ព្រមទទួលយក ហើយនៅក្នុងប្រទេសទី៣ ទៀតសោត អតីតអ្នកទោស Guantanamo ម្នាក់ៗទទួលបានសេរីភាពក្រោមការតាមដាន ឃ្លាំមើល និងត្រូវបញ្ជូនទៅក្នុងសាលាអប់រំដើម្បីអាចបន្សាំខ្លួនត្រឡប់ចូលរស់ក្នុងសង្គមធម្មតាឡើងវិញ។ អ្នកទោសទាំង ១៥នាក់ដែលទើបបានដោះលែងទៅកាន់ប្រទេសអេមីរ៉ាអារ៉ាប់រួមពេលនេះ មាន ១២នាក់ជាជនជាតិយេម៉ែន និង ៣នាក់ជាជនជាតិអាហ្វហ្កានីស្ថាន។
គណបក្សសាធារណរដ្ឋបន្តរារាំងផែនការរបស់លោកអូបាម៉ា
លោកអូបាម៉ាពិតជាមានឆន្ទៈក្នុងការបិទពន្ធនាគារ Guantanamo ដែលលោកធ្លាប់បានបញ្ជាក់ថា មិនមែនជាវិធានការប្រកបដោយប្រសិទ្ធិភាពក្នុងយុទ្ធនាការប្រយុទ្ធប្រឆាំងនឹងភេរវនិយមទេ។ សម្រាប់លោកអូបាម៉ា ការបន្តរក្សាទុកពន្ធនាគារ Guantanamo មិនមែនជារឿងល្អទេសម្រាប់សន្តិសុខ និងសុវត្ថិភាពអាមេរិក។ នៅដំណាច់ខែកុម្ភៈកន្លងទៅថ្មីៗនេះ លោកអូបាម៉ាថែមទាំងបានដាក់ចេញនូវផែនការថ្មីក្នុងគោលដៅបិទពន្ធនាគារ Guantanamo។
តែបក្សប្រឆាំង គឺគណបក្សសាធារណរដ្ឋដែលកំពុងមានសម្លេងភាគច្រើនក្នុងសភាតែងព្យាយាមធ្វើអ្វីៗគ្រប់បែបយ៉ាងដើម្បីប្រឆាំងនឹងផែនការរបស់លោកអូបាម៉ា។ ពួកអ្នកសាធារណរដ្ឋមិនបានយល់ឃើញដូចលោកអូបាម៉ាទេ ហើយបេក្ខជនប្រធានាធិបតីរបស់បក្សសាធារណរដ្ឋ គឺលោកដូណាល់ ត្រាំថែមទាំងបានប្រកាសក្តែងៗថា បើលោកជាប់ឆ្នោត លោកមិនត្រឹមតែមិនបិទពន្ធនាគារ Guantanamo ទេ តែនឹងពង្រីកគុកស្រដៀងគ្នានេះបន្ថែមទៀត។ ដូច្នេះឃើញថា ជារឿងពិបាកដែលពន្ធនាគារ Guantanamo ត្រូវបិទទ្វារជាស្ថាពរទន្ទឹមគ្នានឹងការចាកចេញពីវិមានប្រធានាធិបតីជាស្ថាពររបស់លោកអូបាម៉ានៅដើមឆ្នាំ ២០១៧ ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ