ច្បាប់ការពារជាតិអាមេរិកឆ្នាំ២០១៦ បានបន្តរក្សាមន្ទីរឃុំឃាំង Guantanamo
លោកបារ៉ាក់ អូបាម៉ា ប្រធានាធិបតីអាមេរិក បានចុះហត្ថលេខាលើច្បាប់ការពារជាតិ សម្រាប់ឆ្នាំ២០១៦ ដែលមានខ្លឹមសារជាអាទិ៍ ហាមឃាត់ការបិទមន្ទីរឃុំឃាំង Guantanamo ដែលជាមន្ទីរឃុំឃាំង ដែលធ្លាប់ត្រូវបានគេរិះគន់ជាខ្លាំង ថាបានប្រើទារុណកម្មធ្ងន់ធ្ងរ ទៅលើអ្នកទោស ដែលជាភេរវជន។ ទោះបីលោក អូបាម៉ា ត្រូវបង្ខំចិត្ត ចុះហត្ថលេខាលើច្បាប់នេះ ប៉ុន្តែលោកនៅតែមិនបោះបង់ចោលបំណងប្រាថ្នា ថានឹងបិទមន្ទីរឃុំឃាំងដ៏ចម្រូងចម្រាសនេះ ឲ្យបានមុនចប់អាណត្តិរបស់លោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
គម្រោងច្បាប់ស្តីពីកិច្ចការការពារជាតិ សម្រាប់ឆ្នាំ២០១៦ ត្រូវបានអនុម័តដោយ សភាជាន់ខ្ពស់សហរដ្ឋអាមេរិក កាលពី១៥ថ្ងៃមុននេះ។ ទើបតែនៅថ្ងៃនេះ លោកប្រធានាធិបតី អូបាម៉ា បានចុះហត្ថលេខាសម្រេចដាក់ឲ្យប្រើប្រាស់ ស្របទៅតាមការកំណត់របស់រដ្ឋធម្មនុញ្ញ។ ខ្លឹមសារ មួយផ្នែកនៃច្បាប់ការពារជាតិឆ្នាំ២០១៦ នេះ គឺបានហាមឃាត់មិនឲ្យក្រសួងការពារជាតិអាមេរិក ផ្ទេរអ្នកទោសពីមន្ទីរឃុំឃាំង Guantanamo ដែលស្ថិតនៅលើកោះគុយបា មកលើដីសហរដ្ឋអាមេរិកទេ រហូតដល់ដាច់ឆ្នាំ២០១៦។ មានន័យថា ក្នុងន័យនេះ មន្ទីរឃុំឃាំង Guantanamo នឹងត្រូវរក្សា ឲ្យដំណើរការបន្តទៀត រហូតដល់ដាច់ឆ្នាំ២០១៦។
លោកបារ៉ាក់ អូបាម៉ា ថ្វីត្បិតតែត្រូវបង្ខំចិត្តចុះហត្ថលេខា លើច្បាប់នេះ តែលោកនៅតែអះអាងថា រដ្ឋាភិបាលលោក និងខិតខំរកវិធី ដើម្បីបង្ខំឲ្យរដ្ឋសភាអាមេរិក បិទមន្ទីរឃុំឃាំង ដែលគេរិះគន់ពាសពេញពិភពលោកនេះ។ លោក បញ្ជាក់ថា វាជារឿងមួយ ដែលមិនអាច បន្តទទួលយកបានទៀតទេ ដែលរដ្ឋត្រូវចំណាយប្រាក់ មួយឆ្នាំៗ ៣លានដុល្លារ ក្នុងអ្នកទោសម្នាក់ ឲ្យនៅក្នុងពន្ធនាគារមួយ ដែលគេឯងគ្រប់គ្នារិះគន់ថា ជាពន្ធនាគារប្រើប្រាស់ទារុណកម្មឃោរឃៅ និងអមនុស្សធម៌។ ការនេះ គឺវារិតតែធ្វើឲ្យសហរដ្ឋអាមេរិកអាម៉ាសមុខ។ លោកបន្តថា វាល្មមដល់ពេលហើយ ដែលរដ្ឋសភា និងរដ្ឋាភិបាល មូលមតិគ្នា បិទមន្ទីរឃុំឃាំងនេះ។
សូមបញ្ជាក់ថា មន្ទីរឃុំឃាំង Guantanamo ត្រូវបានបង្កើតឡើងភ្លាម ក្រោយព្រឹត្តិការណ៍ ភេរវកម្ម ថ្ងៃទី ១១ កញ្ញា ឆ្នាំ២០០១ ដើម្បីឃុំឃាំង និងសួរចម្លើយអ្នកទោស ដែលគេសង្ស័យថា ជាបណ្តាញក្រុមភេរវកម្មអ៊ីស្លាម អាល់កាអ៊ីដា។ ការសួរចម្លើយ ត្រូវបានធ្វើឡើងតាមរយៈ ការធ្វើទារុណកម្មដ៏ព្រៃផ្សៃ ដែលអ្នកសារព័ត៌មាននានា បានសរសេរបរិហារ ហើយធ្វើឲ្យមជ្ឈដ្ឋានទូទៅ រិះគន់រដ្ឋាភិបាលអាមេរិក ដែលកាលនោះ ដឹកនាំដោយលោក George W.Bush។ លោកបារ៉ាក់ អូបាម៉ា បន្ទាប់ពីបានឡើងកាន់ដំណែង បានសន្យា ធ្វើគ្រប់យ៉ាង ដើម្បីបិទបញ្ចប់ទំព័រប្រវត្តិសាស្ត្រដ៏អាម៉ាស មួយនេះ។
ទោះបីជាច្បាប់ការពារជាតិឆ្នាំ២០១៦នេះ បានបន្តរក្សា មន្ទីរឃុំឃាំង Guantanamo ក្តី ប៉ុន្តែច្បាប់នេះ បានចែងមាត្រាមួយចំនួន ដោយហាមឃាត់ បច្ចេកទេសធ្វើទារុណកម្ម មួយចំនួន ដូចជាការចាប់ជ្រមុជទឹកជាដើម។ ចាប់ពីពេលនេះទៅ បច្ចេកទេសទារុណកម្ម ត្រូវតែធ្វើឡើងដោយគោរព ទៅនឹងអ្វីដែលមានចែង នៅក្នុងសៀវភៅបច្ចេកទេសកងទ័ពរបស់សហរដ្ឋអាមេរិក។
សេតវិមាន បានឲ្យដឹងផងដែរថា រដ្ឋាភិបាលលោកអូបាម៉ា កំពុងពិចារណា រកមធ្យោបាយថ្មីផ្សេងទៀត ដើម្បីបិទមន្ទីរឃុំឃាំង Guantanamo នេះ។ តាមការប៉ាន់ស្មាន លោកប្រធានាធិបតីអាចនឹងប្រើប្រាស់ សិទ្ធិរបស់លោក ក្នុងការធ្វើក្រិត្យប្រធានាធិបតី ដើម្បីចាប់បង្ខំរដ្ឋសភា ឲ្យព្រមបិទមន្ទីរឃុំឃាំង Guantanamo។ យ៉ាងណាក៏ដោយ ការជជែកវែកញែកផ្លូវច្បាប់ អាចនឹងមានឡើង ដើម្បីធានាឲ្យមានសមភាព នៃការបែងចែកអំណាច រវាងស្ថាប័ននីតិបញ្ញត្តិ និងស្ថាប័ននីតិប្រតិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ