បញ្ហាសុខភាពកំពុងក្លាយជាឧបសគ្គរបស់លោកស្រីគ្លីនតុន ?
ចុះផ្សាយនៅថ្ងៃ៖
ស្តាប់ - ០៦:២៩
ក្នុងវ័យ៦៨ឆ្នាំ បេក្ខនារីប្រធានាធិបតីអាមេរិកបក្សប្រជាធិបតេយ្យ លោកស្រី ហ៊ីលឡារី គ្លីនតុន កំពុងស្ថិតក្រោមសម្ពាធយ៉ាងខ្លាំង នៅថ្ងៃចន្ទនេះ ដោយកាលពីថ្ងៃអាទិត្យ លោកស្រីបានចាកចេញពីកម្មវិធីប្រារព្ធខួប១៥ឆ្នាំនៃមហាភេរវកម្មថ្ងៃទី ១១កញ្ញា នៅវ័លស្ទ្រីតសឺនធ័រ ទាំងកណ្តាលទី ព្រោះមានអាការៈមិនស្រួលខ្លួនខ្លាំង។ លោកស្រី ហ៊ីលឡារី គ្លីនតុន ត្រូវបង្ខំចិត្តបកស្រាយអំពីបញ្ហាសុខភាពរបស់លោកស្រី ថាកំពុងមានជំងឺ រលាកសួតនិងទទួលការព្យាបាលដោយថ្នាំផ្សះ តាំងពីសុក្រមក។ គម្រោងយុទ្ធនាការឃោសនានៅថ្ងៃចន្ទ និងថ្ងៃអង្គារនេះ ត្រូវលុបចោល។ តែតម្លាភាពសុខភាពរបស់បេក្ខជនប្រធានាធិបតីកំពុងបានផុសផុលជាថ្មី។ គូប្រជែងមកពីបក្សសាធារណរដ្ឋ អាចយកចំណេញពីស្ថានភាពនេះ យ៉ាងពេញលេញ។
នៅថ្ងៃខួបមហាភេរវកម្ម ១១កញ្ញា ថ្ងៃដែលអាមេរិកទាំងមូលកំពុងផ្លុងអារម្មណ៍ក្នុងអតីតកាលដ៏ជូរចត់ លោកស្រីបេក្ខនារីប្រធានាធិបតីអាមេរិក លោកស្រី ហ៊ីលឡារី គ្លីនតុន ស្រាប់តែបានចាកចេញពីកន្លែងរៀបចំកម្មវិធី ដោយមានអាការៈមិនស្រួលខ្លួនខ្លាំង។ កម្មវិធីឃោសនានៅថ្ងៃនេះ និងថ្ងៃស្អែក ត្រូវលុបចោល។ តើពេលនេះ លោកស្រីយ៉ាងម៉េចទៅហើយ ?
កាលពីព្រឹកថ្ងៃទី ១១កញ្ញាម្សិលមិញ លោកស្រី គ្លីនតុន មានអាការៈមិនស្រួលខ្លួនខ្លាំង រហូតបង្ខំចិត្តចាកចោលកម្មវិធីគោរពរំលឹកខួប១៥ឆ្នាំនៃមហាភេរវកម្ម ទាំងកណ្តាលទី ដោយសម្រួលនិងស្ងាត់ៗ។ វីដេអូថតដោយពលរដ្ឋម្នាក់ បង្ហោះលើប្រព័ន្ធសង្គម បង្ហាញរូបលោកស្រី គ្លីនតុន បាត់លំនឹង ធីងធោង រកកលនឹងដួល ទាល់តែមានអ្នកនៅក្បែរពីរបីជួយគ្រាចូលឡាន។
ក្រោយពីបានចូលសម្រាកក្នុងផ្ទះកូនស្រី បានពីរម៉ោង លោកស្រី បានត្រលប់ទៅផ្ទះ ក្នុងទឹកមុខស្រស់ស្រាយ ញញឹមប៉ប្រិយ ទៅកាន់សាធារណជន និងបានថតរូបសែលហ្វីជាមួយកុមារីម្នាក់ តាមចិញ្ចើមថ្នល់ផង ដោយអះអាង ថា “ខ្ញុំស្រួលខ្លួនធម្មតាទេ !
ដំបូងឡើង គេគិតថា អាការៈមិនស្រួលខ្លួននេះ គឺដោយសារអាកាសធាតុក្តៅថប់ខ្លាំង។ ប៉ុន្តែក្រោយពីរក្សាភាពស្ងប់ស្ងាត់ និងលាក់ការសម្ងាត់អស់ជាច្រើនម៉ោង ក្រុមការងាររបស់លោកស្រីបេក្ខនារីប្រធានាធិបតីបានចេញសេចក្តីថ្លែងការណ៍របស់គ្រូពេទ្យប្រចាំខ្លួន ថា លោកស្រី គ្លីនតុន មានជំងឺរលាកសួត តាំងពីថ្ងៃ សុក្រមក និងកំពុងទទួលការព្យាបាលដោយប្រើថ្នាំអង់ទីប៊ីយូទិក ថ្នាំផ្សះ ទើបងាយហត់ ងាយខ្សោះជាតិទឹក។ គ្រូពេទ្យសូមណែនាំឱ្យលោកស្រី សម្រាកពីរបីថ្ងៃសិន។
តម្លាភាពសុខភាព
នារយៈពេលប៉ុន្មានថ្ងៃចុងក្រោយនេះ លោកស្រីហាក់ដូចជាមានសភាព និងទឹកមុខអស់កម្លាំងខ្លាំង។ ក្អកញយៗដង ក្អករហូតដល់ទៅលែងអាចថ្លែងសុន្ទរកថាអស់ពីរបីនាទី។ ជាក់ស្តែង កាលពីថ្ងៃសុក្រ លោកស្រីក្អកខ្លាំង ប្តូរសំឡេង តែបានបន្លំញ៉ាំទឹកសើចចំអកបែបឡែបខាយ ថា ឱ្យនិយាយដល់ឈ្មោះ ដូណាល់ ត្រាំ លោកស្រីកើតរោគអាឡែហ្សិកភ្លាម។
លោកស្រី គ្លីនតុន ធ្លាប់មានជំងឺ ស្ទះសរសៃឈាមក្នុងខួរក្បាល រហូតចូលសម្រាកព្យាបាលក្នុងមន្ទីរពេទ្យមួយរយៈខ្លី កាលនៅធ្វើជារដ្ឋមន្ត្រីការបរទេស នៅឆ្នាំ២០១២។ ប៉ុន្តែលោកស្រីបានជាសះស្បើយជាធម្មតាឡើងវិញ និងមានកម្លាំងថាមពលពេញលេញ រហូតដល់បេក្ខជនជាអនុប្រធានាធិបតីរបស់លោកស្រី ដែលមានវ័យក្មេងជាងច្រើន លើកសរសើរថា គាត់នៅក្មេងសោះ ចេញឃោសនាទើបបានតែ១០០ថ្ងៃ រត់លែងចង់ទាន់លោកស្រីគ្លីនតុន។
លោក ដូណាល់ ត្រាំ ដែលជាគូប្រជែង ថ្វីបើមិនបានបញ្ចេញប្រតិកម្មអ្វីភ្លាមៗមែន តែធ្លាប់បានបំផុសភាពសង្ស័យលើសុខភាពរបស់លោកស្រី គ្លីនតុន ជាយូរមកហើយ។ លោកធ្លាប់បានទន្ទេញដដែលៗ ថាលោកស្រីគ្លីនតុន ជាមនុស្សមានជំងឺ ពុំមានកម្លាំងពលំគ្រប់គ្រាន់ សម្រាប់ទទួលភារៈជាមេដឹកនាំប្រទេស ដែលជាបន្ទុកដ៏ធ្ងន់នោះទេ។ ទីប្រឹក្សាលោកដូណាល់ ត្រាំ ម្នាក់ ដែលជាអតីតអភិបាលក្រុងញូវយ៉ក ក៏ធ្លាប់ព្រលយពាក្យថាលោកស្រី គ្លីនតុន មានជំងឺជាប់នឹងខ្លួនខ្លាំងជាងអ្វីដែលយើងគិតទៅទៀត។
ទោះបីលោកស្រី គ្លីនតុន ចេញ សេចក្តីថ្លែងការណ៍វេជ្ជសាស្ត្រមួយ កាលពីខែកក្កដា ឆ្នាំ២០១៥ បញ្ជាក់ថា លោកស្រី មានសុខភាពល្អពេញលេញ ក៏ពាក្យចចាមអារាម ពាក់ព័ន្ធនឹងសុខភាពរបស់លោកស្រីមិនបានស្ងប់ស្ងាត់ដែរ នារយៈពេលប៉ុន្មានខែចុងក្រោយនេះ។ ដូច្នេះ ការធ្លាក់ខ្លួនមានជំងឺរលាកសួត នាពេលនេះ បានត្រឹមតែបណ្តុះភាពសង្ស័យលើសុខភាពលោកស្រីកាន់តែខ្លាំង និងអាចជាដើមហេតុ បង្ខំឱ្យបេក្ខជនប្រធានាធិបតី បង្ហាញតុល្យការសុខភាព ជាសាធារណៈ ដែលលោកស្រី គ្លីនតុន ក៏ដូចលោក ដូណាល់ត្រាំ បានបដិសេធមិនព្រមធ្វើតាំងពីដើមមក។
លោក ដូណាល់ ត្រាំ បញ្ជាក្រុមបក្សមិនឱ្យធ្វើអត្ថាធិប្បាយ
ជាច្រើនលើកច្រើនសាមកហើយដែលលោកដូណាល់ ត្រាំ ចង់សម្រុកវាយប្រហារលើ បញ្ហាសុខភាពរបស់លោកស្រី គ្លីនតុន។ ស្រាប់តែពេលនេះគូប្រជែង បានបង្ហាញភស្តុតាងដោយជាក់ស្តែងមែនទៅហើយ តើលោកដូណាល់ ត្រាំ អត់មិនយកធ្វើការវាយប្រហារចំៗលើលោកស្រីគ្លីនតុន ទៅកើត។
ប៉ុន្តែក្នុងពេលភ្លាមៗ អាចជាយុទ្ធសាស្ត្រ និងដើម្បីបង្ហាញថាលោកជាបេក្ខជនចេះគោរពគ្នា លោកបានបញ្ជាឱ្យអ្នកសាធារណរដ្ឋទាំងកុំធ្វើអត្ថាធិប្បាយអ្វីដែលទាក់ទងនឹងអាការៈជំងឺរបស់លោកស្រី គ្លីនតុន។ តែចង់ឬមិនចង់ សុខភាព បានក្លាយ ចំណុចខ្សោយរបស់លោកស្រី គ្លីនតុន និងជាប្រធានបទដ៏រសើបរបស់បក្សប្រជាធិបតេយ្យ។ ដល់អាយុនេះហើយ បញ្ហាសុខភាពអាចនឹងប្តូរផ្លាស់ ពីថ្ងៃនេះ ទៅថ្ងៃស្អែកបានយ៉ាងងាយ។ សូមបញ្ជាក់ថា បេក្ខជនប្រធានាធិបតី គ្លីនតុន និងត្រាំ ជាអនាគតប្រធានាធិបតីដែលមានវ័យចំណាស់ជាងគេក្នុងប្រវត្តិ លើកលែងតែលោក រីហ្កែនមួយចេញ។
បញ្ហាសុខភាពកើតឡើងជួនចំពេលដែល ការបោះឆ្នោតកាន់តែខិតមកដល់ យុទ្ធនាការឃោសនា កាន់តែតានតឹងឡើងៗ គម្លាតរវាងលោកដូណាល់ ត្រាំ និង លោកស្រី គ្លីនតុន កាន់តែតូច ហើយ លោកស្រីគ្លីនតុន ហាក់ដូចជាមានភ្លាត់កំហុសមួយដែលពិបាកស្តារ ៖ កាលពីបីថ្ងៃមុន លោកស្រី បានប្រើពាក្យមិនគប្បីខ្លាំងវាយប្រហារ មិនមែនលើលោកដូណាល់ ត្រាំទេ តែទៅលើសកម្មជនអ្នកគាំទ្រលោក ដោយម៉ៅពួកគេថាជាបង្កោមមនុស្សគួរឱ្យអាណិត។ នៅសល់តែជាង១០ថ្ងៃទៀតប៉ុណ្ណោះ ថ្ងៃទី ២៦ កញ្ញា នឹងមានការតស៊ូមតិទល់មុខគ្នា រវាងបេក្ខជនប្រធានាធិបតី នឹងចាប់ផ្តើមហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ