អាមេរិក៖ក្រោយយុទ្ធនាការបង្កប់ដោយសង្រ្គាមពាក្យសម្តី ការពិតបានមកដល់សម្រាប់លោកស្រីគ្លីនតុន និងលោកត្រាំ
ចុះផ្សាយនៅថ្ងៃ៖
ស្តាប់ - ០៦:៣៩
នៅសហរដ្ឋអាមេរិក ការបោះឆ្នោតជ្រើសរើសប្រធានាធិបតីថ្មីបានឈានចូលមកដល់ហើយនាថ្ងៃអង្គារ ទី៨ វិច្ឆិកានេះ។ មានពលរដ្ឋប្រមាណជា ២២៧លាននាក់នឹងត្រូវចូលរួមបោះឆ្នោតជ្រើសរើសប្រធានាធិបតីថ្មីរវាងបេក្ខនារីហ៊ីលឡារី គ្លីនតុនមកពីគណបក្សប្រជាធិបតេយ្យ និងបេក្ខជនដូណាល់ ត្រាំមកពីគណបក្សសាធារណរដ្ឋ។ គេត្រូវរង់ចាំនៅថ្ងៃពុធ ទី៨ វិច្ឆិកាទើបដឹងថា តើលោកស្រីគ្លីនតុន ឬមួយលោកត្រាំដែលនឹងក្លាយជាប្រធានាធិបតីថ្មីទី៤៥ របស់អាមេរិក។
ខុសពីប្រព័ន្ធបោះឆ្នោតនៅក្នុងប្រទេសភាគច្រើនក្នុងលោក អាមេរិកបានអនុវត្តន៍ប្រព័ន្ធបោះឆ្នោតមួយដែលមានលក្ខណៈពិសេស និងស្មុគស្មាញ។ ពិសេស និងស្មុគស្មាញ ព្រោះពលរដ្ឋដែលចូលរួមបោះឆ្នោតមិនមែនបោះឆ្នោតជ្រើសរើសបេក្ខជនរបស់ខ្លួនដោយផ្ទាល់ទេ តែបោះឆ្នោតជ្រើសរើសអ្នកបោះឆ្នោតតំណាងប្រចាំរដ្ឋនីមួយៗរបស់ខ្លួន និងបន្ទាប់មក អ្នកបោះឆ្នោតតំណាងនឹងត្រូវបោះឆ្នោតជ្រើសរើសរូបប្រធានាធិបតី និងរូបអនុប្រធានាធិបតីថ្មី។ ប្រព័ន្ធបោះឆ្នោតអាមេរិកជាប្រព័ន្ធបោះឆ្នោតដោយប្រយោល ឬមិនចំពោះ និងដែលបានបន្សល់ទុកតាំងពីសតវត្សទី១៨ មកម្ល៉េះ។
នៅក្នុងការបោះឆ្នោតលើកនេះ មានអ្នកបោះឆ្នោតតំណាងសរុបទាំងអស់ចំនួន ៥៣៨រូប ហើយពួកគេត្រូវបានរើសចេញពីគណបក្សរៀងៗខ្លួន គឺគណបក្សប្រជាធិបតេយ្យ និងគណបក្សសាធារណរដ្ឋ។ ចំនួនអ្នកបោះឆ្នោតតំណាងក្នុងរដ្ឋនីមួយៗត្រូវបានគណនាទៅតាមចំនួនពលរដ្ឋនៅក្នុងរដ្ឋនីមួយៗ មានន័យថា រដ្ឋណាមានពលរដ្ឋច្រើនក៏មានចំនួនអ្នកបោះឆ្នោតតំណាងច្រើនដែរ។ ជាក់ស្តែងរដ្ឋ California ដែលមានចំនួនពលរដ្ឋច្រើនជាងគេនៅអាមេរិករហូតដល់ទៅជាង ៣៩លាននាក់ មានអ្នកបោះឆ្នោតតំណាងចំនួន ៥៥រូប ហើយរដ្ឋតូចតាចមានអ្នកបោះឆ្នោតតំណាងត្រឹម ៣រូបប៉ុណ្ណោះ។
ថ្ងៃទី៨ វិច្ឆិកាជាការរៀបចំបោះឆ្នោតផ្លូវការ តែមានរដ្ឋខ្លះបានអនុញ្ញាតឲ្យពលរដ្ឋខ្លួនបោះឆ្នោតមុន ហើយគិតត្រឹមថ្ងៃនេះ មានអ្នកបានបោះឆ្នោតរួចប្រមាណជា ២២លាននាក់។ បើអ្វីៗបានប្រព្រឹត្តិទៅដូចការគ្រោងទុក គេនឹងស្គាល់រូបប្រធានាធិបតីថ្មីនៅថ្ងៃពុធ ទី៨ វិច្ឆិកា។ តែរូបប្រធានាធិបតីថ្មីត្រូវទទួលបានសម្លេងគាំទ្រភាគច្រើនដាច់ខាតពីអ្នកបោះឆ្នោតតំណាង ពោលត្រូវទទួលបានសម្លេងគាំទ្រយ៉ាងតិច ២៧០សម្លេង ក្នុងចំណោមអ្នកបោះឆ្នោតតំណាងចំនួន ៥៣៨រូប។ ការរៀបចំបោះឆ្នោតអ្នកបោះឆ្នោតតំណាងនឹងត្រូវធ្វើឡើងនៅថ្ងៃទី១៩ ធ្នូខាងមុខ ហើយរូបប្រធានាធិបតីថ្មីនឹងត្រូវចូលកាន់តំណែងជាផ្លូវការនៅថ្ងៃទី២០ មករា ឆ្នាំ ២០១៧។
ក្រៅពីជ្រើសរើសរូបប្រធានាធិបតី ក៏មានការជ្រើសរើសសមាជិកសភា និងព្រឹទ្ធសភាមួយភាគ
ក្រៅពីការបោះឆ្នោតជ្រើសរើសរូបប្រធានាធិបតីថ្មី ពលរដ្ឋអាមេរិកក៏ត្រូវបោះឆ្នោតជ្រើសរើសរូបសមាជិកសភាថ្មីមួយចំនួនសម្រាប់អាណត្តិ ២ឆ្នាំ និងរូបសមាជិកព្រឹទ្ធសភាថ្មីចំនួន ១ភាគ៣ សម្រាប់អាណត្តិ ៦ឆ្នាំ។ ការបោះឆ្នោតមួយនេះពិតជារឿងសំខាន់ដែលបេក្ខជននីមួយៗមិនបានមើលរំលងទេនៅក្នុងយុទ្ធនាការឃោសនារបស់ខ្លួននាពេលកន្លងមក។ នៅក្នុងប្រវត្តិសាស្រ្តនយោបាយអាមេរិក គណបក្សមួយដែលទទួលបានកៅអីប្រធានាធិបតីនៅសេតវិមានមិនប្រាកដថានឹងទទួលបានសម្លេងភាគច្រើននៅក្នុងសភា ឬនៅក្នុងព្រឹទ្ធសភាទេ ឬមួយក៏ថា ទទួលបានពីដំបូង តែក៏ស្រាប់បាត់បង់ទៅវិញនាការបោះឆ្នោតពាក់កណ្តាលអាណត្តិ ឬការបោះឆ្នោតជាថ្មី។
ជាក់ស្តែងគណបក្សប្រជាធិបតេយ្យរបស់លោកអូបាម៉ាដែលមានសម្លេងភាគច្រើនដាច់ខាតនៅសភាពីដំបូងក៏ស្រាប់តែបាត់បង់ធ្លាក់ទៅក្នុងកណ្តាប់ដៃគណបក្សសាធារណរដ្ឋទៅវិញនាការបោះឆ្នោតសភាពាក់កណ្តាលអាណត្តិ។ នៅក្នុងន័យនេះ ការលំបាក និងឧបសគ្គមានច្រើនសម្រាប់លោកអូបាម៉ាក្នុងការធ្វើកំណែទម្រង់ និងការអនុម័តច្បាប់មួយចំនួនដែលលោកបានសន្យានៅក្នុងយុទ្ធនាការឃោសនាបោះឆ្នោត។ លោកស្រីគ្លីនតុន ក៏ដូចជាលោកត្រាំយល់ច្បាស់ណាស់ថា បើគណបក្សខ្លួនមានសម្លេងភាគច្រើននៅសភា និងនៅព្រឹទ្ធសភាទៀតនោះ វារឹតតែប្រសើរក្នុងការសម្រេចលើគម្រោងកំណែទម្រង់អ្វីមួយ។
យុទ្ធនាការឃោសនាបោះឆ្នោតបង្កប់ពាក្យសម្តីហិង្សារវាងលោកស្រីគ្លីនតុន និងលោកដូណាល់ ត្រាំ
មានការកត់សម្គាល់ជាច្រើននៅក្នុងយុទ្ធនាការឃោសនាបោះឆ្នោតអាមេរិកលើកនេះ។ ការកត់សម្គាល់មានតាំងពីបុគ្គលិកលក្ខណៈផ្ទាល់ខ្លួនរបស់បេក្ខជននីមួយៗរហូតដល់កម្មវិធីដែលបានយកទៅឃោសនានារយៈពេលប៉ុន្មានខែចុងក្រោយនេះ។ តែអ្វីដែលបានធ្វើឲ្យពិភពលោកចាប់អារម្មណ៍ និងភ្ញាក់ផ្អើលខ្លាំងនៅក្នុងយុទ្ធនាការឃោសនាបោះឆ្នោតអាមេរិកលើកនេះ គឺការវាយប្រហារគ្នាដោយប្រើសម្តីគ្រោតគ្រាត និងសម្តីព្រមានគ្នារវាងលោកស្រីគ្លីនតុន និងលោកដូណាល់ ត្រាំ។ គេសង្កេតឃើញថា កាយវិការរបៀបនេះមាននៅគ្រប់ឆាកឃោសនាទាំងអស់ មិនថានៅលើកញ្ចក់ទូរទស្សន៍ នៅក្នុងវេទិកាតស៊ូមតិ ឬមួយក៏នៅទីកន្លែងសាធារណៈទេ។
តាមធម្មតា យុទ្ធនាការឃោសនាបោះឆ្នោតគឺជាឱកាសមួយដែលបេក្ខជនម្នាក់ៗត្រូវបង្ហាញចេញនូវកម្មវិធីនយោបាយ សង្គម និងសេដ្ឋកិច្ចដើម្បីជំនះពលរដ្ឋឲ្យបោះឆ្នោតឲ្យខ្លួន។ តែនៅក្នុងយុទ្ធនាការឃោសនាបោះឆ្នោតរបស់លោកស្រីគ្លីនតុន និងលោកដូណាល់ ត្រាំ ពលរដ្ឋអាមេរិកបែរជាឃើញមានតែការប្រើសម្តីវាយប្រហារគ្នាជាងការបង្ហាញកម្មវិធីសម្រាប់អនាគតរបស់ប្រទេសជាតិទៅវិញ។ ទន្ទឹមគ្នានេះ ក៏គេសង្កេតឃើញមានផ្ទុះរឿងអាស្រូវជាហូរហែដែលជាប់ពាក់ព័ន្ធនឹងលោកស្រីគ្លីនតុនក្នុងរឿងអាស្រូវអ៊ីមែល និងលោកដូណាល់ ត្រាំក្នុងរឿងជេរប្រមាថស្រ្តីភេទ និងការរើសអើង ប្រកាន់ពូជសាសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ