អាមេរិក៖FBI ទទួលបានភ្លើងខៀវឲ្យឆែកមើលអ៊ីមែលរបស់លោកស្រីគ្លីនតុន
នៅសហរដ្ឋអាមេរិក ទីភ្នាក់ងារស៊ើបការណ៍សម្ងាត់ FBI ទទួលបានភ្លើងខៀវឲ្យឆែកមើលអ៊ីមែលរបស់លោកស្រីគ្លីនតុន អតីតរដ្ឋមន្រ្តីការបរទេស និងជាបេក្ខនារីប្រធានាធិបតីមកពីគណបក្សប្រជាធិបតេយ្យ។ ព័ត៌មានមួយនេះត្រូវបានទម្លាយឲ្យដឹងដោយសារព័ត៌មានអាមេរិកាំងជាច្រើនចេញផ្សាយក្នុងថ្ងៃអាទិត្យ ទី៣០ តុលា។ តែនៅមិនទាន់មានការបញ្ជាក់ជាផ្លូវការណាមួយពី FBI នៅឡើយទេ។ អ្វីដែលគេដឹង FBI កំពុងទទួលគំនាបយ៉ាងខ្លាំងពីគណបក្សប្រជាធិបតេយ្យ។
ចុះផ្សាយនៅថ្ងៃ៖
ស្តាប់ - ០២:៤០
រហូតមកដល់ពេលនេះ នៅមិនទាន់មានអ្នកតំណាង FBI ណាម្នាក់អាចចេញមុខបញ្ជាក់លើព័ត៌មានចុះផ្សាយដោយកាសែតអាមេរិកនៅឡើយទេ។ តែបើជាព័ត៌មានពិតមែននោះ FBI មានសិទ្ធិធ្វើការឆែកឆេរ និងសិក្សាលើអ៊ីមែលរបស់លោកស្រីគ្លីនតុនដែលលោកស្រីបានប្រើក្នុងនាមជារដ្ឋមន្រ្តីការបរទេរពីឆ្នាំ ២០០៩ ដល់ឆ្នាំ ២០១៣។ រឿងអាស្រូវអ៊ីមែលរបស់លោកស្រីគ្លីនតុនបានផ្ទុះឡើង ដោយសារតែលោកស្រីបានប្រើប្រអប់អ៊ីមែលឯកជនដើម្បីដោះដូរព័ត៌មានជាផ្លូវការក្នុងនាមជាប្រមុខការទូត។ កន្លងមក FBI ក៏ធ្លាប់បានបើកការស៊ើបអង្កេតរឿងនេះម្តងហើយ តែមិនបានរកឃើញអ្វីធំដុំទេ។
នៅលើនេះ ការដែល FBI បានផ្តោតការស៊ើបអង្កេតជាថ្មីលើអ៊ីមែលលោកស្រីគ្លីនតុនក៏ដោយសារថា FBI បានរកឃើញសារអេឡិចត្រូនិចរបស់លោក Anthony Weiner ដែលបានផ្ញើទៅឲ្យក្មេងស្រីមិនទាន់គ្រប់វ័យអាយុ ១៥ឆ្នាំម្នាក់ក្នុងរដ្ឋការ៉ូលីនខាងត្បូង។ លោក Anthony Weiner ជាអតីតអ្នកតំណាងរាស្រ្តក្នុងរដ្ឋញូយ៉ក និងជាអតីតស្វាមីរបស់លោកស្រី Huma Abedin ទីប្រឹក្សាបម្រើការឲ្យលោកស្រីគ្លីនតុន។ FBI យល់ឃើញថា ដើម្បីអាចដឹងព័ត៌មានបន្ថែមលើលោក Anthony Weiner គេត្រូវការស៊ើបអង្កេតបន្ថែមលើអ៊ីមែលលោកស្រីគ្លីនតុន។
ទង្វើរបស់ FBI ពេលនេះបានទទួលរងគំនាប និងការរិះគន់យ៉ាងចាស់ដៃពីសំណាក់គណបក្សប្រជាធិបតេយ្យ ពិសេសលោក John Podesta និងលោក Robby Mook សហប្រធានទទួលបន្ទុកយុទ្ធនាការឃោសនាបោះឆ្នោតឲ្យលោកស្រីគ្លីនតុនដែលបានរិះគន់នាយក FBI លោក James Comey ពីបទបានប្រាប់ទៅសភាពីការដែល FBI នឹងឆែកអ៊ីមែលលោកស្រីគ្លីនតុន។ ចំណែកលោក Harry Reid ប្រធានក្រុមសមាជិកព្រឹទ្ធសភាគណបក្សប្រជាធិបតេយ្យបានចោទនាយក FBI ពីបទរំលោភច្បាប់ដោយបានប្រើតួនាទីសាធារណៈដើម្បីលូកដៃក្នុងរឿងបោះឆ្នោត។
តើការឆ្កឹះរឿងអាស្រូវអ៊ីមែលលោកស្រីគ្លីនតុនជាថ្មីពីសំណាក់ FBI ពេលនេះអាចនឹងជះឥទ្ធិពលលើយុទ្ធនាការឃោសនាបោះឆ្នោតរបស់លោកស្រីគ្លីនតុនដែរ ឬទេ?។ តិច ឬច្រើនពិតជាមាន ហើយអ្នកដែលបានឆ្លៀតចំណេញពីរឿងអាស្រូវមួយនេះ គឺគ្មាននរណាក្រៅពីគូប្រជែងលោកដូណាល់ ត្រាំពីគណបក្សសាធារណរដ្ឋទេ។ លទ្ធផលនៃការស្ទង់មតិចុងក្រោយឲ្យដឹងថា លោកស្រីគ្លីនតុនដែលធ្លាប់មានសម្លេងលើសលោកត្រាំពី ៧ ដល់ជាង ១០ពិន្ទុនោះ ឥឡូវនេះ លើសតែពី ២ ទៅ ៣ពិន្ទុប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ