តើលោកដូណាល់ ត្រាំ អាចខ្ទាតពីតំណែងប្រធានាធិបតីអាមេរិកដែរទេ?
ចុះផ្សាយនៅថ្ងៃ៖
ស្តាប់ - ០៤:៣០
រឿងអាស្រូវរបស់ប្រធានាធិបតីអាមេរិក ដូណាល់ ត្រាំ ហាក់កើតមានមិនចេះចប់ ពីមួយថ្ងៃទៅមួយថ្ងៃ។ រឿងអាស្រូវចុងក្រោយ ទាក់ទងការចោទប្រកាន់ថាលោកត្រាំសុំនាយកFBI អោយបញ្ចប់ការស៊ើបអង្កេតលើអតីតទីប្រឹក្សាសន្តិសុខជាតិ Michael Flynn ធ្វើអោយទាំងបក្សកាន់អំណាច ទាំងបក្សប្រឆាំងពិបាកនឹងទទួលយកបាន។ សាធារណជនតាមបណ្តាញសង្គមកំពុងចោទសួរថា តើគេអាចទំលាក់លោកត្រាំពីតំណែងដែរទេ?
ពីមួយថ្ងៃទៅមួយថ្ងៃ រឿងអាស្រូវរបស់លោកដូណាល់ ត្រាំ ហាក់មានមិនចេះចប់ ធ្វើអោយគេមើលឃើញថា ប្រធានាធិបតីអាមេរិកកាន់តែផ្តេសផ្តាស មិនសមជាអ្នកដឹកនាំគួរទុកចិត្ត។ ជាក់ស្តែង ទាក់ទងការទំលាក់លោកចេម ខមី James Comey ជានាយកFBI ពីតំណែង កាលពីសប្តាហ៍មុន ត្រូវបានលោកដូណាល់ ត្រាំ ប្តូរចម្លើយចុះឡើង។ ម្តងសេតវិមានថា លោកទំលាក់នាយកអេហ្វប៊ីអាយ ខមី ដោយសារលោកត្រាំ បានទទួលអនុសាសន៍ពីក្រសួងយុត្តិធម៌ ថាលោកខមី ធ្វើការមិនល្អ ម្តងទៀតថា លោកត្រាំចង់ដកលោកខមី តាំងពីលោកឡើងកាន់អំណាចម្ល៉េះ។
លោកត្រាំខ្លួនឯងទៀត បន្ថែមល្បោយថា ទោះជាគ្មានអនុសាសន៍នេះ ក៏លោកដកតំណែងនាយក FBI ដែរ។ ពេលគេសង្ស័យថា លោកត្រាំដកលោកខមី ពី FBI ដោយសារតែ FBI ស៊ើបអង្កេតសង្ស័យថា ក្រុមលោកអាចពាក់ព័ន្ធជាមួយនឹងរុស្ស៊ី។ លោកត្រាំរឹតតែធ្វើអោយគេសង្ស័យដូច្នេះទៅទៀត ព្រោះលោកបានប្រាប់ថា លោកធ្លាប់សួរលោកខមី ដល់ទៅ៣ដង ថាតើលោកខ្លួនលោកនេះ មានជាប់ក្នុងការស៊ើបអង្កេតថា ពាក់ព័ន្ធជាមួយរុស្ស៊ីទេ។ លើសពីនេះទៀត លោកបានលើកឡើងថា ពេលលោកគិតថា លោកដកតំណែងលោកខមីនោះ លោកកំពុងគិតពីពាក្យថា ទំនាក់ទំនងជាមួយរុស្ស៊ីហ្នឹងហើយ។
រឿងអាស្រូវទាក់ទងដកតំណែងនាយក FBI មិនទាន់ចប់ផង ក៏ផ្ទុះរឿងមួយទៀត គឺកាសែតវ៉ាស៊ីនតោន ប៉ុស្តិ៍ បានចុះផ្សាយថា លោកត្រាំផ្តល់ព័ត៌មានសំងាត់អោយរុស្ស៊ី ជាព័ត៌មានទាក់ទងនឹងប្រតិបត្តិការនៅអ៊ីរ៉ាក់និងស៊ីរី។ សារព័ត៌មានអាមេរិកជាច្រើនចុះផ្សាយថា ព័ត៌មានសំងាត់ទាំងនេះ ផ្តល់ដោយអ៊ីស្រាអែល ស្ថិតក្នុងក្របខណ្ឌនៃកិច្ចព្រមព្រៀងចារកិច្ចអាមេរិក-អ៊ីស្រាអែល មិនអាចអោយប្រទេសទី៣ដឹងលឺពីព័ត៌មានសំងាត់នេះបានទេ។ សេតវិមានចេញមុខបដិសេធថាលោកត្រាំ មិនបានផ្តល់ព័ត៌មានសំងាត់អោយរុស្ស៊ីទេ។ បដិសេធមែន តែលោកត្រាំវិញចេញមុខនិយាយពាក្យបញ្ជោះទៅសារព័ត៌មានវិញថា លោកមានសិទ្ធិចែករំលែកព័ត៌មានស្តីពីភេរវកម្មជាមួយរុស្ស៊ី។
រឿងអាស្រូវទាក់ទងរុស្ស៊ីផ្ទុះឡើងមិនបានប៉ុន្មានផង ម្សិលមិញ កាសែតញូវយក ថែមស៍ ចុះផ្សាយបន្ថែមរឿងមួយជាន់ទៀត។ កាសែតញូវយក ថែមស៍ ចុះផ្សាយថា កាលពីពាក់កណ្តាល ខែកុម្ភៈ ប្រធានាធីបតីអាមេរិក បានសុំអោយនាយកFBI ចេម ខមី ឈប់ស៊ើបអង្កេតអតីតទីប្រឹក្សាសន្តិសុខជាតិ ម៉ៃឃើល ភ្លីន តទៅទៀត។ ម៉ៃឃើ ភ្លីន បានបង្ខំចិត្តលាតំណែង ក្រោយសារព័ត៌មានទំលាយរឿងអាស្រូវថា លោកបាននិយាយតាមទូរសព្ទជាមួយឯកអគ្គរដ្ឋទូតរុស្ស៊ី ប្រចាំសហរដ្ឋអាមេរិក កាលពីខែធ្នូ ឆ្នាំ២០១៦ ហើយលោកប្រហែលជាបាននិយាយពីទណ្ឌកម្មអាមេរិកប្រឆាំងរុស្ស៊ី ជាមួយឯកអគ្គរដ្ឋទូតរុស្ស៊ីផងដែរ។
យោងតាមកាសែតញូវយក ថែមស៍ លោកត្រាំស៊ិះស៊ុះសុំនាយកFBI អោយឈប់ស៊ើបអង្កេតលើលោកម៉ៃឃើល ភ្លីន កាលពីថ្ងៃ១៤កុម្ភៈ ១ថ្ងៃក្រោយលោកភ្លីន លាលែងពីតំណែង។ ថ្ងៃនោះ ក្រោយចប់កិច្ចប្រជុំស្តីពីការគំរាមភេរវកម្ម លោកត្រាំបានសុំអោយអ្នកចូលរួមទាំងអស់ចេញទៅក្រៅ ហើយលោកនៅតទល់គ្នាតែ២នាក់ជាមួយលោកចេម ខមី ជានាយកFBI។
តើលោកត្រាំពិតជាសុំលោកខមី ដូច្នេះមែនទេ? បើដូច្នេះមែន គេអាចចោទលោកថា លូកដៃបង្កការរាំងស្ទះដល់ប្រព័ន្ធយុត្តិធម៌ទាំងស្រុង។ គេរឺតតែអាចនិយាយថា លោកដូណាល់ ត្រាំ និងក្រុមការងារលោក ពិតជាមានទំនាក់ទំនងជាមួយរុស្ស៊ីដូចដែលបានសង្ស័យមែនហើយ ព្រោះតាមរយៈរឿងអាស្រូវទាំងអស់រៀបរាប់មកពីខាងដើមនេះ គេមើលឃើញថា លោកដូណាល់ ត្រាំ ចង់ធ្វើអ្វីស្រេចតែចិត្តលោក ដោយមិនខ្វល់ មិនគោរពច្បាប់ទំលាប់។ លោកហ៊ានលូកដៃ ហ៊ានដាក់ឥទ្ធិពល លើការស៊ើបអង្កេត ដើម្បីអោយក្រុមអ្នកជំនិតរបស់លោក បក្សពួកលោក ចៀសផុតពីសំណាញ់ច្បាប់។
បើលោកចង់លូកដៃក្នុងការស៊ើបអង្កេតរបស់អេហ្វប៊ីអាយ ទាក់ទងការចោទប្រកាន់លើក្រុមការងារលោកមែន គេអាចធ្វើនិតិវិធីដកតំណែងលោកបាន។ សមាជិកបក្សប្រឆាំងប្រជាធិបតេយ្យមួយចំនួនគិតថា លោកត្រាំកំពុងតែដើរឆ្លងបន្ទាត់ក្រហម។ តំណាងរាស្ត្របក្សប្រឆាំងមួយចំនួនបានស្នើអោយបើកនិតិវិធីដកតំណែងលោកត្រាំ។ យោងតាមមាត្រាទី២នៃរដ្ឋធម្មនុញ្ញ គេអាចដកហូតតំណែងពិប្រធានាធិបតី អនុប្រធានាធិបតី រឺក៏មន្ត្រីរដ្ឋការ បើអ្នកទាំងនេះករណីពួកគេរងការចោទប្រកាន់ និងទទួលទោសពីបទក្បត់ជាតិ ពុករលួយ រឺក៌បទឧក្រិដ្ឋផ្សេងទៀត។ និតិវិធីដកតំណែងប្រធានាធិបតីត្រូវឆ្លងកាត់ការបោះឆ្នោតពីសភាទាំង២ ហើយអាចចំណាយពេលច្រើនខែ។
តាំងពីឆ្នាំ១៧៨៩មក មាននិតិវិធីដកតំណែងប្រធានធិបតី ៣ នៅអាមេរិក គឺប្រឆាំងនឹងលោកអាន់ឌ្រូ ចនសុន នៅបក្សប្រជាធិបតេយ្យ និងលោកប៊ីល គ្លីនតុន ប៉ុន្តែ និតិវិធីមិនដែលធ្វើដល់ចប់ចុងចប់ដើមទេ។ ប្រធានាធិបតី រីឆាត និចសុន បានលាពីតំណែង ក្នុងឆ្នាំ១៩៧៤ មុនគេចាប់ផ្តើមនិតិវិធីដកតំណែងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ