លោកត្រាំរងការចោទប្រកាន់ថា ធ្លាប់សុំនាយកFBI អោយបញ្ចប់ការអង្កេតលើអតីតទីប្រឹក្សាសន្តិសុខជាតិ
លោកដូណាល់ ត្រាំ កាន់តែធ្វើអោយគេឃើញថា លោកផ្តេសផ្តាសទៀតហើយ។ លោកទើបនឹងរងការចោទប្រកាន់ថា លោកផ្តល់ព័ត៌មានសំងាត់អោយរុស្ស៊ី ឥឡូវនេះ លោកដូណាល់ ត្រាំ រងការចោទប្រកាន់ក្នុងរឿងមួយថ្មីទៀត គឺថា លោកប្រហែលជាធ្លាប់បានសុំនាយកFBI អោយបិទបញ្ចប់សំណុំរឿងស៊ើបអង្កេតលើអតីតទីប្រឹក្សាសន្តិសុខជាតិ Michael Flynn។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ព័ត៌មានទាក់ទងការចោទប្រកាន់ថ្មីនេះ គឺចុះផ្សាយដោយសារព័ត៌មានNew York Timesញូវយក ថែមស៍ នៅល្ងាចថ្ងៃអង្គារម្សិលមិញ។ កាសែតញូវយក ថែមស៍ ចុះផ្សាយថា កាលពីពាក់កណ្តាលខែកុម្ភៈ ប្រធានាធីបតីអាមេរិក ដូណាល់ ត្រាំ បានសុំអោយលោកចេម ខមី ជានាយកFBI ដែលលោកបណ្តេញចេញពីតំណែងសប្តាហ៍មុននេះ សុំអោយលោកខមី បិទ បញ្ចប់ការស៊ើបអង្កេតលើអតីតទីប្រឹក្សាសន្តិសុខជាតិ លោក Michael Flynn។
យោងតាមកាសែតញូវយក ថែមស៍ លោកខមីបានសរសេរកត់ត្រាពីពាក្យសុំរបស់លោកដូណាល់ ត្រាំ ដែលបាននិយាយថា លោកMichael Flynn ជាមនុស្សដ៏ល្អម្នាក់ ហើយលោកសង្ឃឹមថា លោកខមីអាចបោះបង់ចោលការស៊ើបអង្កេត។ សេតវិមានបដិសេធដាច់អហង្កានឹងការចោទប្រកាន់នេះ ដោយលើកឡើងថា លោកត្រាំមិនដែលសុំនាយក FBI រឺអ្នកណាផ្សេងទៀត អោយបិទបញ្ចប់ការស៊ើបអង្កេតទេ។ លោករីឆាដ បឺរ ជាប្រធានគណៈកម្មការសភាទទួលបន្ទុកព័ត៌មានសំងាត់ លើកឡើងថា បើលោកត្រាំពិតជាបានសុំបែបនេះមែន នោះនាយកFBIច្បាស់ជាប្រាប់រឿងនេះទៅខាងសភាហើយ។
សូមរំលឹកថា អតីតទីប្រឹក្សាសន្តិសុខជាតិអាមេរិក Michael Flynn បានបង្ខំចិត្តលាលែងតំណែង កាលពីថ្ងៃ១២កុម្ភៈ ក្រោយសារព័ត៌មានអាមេរិកទំលាយរឿងរ៉ាវទាក់ទងកិច្ចសន្ទនាតាមទូរសព្ទរវាងលោក Flynn និងឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក។ ជាកិច្ចសន្ទនាធ្វើឡើងក្នុងខែធ្នូ ឆ្នាំ២០១៦ ពេលលោកអូបាម៉ានៅកាន់អំណាចនៅឡើយ។ ក្នុងពេលនិយាយតាមទូរសព្ទជាមួយឯកអគ្គរដ្ឋទូតរុស្ស៊ី លោក Flynn ប្រហែលជាបានលើកឡើងពីបញ្ហាទាក់ទងទណ្ឌកម្មអាមេរិកប្រឆាំងរុស្ស៊ី។
សូមបញ្ជាក់ថា ក្រុមលោកដូណាល់ ត្រាំកំពុងស្ថិតក្រោមការស៊ើបអង្កេតថា អាចមាន ទំនាក់ទំនងជាមួយរុស្ស៊ី។ កាលពីថ្ងៃព្រហស្បតិ៍ លោកអាន់ឌ្រូ ម៉ាក់ខាបេ ជានាយកFBI បណ្តោះអាសន្ន បានលើកឡើងថា គ្មានការប៉ុនប៉ងរាំងស្ទះដល់ការស៊ើបអង្កេត ទាក់ទងការសង្ស័យចំពោះទំនាក់ទំនងរវាងក្រុមលោកត្រាំនិងរុស្ស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ