លោកត្រាំទៅអ៊ីស្រាអែលដើម្បីផ្តល់សន្ទុះថ្មីដល់ការស្វែងរកសន្តិភាពស្រាអែល-ប៉ាឡេស្ទីន
ចុះផ្សាយនៅថ្ងៃ៖
ស្តាប់ - ០៦:៣៩
លោក ដូណាល់ ត្រាំ ត្រូវបំពេញទស្សនកិច្ចជាលើកទីមួយ នៅក្នុងប្រទេសអ៊ីស្រាអែល និងដែនដីប៉ាឡេស្ទីន។ លោកប្រធានាធិបតីបានអញ្ជើញទៅដល់ក្រុងហ្សេរ៉ុយសាឡិម ក្រុងសក្តិសិទ្ធិរបស់សាសនាគ្រិស្ត ជីហ្វ និងអ៊ីស្លាម នៅថ្ងៃចន្ទទី ២២ឧសភា២០១៧នេះ ដោយគ្រោងនឹងអញ្ជើញទៅវិហារគ្រិស្តសាសនា Saint-Sépulcre និងជញ្ជាំងឡាម៉ង់តាហ្សុង Lamentations របស់ជីហ្វ ដោយសង្ឃឹមថានឹងអាចផ្តល់សន្ទុះថ្មីដល់ការស្វែងរកសន្តិភាពឱ្យតំបន់។ លោកត្រាំត្រូវជួបនាយករដ្ឋមន្ត្រីអ៊ីស្រាអែល លោក នេតាន់យ៉ាហ៊ូ នៅរសៀលនេះ និងលោកម៉ះមូដអាប៉ាស ប្រធានអាជ្ញាធរដែនដីប៉ាឡេស្ទីននៅថ្ងៃព្រឹកស្អែក។
ដំណើរទៅដល់ហ្សេរ៉ុយសាឡិម ក្រុងកំណើតនៃសាសនាបី គ្រិស្ត ជីហ្វ និងអ៊ីស្លាម ត្រូវបានចាត់ទុកជាទស្សនកិច្ចដ៏រសើបខ្លាំង ប្រកបដោយនិម្មិត្តរូប និងខ្លឹមសារការទូតខ្លាំងណាស់។
លោកត្រាំ ត្រូវចាប់ផ្តើមទស្សនកិច្ចដោយអញ្ជើញទៅវិហារ Saint-Sépulcre របស់សាសនាគ្រិស្ត បន្ទាប់មកលោកបន្តដំណើរប្រមាណពីរបីរយម៉ែត្រ ដើម្បីទៅដល់ជញ្ជាំង Lamentations ជញ្ជាំងដ៏សក្តិសិទ្ធបំផុតរបស់ជនជាតិជីហ្វ ដែលពុំធ្លាប់មានប្រធានាធិបតីអាមេរិកកាន់អំណាចរូបណាធ្លាប់អញ្ជើញទៅដល់ឡើយ។ អ៊ីស្រាអែលបានទទូចសុំឱ្យថ្នាក់ដឹកនាំអ៊ីស្រាអែលបានជូនលោកត្រាំទៅបួងសួងនៅជញ្ជាំងឡាម៉ង់តាហ្យុងនេះដែរ។ ប៉ុន្តែត្រូវបានអាមេរិកបដិសេធ ព្រោះទីតាំងមួយនេះមានអត្ថន័យនយោបាយខ្លាំងណាស់។ ពេលនេះអ៊ីស្រាអែលនិងប៉ាឡេស្ទីនកំពុងឈ្លោះគ្នាដណ្តើមយកហ្សេរ៉ុយសាឡិមជារដ្ឋធានី ប្រសិនបើអាមេរិកព្រមឱ្យថ្នាក់ដឹកនាំអ៊ីស្រាអែលជូនទៅ នោះគេនឹងអាចបកស្រាយបានអាមេរិកទទួលស្គាល់បូរណភាពដែនដីថាជញ្ជាំងLamentations ថាជារបស់អ៊ីស្រាអែលហើយ។
ប៉ាឡេស្ទីនព្រួយ អ៊ីស្រាអែលខកចិត្តនឹងលោកត្រាំ
តាំងពីនៅជាបេក្ខជនប្រធានាធិបតីនៅឡើយ នរណាដ៏ដឹងនិងយល់យ៉ាងច្បាស់ថាលោកត្រាំ មានជំហរការពារអ៊ីស្រាអែលខ្លាំងណាស់។ នៅពេលចូលកាន់តំណែងជាប្រធានាធិបតី ជាផ្លូវការ លោក ដូណាល់ ត្រាំ ក៏បានចាប់ផ្តើមសាបព្រោះ ភ័យន្តរាយ និងភាពអាសន្ន លើប៉ាឡេស្ទីន ឱ្យអស់សង្ឃឹមថា ដំណោះស្រាយសន្តិភាពដោយបង្កើតរដ្ឋពីរអ៊ីស្រាអែល និងប៉ាឡេស្ទីនឱ្យរស់ក្បែរគ្នា រសាត់ទៅឆ្ងាយពីដៃហើយ។
ប៉ុន្តែខាងអ៊ីស្រាអែល ដែលបានទះដៃអបអរសាទរជោគជ័យរបស់លោកត្រាំ ក្នុងសម័យបោះឆ្នោតប្រធានាធិបតីអាមេរិកខ្លាំងជាងគេ និងដែលស្រមៃថាអាចបន្តធ្វើអាណានិគមកិច្ច រហូតបានក្តោបក្តាប់តំបន់ស៊ីហ្ស័កដានីរបស់ប៉ាឡេស្ទីន ក៏កំពុងតែខកចិត្តនឹងលោកត្រាំ ជាបណ្តើរៗដែរ។
ប្រជាពលរដ្ឋអ៊ីស្រាអែល កាន់តែច្រើនឡើងៗ មានអារម្មណ៍ថាលោក ត្រាំ លែងសូវ ជាអ្នកគាំទ្រអ៊ីស្រាអែល ខ្លាំង ដូចមុនទៀតហើយ។ ការខកចិត្តមានកាន់តែខ្លាំង ទាក់ទងនឹងការរុះរើស្ថានទូតអាមេរិកពីក្រុងទែលអាវីល មកក្រុងហ្សេរ៉ុយសាឡិម។ អ៊ីស្រាអែល បានទាមទារ សុំឱ្យអាមេរិកលើកស្ថានទូតមកក្រុងហ្សេរ៉ុយសាឡិម តាំងតែពីយូរយាមកហើយ ហើយលោកត្រាំ បានធ្វើការសន្យាយ៉ាងមុតមាំ ក្នុងសម័យឃោសនា។ ប៉ុន្តែពេលនេះលោកត្រាំហាក់ប្តូរចិត្តបន្តិចវិញ ថាមិនភ្លេចពាក្យសន្យានោះឡើយ ប៉ុន្តែសុំលើកពេលសិន ហើយមិនគ្រោងធ្វើសេចក្តីប្រកាសអ្វីទាក់ទងនឹងការរុះរើស្ថានទូតនេះ នៅក្នុងពេលបំពេញទស្សនកិច្ចនេះឡើយ។
លោក ត្រាំទំនងជានឹងត្រូវពន្យល់ថា ខ្លាចមានផ្ទុះអំពើហិង្សានៅតំបន់ដើមបូព៌ា និងខ្លាចបាត់បង់សំណាងក្នុងការស្វែងរកសន្តិភាព។
តើ លោកត្រាំ មានផែនការសន្តិភាពសម្រាប់អ៊ីស្រាអែលនិងប៉ាឡេស្ទីន យ៉ាងដូចម្តេច ?
លោក ដូណាល់ ត្រាំ បានសន្យា ប្រឹងឱ្យអស់ពីសមត្ថភាព ដើម្បីនាំអ៊ីស្រាអែល និងប៉ាឡេស្ទីន ឱ្យបានស្គាល់សន្តិភាព។ លោក ចង់ប្រែក្លាយបទពិសោធន៍ជាអ្នកជំនួញ ទៅជាជាអ្នកដឹកនាំរកឱ្យឃើញ “កិច្ចព្រមព្រៀងចុងក្រោយ” សម្រាប់ជម្លោះដ៏ចំណាស់ជាងគេនៅតំបន់។ ប៉ុន្តែគ្មានសញ្ញាអ្វីមួយបង្ហើបបង្ហាញអំពីផ្លូវដែលត្រូវដើរទេ។ នាឱកាសទទួលជួបលោក អាបាស ប្រធានអាជ្ញាធរប៉ាឡេស្ទីន នៅសេតវិមាន កាលពីដើមខែឧសភា លោកត្រាំ ក៏មិនបានពន្យល់ដោយច្បាស់លាស់ថាអាមេរិកមានជំហរយ៉ាងណាចំពោះដំណោះស្រាយបង្កើតរដ្ឋពីរ ដែលរដ្ឋបាលអាមេរិកមុនៗធ្លាប់ប្រកាន់យកឡើយ។
តែសម្រាប់សេតវិមាន គេមិនត្រូវរង់ចាំមើលផែនការសន្តិភាព នៅពេលនេះបានឡើយ ព្រោះរដ្ឋបាលលោកត្រាំ ទើបចូលកាន់តំណែងបានតែបួនខែប៉ុណ្ណោះ។ ប្រធានាធិបតីអាមេរិកស្វែងរកជាបឋម និង យ៉ាងសាមញ្ញ វិធីណាដែលសម្រួលឱ្យមានខិតខំប្រឹងប្រែងចរចាសន្តិភាពឡើងវិញ និងដើម្បីឱ្យភាគីទាំងពីរ ធ្វើកិច្ចសន្យានិងចាត់វិធានការប្រកបដោយទំនុកចិត្ត។
រដ្ឋបាលលោកត្រាំ កំពុងមានកិច្ចពិភាក្សាល្អជាមួយភាគីទាំងពីរហើយ ហើយនឹងបន្តសកម្មភាពនេះទៅទៀត។ លទ្ធផលវិជ្ជមានដំបូង ហាក់ដូចជាកំពុងផ្តល់ជាផ្កាផ្លែ ដោយរដ្ឋាភិបាលអ៊ីស្រាអែល បានអនុម័ត កាលពីល្ងាចថ្ងៃអាទិត្យ វិធានការមួយខ្សែដើម្បីសម្រួលដល់ជីវភាពរស់នៅរបស់ជនប៉ាឡេស្ទីន ស្របតាមសំណើរបស់លោក ត្រាំ និងមុនដំណើរមកដល់អ៊ីស្រាអែលរបស់លោកត្រាំមួយថ្ងៃ។ វិធានការដែលអាមេរិកចាត់ទុកថាជាចំណែកមួយនៃការស្តារទំនុកចិត្តគ្នាមុននឹងឈានដល់ចរចាសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ