លោកដូណាល់ត្រាំ ទទួលជួបលោក អាបាស ប្រមុខដឹកនាំប៉ាឡេស្ទីន
២ខែ បន្ទាប់ពីបានជួបជាមួយនឹងលោក ណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល លោកប្រធានាធិបតីអាមេរិក ដូណាល់ ត្រាំ នឹងទទួលជួបលោក ម៉ាមូដ អាបាស ប្រមុខដឹកនាំប៉ាឡេស្ទីន នៅសេតវិមាន នៅថ្ងៃពុធ ទី៣ឧសភានេះ។ ការទទួលជួបនឹងប្រមុខដឹកនាំប៉ាឡេស្ទីននាពេលនេះ បានបង្ហាញពីក្តីសង្ឃឹមខ្លះ ទាក់ទិននឹងគោលនយោបាយរបស់រដ្ឋាភិបាលលោកត្រាំ ក្នុងការជួយជ្រោមជ្រែង ស្វែងរកសន្តិភាព រវាងអ៊ីស្រាអែល និងប៉ាឡេស្ទីន។ សេចក្តីសង្ឃឹមដែលគេមិនបានរំពឹងទុកសោះ បើក្រលេកមើល កាលពីប៉ុន្មានខែមុននេះ ព្រោះលោកត្រាំ បានប្រកាន់គោលជំហរ មិនចង់ឲ្យប៉ាឡេស្ទីន ក្លាយជាប្រទេសឯករាជ្យទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
មុននឹងមានថ្ងៃនេះ លោក ម៉ាមូដ អាបាស បានជួបជាមួយមន្ត្រីធំៗ របស់រដ្ឋាភិបាលអាមេរិកថ្មី ច្រើននាក់មកហើយ នៅតំបន់ Ramallah ដូចជាបានជួបលោកប្រធាន CIA និងអ្នកតំណាងពិសេសរបស់លោក ដូណាល់ ត្រាំ។ ឆ្លងកាត់ជំនួបទាំងនេះ លោក អាបាស បានអះអាងថា រដ្ឋាភិបាលរបស់លោកដូណាល់ ត្រាំ ខុសពីអ្វីដែលគាត់ធ្លាប់គិត គឺរដ្ឋាភិបាលនេះ បានសំដែងពីការយកចិត្តទុកដាក់ មកលើការប្រឹងប្រែងស្វែងរកសន្តិភាព រវាងអ៊ីស្រាអែល និងប៉ាឡេស្ទីន។
ជាការពិត កន្លងមកគ្រប់គ្នាតែងតែបារម្ភ ព្រោះលោកដូណាល់ ត្រាំ ធ្លាប់បានប្រកាន់គោលជំហរតឹងតែង នឹងលំអៀងខ្លាំង ទៅខាងអ៊ីស្រាអែល ដោយបានច្រានចោល សំណើរបស់សហគមអន្តរជាតិ ដែលពួកគេលើកឡើងថា ដំណោះស្រាយសន្តិភាពយូរអង្វែង រវាងអ៊ីស្រាអែល និងប៉ាឡេស្ទីន មានតែមួយគត់ គឺត្រូវទទួលស្គាល់ប៉ាឡេស្ទីន ជាប្រទេសឯករាជ្យ ស្មើភាពគ្នា នឹងអ៊ីស្រាអែល។
ជាការកត់សម្គាល់ លោកដូណាល់ ត្រាំ ហាក់បានកែប្រែគោលជំហរ ភាគច្រើន ក្នុងសំណុំរឿងកិច្ចការអន្តរជាតិ ខុសគ្នា ពីអ្វីដែលគាត់ធ្លាប់បានស្រែកសន្យា ក្នុងពេលឃោសនាបោះឆ្នោត។ អ្នកវិភាគជាច្រើន បានយល់ថា គ្រាន់តែលោកដូណាល់ ត្រាំ អញ្ជើញ ប្រមុខដឹកនាំដែនដីប៉ាឡេស្ទីនទៅជួបនៅសេតវិមាន នាពេលនេះ គឺវាជាសញ្ញាល្អណាស់ទៅហើយ។ ទោះបីលោកត្រាំ ធ្លាប់បានច្រានចោលដំណោះស្រាយ ទទួលស្គាល់ប៉ាឡេស្ទីន ជាប្រទេសឯករាជ្យ តែលោកត្រាំ ធ្លាប់បានក្រើនរំឮកលោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល កាលពីពេលជួបគ្នា ថាត្រូវតែបញ្ឈប់សកម្មភាពវាទទី យកដីប៉ាឡេស្ទីនតទៅទៀត។
តែយ៉ាងណា ក្នុងឱកាសជំនួបរវាងលោកត្រាំ និងលោកអាបាសថ្ងៃនេះ គេមិនរំពឹងថានឹងបានលទ្ធផលធំដុំឡើយ។ ជាក់ស្តែង គ្មាននរណាដឹងថា លោកដូណាល់ ត្រាំ មានបំណងចង់ស្នើដំណោះស្រាយបែបណា នោះទេ។ លោកត្រាំ គ្រាន់តែបាននិយាយអះអាងប្រាប់អ្នកកាសែត កាលពីសប្តាហ៍មុនថា វាគ្មានហេតុផលអ្វី ដែលអ៊ីស្រាអែល និងប៉ាឡេស្ទីន មិនអាចមានសន្តិភាពនឹងគ្នានោះទេ!
សំណុំរឿងអ៊ីស្រាអែល ប៉ាឡេស្ទីន គឺជារឿងស្មុគស្មាញបំផុត។ លោកបារ៉ាក់ អូបាម៉ា ដែលធ្លាប់ផ្តល់ក្តីសង្ឃឹម ក៏បានជួបបរាជ័យក្នុងរឿងនេះដែរ។ ការទទួលស្គាល់ប៉ាឡេស្ទីន ជាប្រទេសឯករាជ្យ គឺមានន័យថា នឹងត្រូវត្រលប់ទៅរកព្រំដែនដែលមានមុនឆ្នាំ១៩៦៧ ហើយបិទបញ្ចប់ការដាក់អណានិគមរបស់អ៊ីស្រាអែល នៅតំបន់ស៊ីហ្សកដានី តំបន់ហ្កាហ្សា និងហ្សេរូសាឡឹមខាងកើត។ មួយវិញទៀត ការខ្វែងគំនិតគ្នា រវាងអាជ្ញាធរកណ្តាលប៉ាឡេស្ទីន និងក្រុមហាម៉ាស ដែលគ្រប់គ្រងតំបន់ហ្កាហ្សា ក៏អាចជាឧបសគ្គ ដល់ការប្រឹងប្រែងរបស់លោក ម៉ាមូដ អាបាសដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ