តើលោកដូណាល់ ត្រាំកំពុងជំរុញឲ្យមានការផ្លាស់ប្តូរមេដឹកនាំនៅវ៉េណេស៊ុយអេឡា?
ចុះផ្សាយនៅថ្ងៃ៖
ស្តាប់ - ០៧:៣១
នៅប្រទេសវេណេស៊ុយអេឡាវិបត្តិ បានធ្លាក់ចុះធ្ងន់ធ្ងរ មួយកម្រិតទៀត នៅពេលមនុស្សពីររូបបានប្រកាសតាំងខ្លួនជាប្រធានាធិបតីស្របច្បាប់របស់វេណេស៊ុយអេឡា។ នៅថ្ងៃពុធទី ២៣ មករា នៅក្នុងមហាបាតុកម្មប្រឆាំងរដ្ឋាភិបាលរបស់លោកប្រធានាធិបតី នីកូឡា ម៉ាឌូរ៉ូ នៅរដ្ឋធានី ការ៉ាកាស លោក ហ័ន ហ្កាយដូ ប្រធានសភា ដែលគ្រប់គ្រងដោយគណបក្សប្រឆាំងបាន ប្រកាសចាត់ទុកខ្លួនឯង ជាប្រធានាធិបតីស្តីទី និងសន្យារៀបចំការបោះឆ្នោតដោយសេរី នៅក្នុងពេលឆាប់ៗខាងមុខ។ សហរដ្ឋអាមេរិក រួមទាំងក្រុមប្រទេសនៅអាមេរិកខាងត្បូង និងនៅតំបន់ការ៉ាអ៊ីប បានប្រកាស គាំទ្រ និងទទួលស្គាល់ ប្រធានសភា មកពីគណបក្សប្រឆាំង ថា ជាប្រធានាធិបតីថ្មីរបស់វេណេស៊ុយអេឡា។ តើស្ថានការណ៍នយោបាយនៅវេណេស៊ុយអេឡានឹងវិវឌ្ឍន៍ទៅយ៉ាងណា នៅក្រោយ ការប្រកាសអន្តរាគមន៍របស់សហរដ្ឋអាមេរិក?
នៅវ៉េណេស៊ុយអេឡា នៅក្នុងមហាបាតុកម្ម ប្រឆាំងរដ្ឋាភិបាលរបស់លោកប្រធានាធិបតី នីកូឡា ម៉ាឌូរ៉ូ កាលពីថ្ងៃពុធម្សិលមិញ លោក ហ័ន ហ្កាយដូ ប្រធានរដ្ឋសភា ដែលគ្រប់គ្រងដោយគណបក្សប្រឆាំង បានប្រកាសតាំងខ្លួន ជាប្រធានាធិបតីស្តីទី របស់វេណេស៊ុយអេឡា។
នៅចំពោះមុខអ្នកគាំទ្ររាប់ពាន់នាក់ ដែលបានចូលរួមក្នុងមហាបាតុកម្មប្រឆាំងរដ្ឋាភិបាលកាលពីថ្ងៃម្សិលមិញ នៅទីក្រុងការ៉ាកាស លោកហ័ន ហ្កាយដូ បានលើកដៃស្បថធ្វើជាប្រធានាធិបតី ស្តីទីរបស់វេណេស៊ុយអេឡា។ លោកហ្កាយដូបាននិយាយថា ទៅតាមរដ្ឋធម្មនុញ្ញវ៉េណេស៊ុយអេឡា ក្នុងនាមលោកជាប្រធានរដ្ឋសភា គឺលោកមានសិទ្ធិធ្វើជាប្រធានាធិបតី ស្តីទី ដើម្បីដឹកនាំរដ្ឋាភិបាលអន្តរកាល សម្រាប់រៀបចំការបោះឆ្នោត តាមលទ្ធិប្រជាធិបតេយ្យមួយ។
នៅប៉ុន្មាននាទីក្រោយការប្រកាសរបស់ហ្កាយដូ សហរដ្ឋអាមេរិក និងប្រទេសនៅអាមេរិកខាងត្បូង៧ទៀត ដែលធ្លាប់ជាគូសត្រូវរបស់លោកប្រធានាធិបតីនីកូឡា ម៉ាឌូរ៉ូ បានចេញមុខ គាំទ្រ និងទទួលស្គាល់ភ្លាមៗ។ នៅក្នុងសេចក្តីថ្លែងការណ៍របស់សេតវិមាន នៅថ្ងៃម្សិលមិញ រដ្ឋបាលលោកដូណាល់ ត្រាំ បានប្រកាសទទួលស្គាល់លោកហ្កាយដូ ជាប្រធានាធិបតីស្របច្បាប់ របស់វេណេស៊ុយអេឡា និងបានព្រមាន ថា អាមេរិកនឹងលូកដៃអន្តរាគមន៍ ប្រើគ្រប់មធ្យោបាយ បើសិន រដ្ឋអំណាចរបស់លោកម៉ាឌូរ៉ូ ប្រើកម្លាំងយោធា ដើម្បី បង្រ្កាបដ៏ហិង្សាទៅលើប្រជាជនដែល ធ្វើបាតុកម្មប្រឆាំងរដ្ឋាភិបាល។
អ្នកជំនាញវាយតម្លៃថា ដោយប្រកាសទទួលស្គាល់ប្រធានរដ្ឋសភា មកពីក្រុមបក្សប្រឆាំងថា ជាប្រធានាធិបតីស្របច្បាប់របស់វេណេស៊ុយអេឡា រដ្ឋបាលលោកដូណាល់ ត្រាំ អាមេរិកចង់ចាប់បង្ខំ ដាក់សម្ពាធ ទាំងទៅលើរដ្ឋអំណាចរបស់លោកនីកូឡា ម៉ាឌូរ៉ូ ហើយនិងកងទ័ពរបស់វ៉េណេស៊ុយអេឡា។ អាមេរិកដែលជាគូសត្រូវរបស់មេដឹកនាំវ៉េណេស៊ុយអេឡា តាំងពីសម័យដឹកនាំរបស់លោកChavez ម្ល៉េះ អាចនឹងឆ្លៀតឱកាសយកវិបតិ្តនយោបាយលើកនេះ ដើម្បី ជំរុញឲ្យមានការផ្លាស់ប្តូរ មេដឹកនាំ នៅវ៉េណេស៊ុយអេឡា។
នៅថ្ងៃពុធ ម្សិលមិញ នៅក្រោយអាមេរិកប្រកាសទទួលស្គាល់លោកហ្កាយដូ ជាប្រធានាធិបតីស្របច្បាប់របស់វ៉េណេស៊ុយអេឡា លោកម៉ាឌូរ៉ូបានប្រកាសកាត់ផ្តាច់នយោបាយការទូតជាមួយអាមេរិក និងបានប្រកាសបណ្តេញមន្រ្តីទូតអាមេរិកទាំងអស់ឲ្យចាកចេញពី ទឹកដីវ៉េណេស៊ុយអេឡា ក្នុងរយៈពេល ៣ថ្ងៃ។ លោកម៉ាឌូរ៉ូបានអំពាវនាវផងដែរឲ្យអ្នកគាំទ្ររបស់លោកចុះថ្នល់ធ្វើបាតុកម្មប្រឆាំងនឹងអន្តរាគមន៍ របស់ក្រុមចក្រពត្តិដែលចង់ធ្វើរដ្ឋប្រហារដណ្តើមអំណាចនៅវ៉េណេស៊ុយអេឡា។ សម្រាប់លោកម៉ាឌូរ៉ូ ប្រធានរដ្ឋសភា ហ្កាយដូ ជាអាយ៉ងយ៉ាងច្បាស់របស់អាមេរិក។
ប៉ុន្តែ រដ្ឋមន្រ្តីការបរទេសអាមេរិក លោកMike Pompeo បានបដិសេធ មិនដកមន្រ្តីទូតអាមេរិកចេញពីទឹកដីរបស់វ៉េណេស៊ុយអេឡា តាមការបញ្ជារបស់លោកប្រធានាធិបតី នីកូឡា ម៉ាឌូរ៉ូ ទេ ព្រោះលោកម៉ាឌូរ៉ូ មិនមែនជាប្រធានាធិបតីវ៉េណេស៊ុយអេឡា ដែលអាមេរិកទទួលស្គាល់។
លោកដូណាល់ ត្រាំ៖ គ្មានអន្តរាគមន៍យោធាអាមេរិកនៅវ៉េណេស៊ុយអេឡា
ឆ្លើយនឹងសំណួររបស់អ្នកកាសែត លោកដូណាល់ ត្រាំ បានបញ្ជាក់នៅថ្ងៃពុធម្សិលមិញថា អាមេរិកនឹងមិនធ្វើអន្តរាគមន៍ទ័ព នៅវ៉េណេស៊ុយអេឡាទេ។ ប៉ុន្តែ យ៉ាងណាក៏ដោយ អាមេរិកនៅមានជម្រើសផ្សេងទៀតនៅលើតុ។ នេះបើតាមមន្រ្តីសេតវិមាន។
គេវាយតម្លៃថា អាមេរិកអាចដាក់សម្ពាធលើរដ្ឋាភិបាលរបស់លោកម៉ាឌូរ៉ូ តាមរយៈ ការដាក់ទណ្ឌកម្មសេដ្ឋកិច្ច លើវិស័យប្រេង ឬបង្កកទ្រព្យសម្បត្តិរបស់មន្រ្តីរដ្ឋាភិបាលម៉ាឌូរ៉ូ ដែលរហូតមកដល់ពេលនេះ នៅរួចផុតពីទណ្ឌកម្មរបស់អាមេរិកនៅឡើយ។ អាមេរិកនឹងអាចប្រើមធ្យោបាយទាំងអស់នេះ ដើម្បីធ្វើយ៉ាងណាដាក់សម្ពាធខ្លាំង រហូតដល់ក្រុមកងទ័ពអាចសម្រេចចិត្តដោះដៃចោល លោក ម៉ាឌូរ៉ូ។ លោកម៉ាឌូរ៉ូ ដែលអាចចុះចេញពីអំណាច ដោយសារតែសម្ពាធរបស់មហាជនផង និងដោយសារតែគ្មានការគាំទ្ររបស់កងទ័ពដែរនោះ។
លោកហ្កាយដូ បានការទទួលស្គាល់ពីប្រទេសមហាអំណាច ដូចជាអាមេរិក និងប្រទេសជិតខាងក្នុងតំបន់ផ្សេងទៀត លើកលែងតែ ម៉ិចស៊ិក គុយបា និងបូលីវី ដែលដឹកនាំដោយគណបក្សសង្គមនិយម និងដែលគាំទ្រទទួលស្គាល់លោកម៉ាឌូរ៉ូ។ ចំណែកទីក្រុងម៉ូស្គូវិញ នៅថ្ងៃនេះ បានចេញមុខរិះគន់ អាមេរិក ដែលកំពុងលូកដៃ ចង់ដណ្តើមអំណាចនៅវ៉េណេស៊ុយអេឡា។ ខុសពីអាមេរិក និងរុស្ស៊ី ដែលចេញមុខការពារក្រុមម្ខាងៗ សហភាពអឺរ៉ុបបានទាមទារឲ្យមានការបោះឆ្នោតសេរី ដើម្បីបង្កើតរដ្ឋាភិបាល ថ្មីមួយ ដែលអាចមានសមត្ថភាពដោះស្រាយវិបត្តិសេដ្ឋកិច្ចរបស់វ៉េណេស៊ុយអេឡានៅពេលនេះ។
លោកហ្កាយដូអំពាវនាវរកការគាំទ្រពីកងទ័ព
ឆ្លៀតឱកាសដែលប្រទេស កំពុងជួបវិបត្តិសេដ្ឋកិច្ច លោកហ័ន ហ្កាយដូ សង្ឃឹមទាក់ទាញ ការគាំទ្រពីប្រជាជនក្រីក្រ វ៉េណេស៊ុយអេឡា ដែលកំពុងមិនពេញចិត្តនឹងនយោបាយដឹកនាំរបស់លោកម៉ាឌូរ៉ូ ដើម្បី ធ្វើបាតុកម្ម ទាមទារឲ្យលោកម៉ាឌូរ៉ូចុះចេញពីអំណាច។ កម្លាំងគាំទ្ររបស់មហាជនវ៉េណេស៊ុយអេឡាតែមួយមុខមិនគ្រប់គ្រាន់ទេ ព្រោះលោកម៉ាឌូរ៉ូ ប្រធានាធិបតីសង្គមនិយម ក៏មានប្រជាជន គាំទ្រលោកច្រើនណាស់ដែរ។
អ្វីដែលកំពុងតាមដានមើលនៅពេលនេះ គឺ ជំហររបស់យោធាវ៉េណេស៊ុយអេឡា ដែលនឹងសម្រេចថា តើត្រូវដើរតាមផ្លូវណា? តើយោធានៅតែស្មោះស្ម័គ្រនឹងលោកប្រធានាធិបតី ម៉ាឌូរ៉ូ ឬក៏ងាកទៅចូលរួមជាមួយមហាជន ដែលគាំទ្រលោក ហ្កាយដូ ដែលប្រទេសមហាអំណាចទទួលស្គាល់ជាប្រធានាធិបតីស្របច្បាប់របស់វ៉េណេស៊ុយអេឡា ?
លោកហ្កាយដូ ដែលត្រូវការជំនួយពីក្រុមយោធាវ៉េណេស៊ុយអេឡាបានប្រកាសសន្យាផ្តល់ការលើកលែងទោសដល់ទាហានណា ដែលចេញមុខ ប្រឆាំងលោកនីកូឡា ម៉ាឌូរ៉ូ។ គេមិនដឹងថា តើនឹងមានទាហានប៉ុន្មាននាក់ដែលយល់ព្រមចុះចូលជាមួយក្រុមប្រឆាំងរបស់លោកហ្កាយដូនោះទេ។ ប៉ុន្តែ យ៉ាងណាក៏ដោយ ប្រមុខដឹកនាំកងទ័ពរបស់វ៉េណេស៊ុយអេឡា បានប្រកាសរួចហើយ ថ្កោលទោស លោកហ្កាយដូដែលប្រកាសចាត់ទុកខ្លួនឯងជាប្រធានាធិបតីវ៉េណេស៊ុយអេឡាយ៉ាងដូច្នេះ។
គេវាយតម្លៃថា លោកនីកូឡា ម៉ាឌូរ៉ូ ដើម្បី រក្សាអំណាចរបស់ខ្លួន ឲ្យគង់វង្ស បានទិញទឹកចិត្តក្រុមយោធាវ៉េណេស៊ុយអេឡា តាមរយៈ ការផ្តល់តំណែងខ្ពស់ក្នុងរដ្ឋាភិបាល ឬ ផ្តល់គម្រោងវិនិយោគបូមប្រេងជាច្រើនកន្លែងឲ្យក្រុមយោធាវេណេស៊ុយអេឡាកាន់កាប់ជាដើម។ ដោយសារតែអំណោយ របស់លោកម៉ាឌូរ៉ូ មេទាហានគ្រាក់ៗ ទំនងជានឹងនៅស្មោះស្ម័គ្រ ការពារអំណាចរបស់លោកម៉ាឌូរ៉ូតទៅទៀត ប៉ុន្តែ នៅជួរថ្នាក់ក្រោមវិញ គេត្រូវរង់ចាំមើលតទៅទៀត ថា តើកូនទាហានដែលគ្មានប្រាក់ខែគ្រប់គ្រាន់ អាចនឹងចូលរួម ងើបបំរះ ជាមួយក្រុមប្រឆាំងដែរឬទេ ជាពិសេស នៅពេលដែក្រុមប្រឆាំង កំពុងបានការគាំទ្រពីប្រទេសលោកខាងលិច ដឹកនាំដោយអាមេរិកយ៉ាងដូច្នេះ។
តើលោកហ័ន ហ្កាយដូ ជាអ្នកណា ?
នៅប៉ុន្មានខែមុនសោះ គេមិនដែលស្គាល់ឈ្មោះ លោកហ័ន ហ្កាយដូទាល់តែសោះ។ ថ្ងៃទី ៥មករា ដើមឆ្នាំនេះ ក្រុមគណបក្សប្រឆាំង ដែលមានសំលេងភាគច្រើននៅរដ្ឋសភា ទើបបានជ្រើសតាំងលោកហ័ន ហ្កាយដូ ឲ្យធ្វើជាប្រធានរដ្ឋសភា។ អាយុ ៣៥ឆ្នាំ លោកហ័ន ហ្កាយដូ ដែលមានជំនាញជាវិស្វករ និងធ្លាប់ចូលរួមក្នុងបាតុកម្មប្រឆាំងរដ្ឋាភិបាលសង្គមនិយម របស់លោកChavez បានក្លាយជាប្រធានរដ្ឋសភា ដ៏វ័យក្មេងជាងគេបំផុត នៅវ៉េណេស៊ុយអេឡា។ នៅថ្ងៃទី ១១មករា គឺមួយថ្ងៃបន្ទាប់ពីលោកនីកូឡា ម៉ាឌូរ៉ូស្បថចូលកាន់តំណែងប្រធានាធិបតី សម្រាប់អាណត្តិទី២ លោកហ័ន ហ្កាយដូ បានចាត់ទុកលោកម៉ាឌូរ៉ូជាប្រធានាធិបតីមិនស្របច្បាប់ និងបានអះអាងថា លោកបានត្រៀមខ្លួន រួចហើយ សម្រាប់ដឹកនាំរដ្ឋាភិបាលវេណេស៊ុយអេឡា អន្តរកាលមួយ។
នៅ២ថ្ងៃក្រោយប្រកាសយ៉ាងដូច្នេះ លោកហ័ន ហ្កាយដូ ត្រូវបានទាហានវ៉េណេស៊ុយអេឡា ចាប់ខ្លួន មុននឹងដោះលែងមកវិញ នៅថ្ងៃដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ