Apec អនុម័តផែនទីចង្អុលផ្លូវសម្រាប់បង្កើតគម្រោងដោះដូរសេរីតំបន់អាស៊ីប៉ាស៊ីហ្វិក
ចុះផ្សាយនៅថ្ងៃ៖
ស្តាប់ - ០៦:០៨
បន្ទាប់ពីជំនួបជាលក្ខណៈទ្វេភាគី នៅថ្ងៃអង្គារទី ១១វិច្ឆិកា ២០១៤នេះ ដែលជាថ្ងៃទីពីរ និងថ្ងៃបិទបញ្ចប់ជំនួបកំពូល ប្រមុខដឹកនាំប្រទេសជាសមាជិក APEC ត្រូវជួបប្រជុំរួមគ្នាម្តង នៅទីក្រុងប៉េកាំង។ ជំនួបកំពូលដែលបានសម្រេចអនុម័តលើផែនទីចង្អុលផ្លូវមួយ គ្រោងឱ្យមានការបង្កើតតំបន់ដោះដូរសេរី ស្នើឡើងនិងការពារដោយចិន។ មិនតែប៉ុណ្ណោះ ចិនថែមទាំងបានរកឃើញកិច្ចព្រមព្រៀង ក្រៅក្របខ័ណ្ឌជំនួបកំពូលAPEC ជាមួយសហរដ្ឋអាមេរិក ស្តីពីការលើកពន្ធគយលើផលិតផលបច្ចេកវិទ្យាជាន់ខ្ពស់។
ប្រធានាធិបតីអាមេរិក បារ៉ាក់ អូបាម៉ា សមភាគីចិន លោក ស៊ីជិនពីង និងនាយករដ្ឋមន្ត្រីជប៉ុន ស៊ីនហ្សូ អាបេ សុទ្ធសឹងជាមេដឹកនាំប្រទេស កំពូលៗទាំងបីនៅលើពិភពលោក និងប្រចាំតំបន់អាស៊ីប៉ាស៊ីហ្វិក បានមកជួបប្រជុំគ្នានៅទីក្រុងប៉េកាំង ថ្ងៃនេះ។ ក្នុងសុន្ទរកថា គេសង្កេតឃើញថាលោក បារ៉ាក់អូបាម៉ា កំពុងបើកប្រតិបត្តិការចែចង់ ទៅកាន់ប្រទេសជាសមាជិក២០ប្រទេសផ្សេងទៀត ដោយមិនភ្លេចប្រធានបទរសើបវាយប្រហារចិន។
ក្រោមស្នូរទះដៃអបអរ នៅថ្ងៃចន្ទម្សិលមិញ លោកអូបាម៉ាបានប្រកាសថាអាមេរិកជាជាតិមួយនៃតំបន់ប៉ាស៊ីហ្វិក ! អនាគត សន្តិសុខ ភាពសម្បូរសប្បាយរបស់អាមេរិក មិនអាចកាត់ផ្តាច់ពីអាស៊ីបានឡើយ ! តំណាងឱ្យជិត៦០%នៃភាពមានបានរបស់ពិភពលោក និងប្រជាជនជាងបីពាន់លាននាក់ អាស៊ីគឺជាឱកាសដ៏ប្រសើរបំផុតសម្រាប់បង្កើតការងារនៅសហរដ្ឋអាមេរិក ហេតុដូច្នេះហើយបានជាលោកអូបាម៉ា មិនអាចមើលស្រាលជាតិសាសន៍ម្តុំនេះបានឡើយ និងបានជ្រើសរើសជាពិសេសយកចិនមកធ្វើដៃគូ។ ព្រោះបើចិននិងអាមេរិកធ្វើការរួមគ្នា នោះផលចំណេញនឹងបានដល់ពិភពលោកទាំងមូល។ ហើយនៅចុងបញ្ចប់សុន្ទរកថាទើបគេឃើញ លោកអូបាម៉ា លើកឡើងពីប្រធានបទដ៏រសើបខ្លាំងនៅចិន ! លោកអូបាម៉ា បានអំពាវនាវឱ្យប៉េកាំងគោរពសិទ្ធិមនុស្ស និងសេរីភាពសារព័ត៌មាន។
ចំណែកខាងចិនវិញ នៅថ្ងៃទីមួយនៃជំនួបកំពូល ទំនាក់ទំនងចិនជប៉ុនដែលត្រជាក់រឹងស្តូកអស់ជាងជិតបីឆ្នាំ បានឈានដល់ការបើកជំនួបទ្វេភាគី ប៉េកាំង-តូក្យូ។ ផ្ទៃមេឃក៏ស្រឡះ ពណ៌ខៀវដូចសន្យាមែន។ ដោយហេតុតែវិធានការដ៏តឹងតែងមិនធ្លាប់មាន ផ្សែងពុលស្រាប់តែបាត់អស់ពីផ្ទៃមេឃក្រុងប៉េកាំង ក្នុងពេលតែមួយប៉ប្រិចភ្នែក។ លោកស៊ីជិនពីង បានដឹកនាំបើកជំនួបកំពូលថ្នាក់អន្តរជាតិជាលើកទីមួយ គិតចាប់ពីលោកឡើងកាន់តំណែងជាប្រធានាធិបតីចិនមក ប្រកបដោយជោគជ័យ។ នៅថ្ងៃនេះទៀត លោកត្រូវរិះរេបញ្ចេញឱ្យស្នាដៃផ្នែកការទូតធ្វើយ៉ាងណា កុំឱ្យវិបត្តផ្សេងៗ ដូចជាភាពមិនត្រូវរ៉ូវគ្នារវាងវ៉ាស៊ីនតោននិងម៉ូស្គូ ស្តីពីបញ្ហាអ៊ុយក្រែន ឬ រវាងអូស្ត្រាលីនិងរុស្ស៊ី ស្តីពីការធ្លាក់យន្តហោះMH១៧ មកប្រលូកប្រលាក់នឹងជំនួបAPECបាន។ នេះជាឱកាសដែលប្រធានាធិបតីចិន ត្រូវតាំងខ្លួនធ្វើ មេកើយ ជាម្ចាស់ ដឹកនាំ តំបន់ អាស៊ី-ប៉ាស៊ីហ្វិក។
APEC អនុម័ត ផែនទីចង្អុលផ្លូវ គ្រោងបង្កើតតំបន់ផ្តោះប្តូរសេរី អាស៊ីប៉ាស៊ីហ្វិក របស់ចិន
គម្រោងបង្កើតតំបន់ផ្តោះប្តូរសេរីនៅអាស៊ីប៉ាស៊ីហ្វិក ឬហៅកាត់ថា FTAAP ដែល ជាកញ្ចក់ឆ្លុះបញ្ចាំងអំពីភាពជាមហាអំណាចរបស់ចិន ជាសំណើ និងមហិច្ឆតាពិសេសរបស់ចិន ! គម្រោងផ្តោះប្តូរពាណិជ្ជកម្មសេរីនេះមានលក្ខណៈធំទូលាយ ថ្នាក់តំបន់អាស៊ីប៉ាស៊ីហ្វិកទាំងមូល និងគ្របលើគម្រោងរបស់អាមេរិកផង។ FTAAP ត្រូវបានគេចាត់ទុកជាគម្រោងប្រជែងខ្លាំងនឹងគម្រោងដោះដូរពាណិជ្ជកម្មសេរី ឬដៃគូអន្តរ-ប៉ាស៊ីហ្វិកTPP របស់អាមេរិក ដែលមានប្រទេសចំនួន១២ចូលរួម ដូចជាជប៉ុន កាណាដា អូស្ត្រាលី តែគ្មាន ចិន។
ដូច្នេះការអនុម័តលើផែនទីចង្អុលផ្លូវសម្រាប់ឈានដល់ការបង្កើតតំបន់នេះ គឺជាដំណាក់កាលដ៏សំខាន់ និងជាប្រវត្តិសាស្ត្រតែម្តង សម្រាប់លោកស៊ីជិនពីង ព្រោះជាការបញ្ជាក់ថា ប្រទេសជាសមាជិកAPEC ព្រមព្រៀងឱ្យមានការច្របាច់បង្កើតសេដ្ឋកិច្ចថ្នាក់តំបន់។ សូមបញ្ជាក់ថាសេដ្ឋកិច្ចរបស់សមាជិកAPEC តំណាងឱ្យ៤៤%នៃការផ្តោះប្តូរពាណិជ្ជកម្មអន្តរជាតិ។
ប៉េកាំងចង់បានសេចក្តីថ្លែងការណ៍ចុងក្រោយមួយទៀត ត្រូវប្រសូតចេញពីជំនួបកំពូលថ្ងៃនេះ ទាក់ទងនឹងការសិក្សាអំពីលទ្ធភាពបង្កើត FTAAP តំបន់ផ្តោះប្តូរសេរីអាស៊ីប៉ាស៊ីហ្វិក តែអាមេរិកបង្ហាញការស្ទាក់ស្ទើរខ្លាំង។
គម្រោងបង្កើតតំបន់ដោះដូរសេរី អាស៊ីប៉ាស៊ីហ្វិករបស់ចិននេះ ធំជាងគម្រោងអាមេរិក ប៉ុន្តែធ្លាក់មកជួនចំពេលមានវិបត្តិដែនដីធ្ងន់ធ្ងរនៅសមុទ្ទចិន រវាងចិន និងប្រទេសជិតខាង ៖ ជប៉ុន វៀតណាម ហ្វីលីពីន … ប្រទេសទាំងនេះហាក់ដូចជាកំពុងបែរខ្នងយ៉ាងខ្លាំងគម្រោងពាណិជ្ជកម្មនេះ។
ប៉ុន្តែចិន ប្រហែលជាអាចរំពឹងលើក្រុមប្រទេសនៅអាមេរិកឡាទីន ដូចជាឈីលី ប៉េរ៉ូ និងម៉ិចស៊ិក។ ប្រមុខដឹកនាំប្រទេសទាំងបីនេះ ក៏មានវត្តមាននៅក្នុងជំនួបកំពូលAPEC ដែរ។ ប្រទេសបីនេះ ស្ថិតក្នុងក្រុមប្រទេសទាំង១២ ដែលអាមេរិកកំពុងចរចាបង្កើតជាដៃគូអន្តរ-ប៉ាស៊ីហ្វិក TPP។
ប្រធានាធិបតីឈីលី បានសម្តែងការគាំទ្រគម្រោងដោះដូរសេរីអាស៊ីប៉ាស៊ីហ្វិករួចហើយ ! ក្រៅអំពីការជួបប្រជុំទ្វេភាគីជាច្រើន នៅថ្ងៃចន្ទនិងអង្គារនេះ ដើម្បីទាក់ទាញវិនិយោគចិនទៅកាន់ប្រទេសរៀងៗខ្លួន និងក្រោយជំនួបកំពូលAPEC ចប់ ប្រមុខដឹកនាំប្រទេសទាំងបី នឹងបន្តទស្សនកិច្ចនៅប្រទេសចិនទៀត។ ទស្សនកិច្ចដែលទទួលស្វាគមន៍ដោយប្រធានាធិបតី ស៊ី ជិនពីង ផ្ទាល់តែម្តង។ ចិនចង់ផ្តល់សារៈសំខាន់សេដ្ឋកិច្ចដល់ប្រទេសតាមបណ្តោយមហាសមុទ្ទប៉ាស៊ីហ្វិកដូចគ្នា។ មហាអំណាចសេដ្ឋកិច្ចទីពីរលើពិភពលោក គឺជាដៃគូពាណិជ្ជកម្មលេខមួយនៅឈីលី និងលេខពីរនៅម៉ិចស៊ិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ