បក្សសម្ព័ន្ធអារ៉ាបគាំទ្រឱ្យមានមណ្ឌលហាមប្រាមការហោះហើរពីលើប្រទេសលីប៊ី
បក្សសម្ព័ន្ធអារ៉ាបនៅថ្ងៃសៅរ៍១២មីនាម្សិលមិញបានអំពាវនាវសូម ឱ្យក្រុមប្រឹក្សាសន្តិសុខអ.ស.ប.អនុញ្ញាតឱ្យបង្កើតមណ្ឌលហាមប្រាម ការហោះហើរពីលើប្រទេសលីប៊ី។រួមប្រជុំគ្នានៅទីក្រុងគែរ រដ្ឋមន្ត្រីក្រសួងការបរទេសនិងអ្នកតំណាងប្រទេសជាសមាជិក បក្សសម្ព័ន្ធអារ៉ាបបានយល់ឃើញថា របបលោក Mouammar Kadhafi បាន” បាត់បង់ធម្មានុរូបភាពរបស់ខ្លួន “ ហើយក៏បានទាំងយល់ឃើញដែរថា ចាំបាច់ត្រូវតែសហការជាមួយក្រុមប្រឹក្សាជាតិអន្តរកាលបង្កើតឡើងដោយ ពួកអ្នកប្រឆាំងលីប៊ី។
ចុះផ្សាយនៅថ្ងៃ៖
សេចក្តីរាយការណ៍ប្រែសម្រួលដោយ វីនស្តុន រតនា
សេចក្តីសំរេចចិត្តរបស់បក្សសម្ព័ន្ធអារ៉ាបបានត្រូវអ្នក ខ្លះគាំទ្រទាំងស្រុង អ្នកខ្លះទៀតសំដែងការប្រុងប្រយ័ត្ន នៅពិភពអារ៉ាប។អ្នកដែលគាំទ្រទាំងស្រុងសេចក្តីសំរេចចិត្តនេះគឺបណ្តាប្រទេសនៃតំបន់ឈូងសមុទ្រពែរ្សនិងប្រទេសជិតខាងលីប៊ីគឺអេហ្ស៊ីបនិងទុយនីស៊ី។
ប៉ុន្តែ ក៏មានអ្នកដែលបានសំដែងការប្រុងប្រយ័ត្នដូចយ៉ាងប្រទេសស៊ីរី។ដាម៉ាសយល់ឃើញថា ការបង្ខំឱ្យទទួលយកមណ្ឌលហាមប្រាមការហោះហើរពីលើប្រទេសលីប៊ីប្រហែលអាចនឹងត្រួសត្រាយផ្លូវឱ្យមានអន្តរាគមន៍យោធាបរទេសនិងនៅទីបំផុតទៅ ធ្វើឱ្យបែកខ្ចាយប្រទេសលីប៊ី។
បក្សសម្ព័ន្ធអារ៉ាបបានចៀសវាងឥរិយាបថប្រុងប្រយ័ត្ននេះ ដោយបន្ថែមឃ្លាប្រយោគមួយដែលបដិសេធទាត់ចោលអន្តរាគមន៍យោធាបរទេសជាយថាហេតុ។គឺជាគំនិតមិនច្បាស់លាស់ នៅពេលដែលគេដឹងថា ការបង្ខំឱ្យទទួលយកមណ្ឌលហាមប្រាមការហោះហើរតម្រូវឱ្យប្រើកម្លាំងជាចាំបាច់ដូចជាក្នុងករណីប្រទេសអ៊ីរ៉ាក់ជាដើម។គឺករណីអ៊ីរ៉ាក់ហ្នឹងហើយដែលច្រើនតែមានចុះនៅក្នុងគេហទំព័រអាំងទែរណេតអារ៉ាប។
ជនជាច្រើនដែលប្រើប្រាស់បណ្តាញអាំងទែរណេតយល់ឃើញថា មណ្ឌលហាមប្រាមការហោះហើរ ដើម្បីការពារពួកChiitesនិងពួកKurdesទល់នឹងលោក Saddam Hussein គឺជាជំហានទី១ដែលបាននាំទៅកាន់ការលុកលុយប្រទេសអ៊ីរ៉ាក់។មានអ្នកដែលចង់ឱ្យគោលការណ៍ចែងអំពីការហាមប្រាមការហោះហើរ ដើម្បីការពារបណ្តាជនស៊ីវិល ត្រូវលាតសន្ធឹងទៅកាន់តំបន់ដទៃទៀត ជាឩទាហរណ៍ តំបន់Darfourខាងលិចប្រទេសស៊ូដង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ