ក្រុងម៉ូស្គូ ផ្តើមអនុវត្តទណ្ឌកម្មដែល អ.ស.ប ដាក់ទល់នឹងលីប៊ី
ការនេះមានចែងក្នុងក្រិត្យ ដែលទើបចុះហត្ថលេខា ដោយលោកប្រធានាធិបតី Medvedev “ស្តីអំពីវិធានការនានា ខាងបំពេញតាមសេចក្តីសម្រេចរបស់ក្រុមប្រឹក្សាសន្តិសុខ អ.ស.ប. លេខ ១៩៧០ ចុះថ្ងៃ ២៦កុម្ភៈឆ្នាំ២០១១” ទាក់ទងនឹងការដាក់ទណ្ឌកម្មទល់នឹងរបបលោកកាដាហ្វី នៅលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
តាមដែលវិមានក្រេមឡាំង ប្រកាសឲ្យដឹង ៖ ដោយបំពេញតាមទណ្ឌកម្ម ដែលមានប្រមើលក្នុងសេចក្តីសំរេចនោះ របស់ក្រុមប្រឹក្សាសន្តិសុខអ.ស.ប. ក្រិត្យចេញដោយ ប្រមុខរដ្ឋរុស្ស៊ី ហាមគ្រប់តែស្ថាប័នរដ្ឋ សហគ្រាសឧស្សាហកម្ម ពាណិជ្ជកម្ម ហិរញ្ញវត្ថុ ដឹកជញ្ជូន ធនាគារ នីតិបុគ្គល រូបវន្តបុគ្គល ដែលស្ថិតនៅក្រោមយុត្តាធិការសហព័ន្ធរុស្ស៊ី មិនឲ្យនាំចេញពីដែនដីសហព័ន្ធរុស្ស៊ី ទៅកាន់ប្រទេសលីប៊ី ក៏ដូចជាប្រើនៅក្រៅព្រំដែនរុស្ស៊ីយន្ដហោះឬនាវាក្រោមទង់ជាតិរដ្ឋរុស្ស៊ី សំរាប់ដឹកទៅប្រទេសលីប៊ី គឺ សព្វាវុធគ្រប់ប្រភេទ ក្នុងនោះមានកាំភ្លើង គ្រាប់រំសេវ គ្រឿងផ្ទុះ សម្ភារៈយោធាសព្វបែប និងហាមមិនឲ្យលក់ទៅលីប៊ីយន្តហោះចម្បាំងនាវា ចម្បាំងរថក្រោះ ប្រព័ន្ធការពារដែនអាកាស ។ល។
សេចក្តីនៃក្រិត្យ ដែលនឹងបន្តមានសុពលភាព រហូតដល់ពេលទំរាំ មានបទបញ្ជាថ្មី ក៏ហាមមិនឲ្យផ្តល់ទៅលីប៊ី នូវសេវា បែបយ៉ាងការបង្ហាត់បង្រៀនវិជ្ជាយោធា ហាមមិនឲ្យផ្តល់ទៅនូវជំនួយបច្ចេកទេស ឬហិរញ្ញវត្ថុពាក់ព័ន្ធនឹងសកម្មភាពយោធានៅលីប៊ី។ ស្របនឹងក្រិត្យនេះ នៅលើដែនដីសហព័ន្ធរុស្ស៊ី បូកទាំងនៅតាមផែសមុទ្រ និង អាកាសយានដ្ឋាន អាជ្ញាធររុស្ស៊ីធ្វើការឆែកឆេររាល់តែទំនិញណាដែលដឹកទៅកាន់ប្រទេសលីប៊ី ក៏ដូចជាដឹកចេញមកពីប្រទេសនេះ ហើយក្នុងករណីបើឈ្មោះទំនិញនោះ ស្រាប់តែជាប់ក្នុងបញ្ជីហាមប្រាមរបស់ អ.ស.ប នោះវានឹងត្រូវរឹបអូសទុក ឬមួយត្រូវកម្ទេចចោល ឬមួយយកវាទៅស្តុកទុកសិន ដើម្បីបន្ទាប់មកប្រគល់ទៅឲ្យប្រទេសម្ចាស់ដើមរបស់វាសំរាប់កម្ទេចចោល។
ក្រិត្យផ្ទុកផ្តាក់ក្រសួងការបរទេសរុស្ស៊ី ឲ្យរាយការណ៍ អំពីវិធានការឆែកឆេរខាងលើនោះ ទៅគណៈកម្មាធិការក្រុមប្រឹក្សាសន្តិសុខ អ.ស.ប ដែលមានចាត់តាំងបង្កើតឡើងដោយសេចក្តីសម្រេចរបស់ក្រុមប្រឹក្សាសន្តិសុខ អ.ស.ប. លេខ ១៩៧០ ចុះថ្ងៃ ២៦កុម្ភៈឆ្នាំ២០១១។
ទាក់ទងនឹងបញ្ហាលក់-ទិញអាវុធនៅក្នុងលោក វិជ្ជាឋានស្រាវជ្រាវសន្តិភាពក្រុងStockholm មានឈ្មោះថា SIPRI បានលើកយកទិន្នន័យខ្លួន ពីឆ្នាំ ២០០៥ ដល់២០០៩ មកបង្ហាញដូចតទៅ៖
- ខាងទីផ្សារលក់អាវុធ នាំមុខគេ គឺស.រ.អា -៣០% ជាប់លេខ២ គឺរុស្ស៊ី -២៣% ជាប់លេខ៣ គឺ អាល្លឺម៉ង់-១១% ជាប់លេខ៤ គឺបារាំង-៨% ជាប់លេខ៥ គឺ អង់គ្លេស -៤%។
- ខាងទិញអាវុធវិញ ច្រើនជាងគេ គឺប្រទេសចិន -៩% បន្ទាប់មក គឺឥណ្ឌា - ៧% ជាប់លេខ៣ គឺ អារ៉ាប៊ីសាអ៊ូឌីត -៦% ជាប់លេខ៤ គឺកូរ៉េខាងត្បូង-៦%ដែរ ហើយ ៧២% សល់ពីនេះ គឺធ្លាក់ទៅលើរាប់សិបប្រទេសផ្សេងទៀតនៅក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ