លោកអូបាម៉ាចង់រឹតបន្តឹងគំនាបទៅលើរបបកាដាហ្វី
លោកប្រធានាធិបតីអាមេរិកាំង បារ៉ាក អូបាម៉ាខ្វល់ខ្វាយខ្លាំងណាស់នឹងសមត្ថភាពរបស់លោកកាដាហ្វី នៅក្រាញកាន់អំណាចតទៅទៀត បាននិយាយប្តេជ្ញាចិត្ត នៅថ្ងៃសុក្រម្សិលមិញ១១មីនា រឹតបន្តឹងគំនាបទៅលើរបបកាដាហ្វីនិងបានប្រកាសថា នឹងតែងតាំងអ្នកតំណាងម្នាក់ឱ្យទៅជួបពួកឩទ្ទាម។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ Jean-Louis POURTET ពីទីក្រុងវ៉ាស៊ីនតោន ប្រែសំរួលដោយ វីនស្តុន រតនា
លោកប្រធានាធិបតីអូបាម៉ាបានថ្លែងថារក្សាទុកគ្រប់តែជម្រើស ប៉ុន្តែបានរំលឹកថា ស.រ.អា.នឹងប្រព្រឹត្ត ដោយព្រមព្រៀងគ្នាជាមួយសហគមន៍អន្តរជាតិ។គាត់បានយល់ឃើញថា វិធានការចាត់រហូតមកទល់ពេលនេះដូចយ៉ាង ទណ្ឌកម្មសេដ្ឋកិច្ច ការហាមប្រាមមិនឱ្យលក់អាវុធទៅឱ្យប្រទេសលីប៊ី បានផ្តល់អានុភាពរបស់វា ហើយបន្តិចម្តងៗគំនាបរឹតកាន់តែខ្លាំងឡើងទៅលើរបបកាដាហ្វី។
ប៉ុន្តែ លោកអូបាម៉ាសំដែងការខ្វល់ខ្វាយនឹងកម្លាំងអាវុធរបស់លោកកាដាហ្វី។គាត់បានព្រមានប្រាប់ថា ពួកអ្នកដែលគាំទ្រលោកកាដាហ្វីនឹងត្រូវផ្តន្ទាទោសពីឩក្រិដ្ឋកម្មធ្វើទៅលើមនុស្សជាតិ។ដោយពុំទៅដល់ទទួលស្គាល់រដ្ឋាភិបាលពួកឩទ្ទាមដូចដែលប្រទេសបារាំងបានធ្វើ លោកអូបាម៉ាប្រាថ្នាចង់ភ្ជាប់ទំនាក់ទំនងឱ្យបានជិតដិតជាមួយពួកអ្នកបះបោរ។
“ លោកស្រីរដ្ឋមន្ត្រីក្រសួងការបរទេស Hillary Clinton នឹងជួបសន្ទនាជាមួយពួកអ្នកប្រឆាំងក្នុងប៉ុន្មានថ្ងៃខាងមុខនេះ។យើងបានសំរេចចិត្តតែងតាំងអ្នកតំណាងម្នាក់ដែលនឹងបំពេញបេសកកម្មពិសេសគឺនិយាយជាមួយពួកអ្នកប្រឆាំងនិងកំណត់របៀបដែលយើងអាចនឹងជួយពួកគេឱ្យបានប្រសើរជាងមុន។ខ្ញុំចង់បញ្ជាក់ឱ្យបានច្បាស់ថា ដើម្បីផលប្រយោជន៍ស.រ.អា.និងសំខាន់ជាងនេះទៅទៀត ដើម្បីផលប្រយោជន៍របស់ប្រជាជនលីប៊ី លោកកាដាហ្វីត្រូវតែចាកចេញទៅ “ ។
លោកបារ៉ាក អូបាម៉ាបានថ្លែងថា គេក៏ត្រូវតែរារាំងដែរកុំឱ្យកើតមានជាថ្មីឡើងវិញអ្វីៗដែលបានកើតមាននៅតំបន់BalkansឬRwanda៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ