អាហ្សង់ទីនដំឡើងសំឡេងដាក់អង់គ្លេសដោយសារជម្លោះប្រជុំកោះម៉ាលូវីន
រងើកជម្លោះដណ្តើមដីកោះរវាងអង់គ្លេស និងអាហ្សង់ទីនកំពុងចង់ឆេះឡើងវិញ។ កាលពីថ្ងៃសុក្រ រដ្ឋាភិបាលអាហ្សង់ទីនបានថ្កោលទោសសមយុទ្ធរបស់អង់គ្លេស ដែលអាហ្សង់ទីនចាត់ទុកជា សកម្មភាពរគំរាមកំហែងយោធាជាថ្មីដល់ដែនដីអាហ្សង់ទីន។ ក្រសួងការបរទេសអង់គ្លេសវិញ បានបកស្រាយទៅវិញ ថា សមយុទ្ធយោធា នៅលើប្រជុំកោះ ម៉ាលូវីន ដែលជាទឹកដីនៅឯនាយសមុទ្រអង់គ្លេស តែងតែធ្វើទៅតាមទម្លាប់ ពីរដង ក្នុងមួយឆ្នាំ។
ចុះផ្សាយនៅថ្ងៃ៖
ស្តាប់ - ០១:៣៧
សម្រាប់ក្រសួងការបរទេសអង់គ្លេស ការចោទប្រកាន់របស់អាហ្សង់ទីនធ្វើឡើងដោយគ្មានមូលដ្ឋានច្បាស់លាស់។ តាមសេចក្តីប្រកាសព័ត៌មានរបស់ក្រសួងការបរទេសអង់គ្លេស អាហ្សង់ទីនចោទអង់គ្លេសថា កំពុងបំពាក់សព្វាវុធ នុយក្លេអ៊ែរនៅលើប្រជុំកោះ ម៉ាលូវីន ដែលអាហ្សង់ទីននៅតែទាមទារចង់ធ្វើជាម្ចាស់ដែរនោះ។
កាលពីថ្ងៃសុក្រ ទីក្រុងប៊ុយណូស៊ែបានបរិហារសមយុទ្ធយោធារបស់អង់គ្លេស នៅលើប្រជុំកោះ ម៉ាលូវីនថា ជាសកម្មភាពរំលោភបំពានជាថ្មីរបស់អង់គ្លេស ទៅលើអាហ្សង់ទីន។ ក្រសួងការបរទេសអាហ្សង់ទីនបានប្រកាសថា នឹងកោះហៅឯកអគ្គរាជទូតអង់គ្លេសប្រចាំទីក្រុងប៊ុយណូស៊ែ ដើម្បីសំដែងការមិនពេញចិត្តរបស់រដ្ឋាភិបាលអាហ្សង់ទីន។
ប្រតិកម្មមិនពេញចិត្តរបស់អាហ្សង់ទីនកើតមានឡើង បន្ទាប់ពីអង់គ្លេសគ្រោងធ្វើសមយុទ្ធនៅលើប្រជុំកោះម៉ាលូវីន ពីថ្ងៃទី ១៤ ដល់ថ្ងៃទី ១៧ មេសាខាងមុខ។ ប្រជុំកោះម៉ាលូវីន ដែលស្ថិតនៅជិតទឹកដីអាហ្សង់ទីន ជាងអង់គ្លេស ត្រូវបានអង់គ្លេស គ្រប់គ្រងតាំងពីឆ្នាំ ១៨៣៣។ នៅឆ្នាំ ១៩៨២ អាហ្សង់ទីនបានប៉ុនប៉ងវាយដណ្តើមយកមកគ្រប់គ្រងវិញ ប៉ុន្តែ ការប្រយុទ្ធបង្ហូរឈាម បានធ្វើឲ្យអាហ្សង់ទីនចាញ់អង់គ្លេស យ៉ាងទ្រមខ្លួន។
ភាពតានតឹងរវាងអង់គ្លេស និងអាហ្សង់ទីននៅជុំវិញ ជម្លោះដណ្តើមប្រជុំកោះម៉ាលូវីនបានចាប់កំរើកឡើងវិញ ក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីអង់គ្លេសចាប់ផ្តើមបើកតំបន់ធ្វើអាជីវកម្មប្រេងនៅក្នុងសមុទ្រ ជិតប្រជុំកោះម៉ាលូវីន។ កាលពីដើមខែមេសា ក្នុងឱកាសប្រារព្ធខួប៣២ឆ្នាំនៃសង្រ្គាមប្រយុទ្ធគ្នាជាមួយអង់គ្លេស ដើម្បីដណ្តើមប្រជុំកោះ ម៉ាលូវីន លោកស្រីប្រធានាធិបតីអាហ្សង់ទីន Cristina Kirchner បាននិយាយថា កោះម៉ាលូវីនត្រូវបានអង្គការសម្ព័ន្ធមិត្តអូតង់ ដែលមានអង់គ្លេសជាសមាជិក ប្រើធ្វើជាមូលដ្ឋានស្តុកគ្រាប់នុយក្លេអ៊ែរ នៅតំបន់អាត្លង់ទិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ