រាត្រីទឹកឃ្មុំរវាងចិន និងសហរដ្ឋអាមេរិក កាន់តែសាបទៅៗ
លោកស៊ី ជីនពីង ត្រូវបានលោកដូណាល់ ត្រាំ ប្រធានាធិបតីអាមេរិក អញ្ជើញទៅសហរដ្ឋអាមេរិក កាលពីខែមេសាកន្លងទៅ។ ក្នុងឱកាសនោះ គេសង្កេតឃើញថ្នាក់ដឹកនាំមហាអំណាចទាំងពីរ បានសម្តែងការត្រូវរូវគ្នាច្រើន និងបានសន្យាសហការជាមួយគ្នា លើគ្រប់វិស័យ ទាំងនយោបាយការបរទេស និងសេដ្ឋកិច្ច។ ក៏ប៉ុន្តែពេលនេះ ភាពផ្អែមល្ហែមនេះ ហាក់កំពុងតែសាបរលាប ក្រោយពេល ដែលរដ្ឋាភិបាលអាមេរិក បានសម្រេចលក់អាវុធទៅឲ្យតៃវ៉ាន់ ហើយថែមទាំងបានដាក់ពិន័យធនាគារចិនមួយទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
រដ្ឋាភិបាលចិន បានជះកំហឹងដាក់សហរដ្ឋអាមេរិក តាមរយៈសំដីរបស់លោក លូ កាង អ្នកនាំពាក្យក្រសួងការបរទេសចិន។ អ្នកនាំពាក្យតំណាងរដ្ឋាភិបាលចិនរូបនេះ បានសម្តែងការមិនសុខចិត្ត ចំពោះការដែល ក្រសួងហិរញ្ញវត្ថុអាមេរិក បានសម្រេចបិទច្រកមិនឲ្យធនាគារចិនមួយ ឈ្មោះ Dandong Bank រកស៊ីនៅលើផ្សារហិរញ្ញវត្ថុអាមេរិក។
មិនត្រឹមតែប៉ុណ្ណោះ រដ្ឋាភិបាលចិន បានធ្វើការថ្កោលទោសជាឱឡាឫក ប្រឆាំងនឹងការដែលអាមេរិក បានចុះកិច្ចសន្យាលក់អាវុធ ទៅឲ្យកោះតៃវ៉ាន់ ក្នុងតំលៃ ប្រមានជា១៣០០លានដុល្លារ។ លោកលូ កាង បាននិយាយថា រដ្ឋាភិបាលចិន សង្ឃឹមថា រដ្ឋាភិបាលអាមេរិក និងកែតម្រូវកំហុងឆ្គងទាំងនេះជាបន្ទាន់ ពុំនោះទេ គឺវានឹងប៉ះពាល់ដល់ទំនាក់ទំនងល្អ រវាងប្រទេសទាំងពីរ។ អ្នកនាំពាក្យដដែលនេះ ក៏បានឆ្លៀតរិះគន់ សម្តីរបស់ក្រសួងការបរទេសអាមេរិក ដែលបាននិយាយថាព្រួយបារម្ភពីការចុះថយ នូវការគោរពសិទ្ធិសេរីភាព នៅដែនដីហុងកុង។
សូមបញ្ជាក់ថា រដ្ឋាភិបាលអាមេរិក បានដាក់ពិន័យ លើធនាគារ Dandong Bank បន្ទាប់ពីបានស្រាវជ្រាវឃើញថា ធនាគារនេះ បានលួចឃុបឃិត រកស៊ីលាងលុយក្រខ្វក់ ជាមួយនឹងរបបកូរ៉េខាងជើង។ ការផ្ទេរប្រាក់ បានមកពីការជួញដូអាវុធខុសច្បាប់ របស់កូរ៉េខាងជើង ក៏បានឆ្លងកាត់តាមធនាគារចិនមួយនេះដែរ។ ក្រៅពីនេះ រដ្ឋាភិបាលអាមេរិក ក៏បានដាក់ជនជាតិពីរនាក់ ក្នុងបញ្ជីខ្មៅ ព្រោះមានជាប់ពាក់ព័ន្ធ រកស៊ីជាមួយកូរ៉េខាងជើង។ លោក Steven Mnuchin រដ្ឋមន្ត្រីក្រសួងហិរញ្ញវត្ថុអាមេរិក បានលើកឡើងថា ទណ្ឌកម្មទាំងនេះ មិនមែនរដ្ឋាភិបាលអាមេរិក ដាក់សំដៅទៅលើរដ្ឋាភិបាលចិន។ អាមេរិក ដាក់ទណ្ឌកម្ម ដើម្បីបិទផ្លូវ នរណា ដែលរកស៊ីស៊ុំគ្រលំ ជាមួយរបបផ្តាច់ការកូរ៉េខាងជើង ព្រោះ ក្រុមហ៊ុន រឺមនុស្សទាំងនោះ បានចូលរូម ជួយកូរ៉េខាងជើង ឲ្យអភិវឌ្ឍន៍កម្មវិធីផលិតអាវុធនុយក្លេអ៊ែរ និងមីស៊ីល បាលីស្ទីក។
លោក Lam Willy សាស្ត្រាចារ្យនៅសកលវិទ្យាល័យហុងកុង បាននិយាយថា រាត្រីទឹកឃ្មុំ ភាពផ្អែមល្ហែមរវាងរដ្ឋាភិបាលកុម្មុយនីស្តិចិន និងរដ្ឋាភិបាលលោកត្រាំ បានមានធរមានតែមួយរយៈខ្លីប៉ុណ្ណោះ។ អ្វីៗកំពុងផ្លាល់ប្តូរទាំងស្រុងនាពេលនេះ។ លោកត្រាំ បានយកសំណុំរឿងតៃវ៉ាន់ មកជាមធ្យោបាយ ដើម្បីដាក់គំនៀបលើចិន ក្នុងសំណុំរឿងកូរ៉េខាងជើង។
មិនដល់៣ខែក្រោយមកផង ក្រោយពេលដែលលោកត្រាំ បានទទួលជួបលោកស៊ី ជីនពីង យ៉ាងល្អូកល្អឺននៅវិមានដ៏ស្កឹមស្កៃ ក្នុងរដ្ឋហ្ល័រីដា លោកត្រាំទើបតែបានសរសេរសារ បន្ទោសចិន ដោយត្រង់ៗ ថា “ផែនការធ្វើការជាមួយចិន រឿងកូរ៉េខាងជើង គឺគ្មានបានប្រយោជន៍ទេ!”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ