សាច់ញាតិម្នាក់ទៀត របស់ថាក់ស៊ីនត្រូវគេប្តឹងទៅតុលាការពីបទរំលោភអំណាច
ប្អូនថ្លៃប្រុសរបស់លោកថាក់ស៊ីននឹងត្រូវចូលខ្លួនទៅបង្ហាញមុខ នៅតុលាការ នៅថ្ងៃទី ១១មិថុនា ខាងមុខ បន្ទាប់ពីមានពាក្យបណ្តឹងប្រឆាំងរូបលោក ពីសំណាក់គណៈកម្មការជាតិប្រឆាំងអំពើពុករលួយ។ នេះបើតាមប្រភពពីមន្រ្តីតុលាការកំពូលថៃ ដែលបាននិយាយប្រាប់ទីភ្នាក់ងារព័ត៌មានបារាំង AFP កាលពីថ្ងៃពុធទី ១១ កុម្ភៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
របបសឹកយោធាបន្តយុទ្ធនាការបិទខ្ទប់សំលេងរបស់គ្រួសារលោកថាក់ស៊ីន។ តាមការចុះផ្សាយរបស់ទីភ្នាក់ងារព័ត៌មានបារាំង AFP ដែលបានដកស្រង់ប្រភពពីមន្រ្តីតុលាការកំពូលថៃ លោកស៊ុមឆៃ វង្សសាវ៉ាត ប្អូនថ្លៃប្រុសរបស់លោកថាក់ស៊ីន ត្រូវបានគណៈកម្មការជាតិប្រឆាំងអំពើពុករលួយដាក់ពាក្យប្តឹង ក្នុងបទរំលោភអំណាច នៅក្នុងពេលលោកកាន់តំណែងជានាយករដ្ឋមន្រ្តីថៃ នៅឆ្នាំ ២០០៨។ នៅឆ្នាំនោះ លោកស៊ុមឆៃ វង្សសាវ៉ាត ចូលកាន់តំណែងជានាយករដ្ឋមន្ត្រីថៃ បានតែ៨០ថ្ងៃ ប៉ុណ្ណោះ។ នៅខែតុលា ឆ្នាំ ២០០៨ បន្ទាប់ពីបាតុកម្មរ៉ាំរ៉ៃរបស់ក្រុមអាវលឿងប្រឆាំងនឹងរដ្ឋាភិបាលដឹកនាំដោយបក្សរបស់លោកថាក់ស៊ីន ប៉ូលិសបានបើកប្រតិបត្តិការបំបែកហ្វូងបាតុករ រហូតឈានដល់ការប្រឈមមុខដាក់គ្នារវាងបាតុករអាវលឿង និងប៉ូលិស ដែលបានសម្លាប់មនុស្ស២នាក់ និងរបួស ជាច្រើននាក់។
សំណុំរឿងប្តឹងប្អូនថ្លៃប្រុសរបស់លោកថាក់ស៊ីន រៀបចំឡើងដោយគណៈកម្មការជាតិប្រឆាំងអំពើពុករលួយ។ ពាក្យប្តឹងផ្តល់ប្រឆាំងលោកស៊ុមឆៃ ពីសំណាក់គណៈកម្មការជាតិប្រឆាំងអំពើពុករលួយ រឹតតែជារឿងចម្រូងចម្រាស នៅក្នុងសង្គមថៃ ព្រោះថា រហូតមកដល់នេះ គណៈកម្មការជាតិ មួយនេះមិនដែលហ៊ានដាក់ពាក្យប្តឹងប្រឆាំង លោកអាភីស៊ីត វីចាជីវ៉ា មកក្រុមអាវលឿង ម្តងណាទេ។ នៅក្នុងពេលកាន់អំណាចរបស់ខ្លួន នៅឆ្នាំ ២០១០ លោកអាភីស៊ីត ធ្លាប់បានបញ្ជាឲ្យទាហាន និងប៉ូលិសបើកការបង្រ្កាបបាតុករ ក្រុមអាវក្រហម ដែលប្រឆាំងនឹងរដ្ឋាភិបាល។ ប្រតិបត្តិការរបស់អាជ្ញាធរថៃ នៅក្រោមអំណាចរបស់លោកអាភីស៊ីតបានធ្វើឲ្យមនុស្សស្លាប់ ៩០នាក់ និងរបួសជាងមួយពាន់នាក់។ ប៉ុន្តែ លោកអាភីស៊ីត និងលោកស៊ូថេប ឧបនាយករដ្ឋមន្រ្តីថៃ នៅឆ្នាំ ២០១០ នៅតែរួចខ្លួន ពីការចោទប្រកាន់តាមផ្លូវតុលាការ។
អ្នកសង្កេតការណ៍នយោបាយថៃ និងក្រុមអាវក្រហមបានរិះគន់គណៈកម្មការជាតិប្រឆាំងអំពើពុករលួយថា ជាឧបករណ៍តុលាការដែលរបបសឹកថៃប្រើដើម្បីប្រឆាំង បំបាក់សំឡេងគណបក្សប្រឆាំងនឹងខ្លួន ដែលមាននិន្នាការគាំទ្រលោកថាក់ស៊ីន។ លោកស៊ុមឆៃ ត្រូវបានគេមើលឃើញថា អាចជាអនាគតមេដឹកនាំបក្សប្រឆាំង បក្សភឿថៃ បន្ទាប់ពីលោកស្រីយីងឡាក់ ត្រូវបានរបបសឹកថៃ ធ្វើរដ្ឋប្រហារទម្លាក់ចេញពីតំណែង កាលពីខែឧសភាឆ្នាំមុន។ ប្រមុខយោធាថៃ លោកប្រាយុទ្ធចាន់អូចា បានប្រកាសថា នឹងរៀបចំការបោះឆ្នោតតាមបែបប្រជាធិបតេយ្យមួយ នៅដើមនៅឆ្នាំក្រោយ។ ប៉ុន្តែ ការប្តឹងផ្តល់មេដឹកនាំក្រុមអាវក្រហម ដែលជាប់ជិតស្និទ្ធ ឬ ជាសាច់ញាតិរបស់លោកថាក់ស៊ីន ទៅតុលាការ ត្រូវបានគេមើលឃើញថា ជាយុទ្ធសាស្រ្តរបស់របបសឹកថៃ ដើម្បីធានាថា នឹងគ្មានត្រកូលថាក់ស៊ីន នៅក្នុងចំណោមអ្នកនយោបាយ ដែលចង់ឈរឈ្មោះ សម្រាប់កាបោះឆ្នោត សភាថៃ នៅឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ