ប៉ាគីស្ថានឋិតនៅក្រោមសម្ពាធនៃសម្ព័ន្ធភាពឥណ្ឌា-អាហ្វហ្កានីស្ថាន
ចុះផ្សាយនៅថ្ងៃ៖
ស្តាប់ - ០៤:២៩
“សម្ព័ន្ធភាពយុទ្ធសាស្ត្រ"ថ្មីដែលសម្រេចបាននៅសប្តាហ៍នេះ រវាងប្រទេសឥណ្ឌានិងប្រទេសអាហ្វហ្កានីស្ថានបានបណ្តាលឲ្យប្រទេស ប៉ាគីស្ថានកើតមានក្តីបារម្ភយ៉ាងខ្លាំង ហើយអាចនាំឲ្យមានភាពតានតឹងនៅក្នុងតំបន់ទៀតផង។ ទីក្រុងអ៊ីស្លាម៉ាបាដខ្លាចឋិតនៅឯកាដោយហេតុតែមានសម្ព័ន្ធភាព ឥណ្ឌា-អាហ្វហ្កានីស្ថាននេះ។ ជាពិសេសក្នុងខណៈដែលទំនាក់ទំនងអាមេរិក-ប៉ាគីស្ថានកំពុងស្គាល់ភាព រកាំរកូស។
ប្រទេសប៉ាគីស្ថានកំពុងទទួលរងការទិតៀនយ៉ាងខ្លាំងក្លាពីសំណាក់សហគមន៍អន្តរជាតិ។ ប្រទេសប៉ាគីស្ថានដែលបានកើតចេញជារូបរាងក្រោយពីមានការបែងចែកជាមួយប្រទេសឥណ្ឌានៅឆ្នាំ១៩៤៧ដែលពោរពេញទៅដោយទង្វើយ៉ាងហិង្សានិងយ៉ាងវេទនា។
ប៉ាគីស្ថានដែលមានប្រទេសឥណ្ឌាជាប់នៅព្រំដែនប៉ែកខាងកើត បានត្រូវគេចោទថា ចង់រៀបចំឲ្យមាន “យុទ្ធសាស្ត្រស៊ីជម្រៅ”មួយនៅប៉ែកខាងលិចនៃប្រទេស ពោលគឺនៅប្រទេសអាហ្វហ្កានីស្ថានដោយជួយធ្វើការគាំទ្រពួកតាលីបង់ ហើយនិងជួយចាក់ប្រេងបន្ថែមភ្លើងសង្គ្រាមឲ្យឆាបឆេះកាន់តែខ្លាំងឡើងថែមទៀត។ ភ្លើងសង្គ្រាមនៅអាហ្វហ្កានីស្ថានបានក្លាយទៅជាទីកន្លែងធ្វើឲ្យកងកម្លាំងនៃបក្សសម្ព័ន្ធអូតង់ក្រោមការដឹកនាំរបស់សហរដ្ឋអាមេរិកជាប់ផុង។ សហរដ្ឋអាមេរិកដែលបានលើកទ័ពមកដេញកំចាត់ពួកតាលីបង់ចេញពីរដ្ឋអំណាចនៅចុងឆ្នាំ២០០១។
នារយៈកាលចុងក្រោយនេះ ប្រទេសប៉ាគីស្ថានទទួលរងការទិតៀនកាន់តែខ្លាំងឡើងៗពីសំណាក់ទីក្រុងវ៉ាស៊ីនតោននិងទីក្រុងកាប៊ូល។ រដ្ឋាភិបាលអាហ្វហ្កានីស្ថានបានថ្លែងឲ្យដឹងនៅពេលថ្មីៗនេះថា ឃាតកម្មដែលបានប្រព្រឹត្តទៅលើរូបលោកអតីតប្រធានាធិបតីអាហ្វហ្កានីស្ថាន Rabbani ដែលជាអ្នកមានបន្ទុកជួយជំរុញឲ្យពួកតាលីបង់ចូលមករកតុចរចាដើម្បីសន្តិភាពជាមួយទីក្រុងកាប៊ូលជាស្នាដៃរបស់ប៉ាគីស្ថាន។ហើយទីក្រុងអ៊ីស្លាម៉ាបាដក៏បានផងទៀតខាឃាំងបង្កើតឲ្យមានឧបសគ្គដល់ការស៊ើបអង្កេតទៅលើបញ្ហាឃាតកម្មលើរូបលោករ៉ាបានី។
ឆ្លើយតបទៅនឹងសំណួរពាក់ព័ន្ធនឹងបញ្ហាដៃគូយុទ្ធសាស្ត្រឥណ្ឌា-អាហ្វហ្កានីស្ថានដែលប្រទេសទាំងពីរទើបនឹងបានចុះហត្ថលេខានៅថ្ងៃអង្គារកន្លងទៅនេះ លោកនាយករដ្ឋមន្ត្រីប៉ាគីស្ថាន Yousuf Reza Gilani បានឆ្លើយបែបព្រងើយថា “ប្រទេសទាំងពីរជាប្រទេសអធិបតេយ្យ ដូច្នេះគេមានសិទ្ធិចង់ធ្វើអ្វីក៏បានដែរ”។
ក៏ប៉ុន្តែអ្នកសង្កេតការណ៍ប៉ាគីស្ថានបារម្ភខ្លាចក្រែងទំនាក់ទំនងឥណ្ឌា-អាហ្វហ្កានីស្ថានថ្មីនេះ នឹងមកជួយពង្រឹងតួនាទីរបស់ឥណ្ឌាកាន់តែខ្លាំងឡើងបន្ថែមទៀតក្នុងការជួយបណ្តុះបណ្តាលកងកម្លាំងសន្តិសុខអាហ្វហ្កានីស្ថាន ដែលមានភារកិច្ចការពារប្រទេសក្រោយពីកងកម្លាំងនៃបក្សសម្ព័ន្ធអូតង់ដកទ័ពចេញនៅចុងឆ្នាំ២០១៤។
រីឯប្រទេសឥណ្ឌាវិញ ដោយបារម្ភខ្លាចក្រែងពួកតាលីបង់វិលត្រឡប់ឡើងមកកាន់កាប់អំណាចនៅប្រទេសអាហ្វហ្កានីស្ថាន ក៏បានផ្តល់ជំនួយប្រមាណជាងពីរពាន់លានដុល្លារឲ្យទៅទីក្រុងកាប៊ូល។ ទាំងនេះក្នុងគោលបំណងប្រយុទ្ធទប់ទល់នឹងឥទ្ធិពលរបស់ប៉ាគីស្ថាននៅប្រទេសអាហ្វហ្កានីស្ថាន។ គួរគូសបញ្ជាក់ថា ទីក្រុងអ៊ីស្លាម៉ាបាដជាអ្នកជួយគាំទ្រជ្រោមជ្រែងពួកតាលីបង់នៅទសវត្សរ៍១៩៩០។
សម្រាប់អ្នកឯកទេសប៉ាគីស្ថានជាច្រើន កិច្ចព្រមព្រៀងឥណ្ឌា-អាហ្វហ្កានីស្ថាននេះ នឹងមកបង្កបង្កើតឲ្យមានបញ្ហាកាន់តែច្រើនរវាងទីក្រុងអ៊ីស្លាម៉ាបាដនិងទីក្រុងកាប៊ូល ហើយពុំមែនជាកត្តាវិជ្ជមានសម្រាប់ជួយជំរុញឲ្យប្រទេសអាហ្វហ្កានីស្ថានឈានទៅរកវឌ្ឍនភាពនិងសន្តិភាពឡើយ។
ចំណែកឯពួកតាលីបង់ឯណោះវិញ នៅថ្ងៃព្រហស្បតិ៍ម្សិលមិញពួកគេបានធ្វើការថ្កោលទោសយ៉ាងខ្លាំងក្លាទៅលើ កិច្ចព្រមព្រៀងឥណ្ឌា-អាហ្វហ្កានីស្ថាននេះ ដោយបានវិនិច្ឆ័យថា ជាកិច្ចព្រមព្រៀងពុំអាចទទួលយកបាននិងជាកិច្ចព្រមព្រៀងពុំស្របច្បាប់ ដោយហេតុថារដ្ឋាភិបាលអាហ្វហ្កានីស្ថានបច្ចុប្បន្នជារដ្ឋាភិបាលពុំស្របច្បាប់ ជារដ្ឋាភិបាលស្ដាប់បង្គាប់តាមការបញ្ជារបស់សហរដ្ឋអាមេរិក។
ឆ្លើយតបទៅនឹងប៉ាគីស្ថាន ទីក្រុងវ៉ាស៊ីនតោនបានចោទទីក្រុងអ៊ីស្លាម៉ាបាដថា បានយកក្រុម Haqqani ដែលជាសាខាមួយរបស់ពួកតាលីបង់ធ្វើជាកងកម្លាំងអាវុធសម្រាប់បម្រើផលប្រយោជន៍របស់ខ្លួននៅប្រទេសអាហ្វហ្កានីស្ថាន។
គួរកត់សម្គាល់ថា ទំនាក់ទំនងអាមេរិក-ប៉ាគីស្ថានបានធ្លាក់ដល់កម្រិតមួយដ៏សែនទាប ចាប់តាំងពីមានកងកម្លាំងយោធាអាមេរិកបានចូលទៅបាញ់សម្លាប់មេដឹកនាំអាល់កៃដា Ben Laden នៅខែឧសភាកន្លងទៅ។ ប្រតិបត្តិការយោធាអាមេរិកាំងចូលទៅបាញ់សម្លាប់ Ben Laden ជាឯកតោភាគីបែបនេះ ក៏ពីព្រោះតែទីក្រុងវ៉ាស៊ីនតោនយល់ឃើញថា ទីក្រុងអ៊ីស្លាម៉ាបាដពុំស្មោះត្រង់នឹងខ្លួន លេងល្បែង “ស៊ីរះ” ទាំងសងខាង ទាំងខាងអាមេរិកផង ទាំងខាងតាលីបង់ផង។
នៅពេលថ្មីៗនេះទៀត ប្រទេសប៉ាគីស្ថានបានបដិសេធពុំព្រមធ្វើតាមការបញ្ជារបស់សហរដ្ឋអាមេរិកដែលបានទាមទារឲ្យប៉ាគីស្ថានមានប្រតិកម្មប្រឆាំងនឹងពួក Haqqani នៅតាមព្រំដែនប៉ាគីស្ថាន-អាហ្វហ្កានីស្ថាន។
ក៏ប៉ុន្តែ ទោះជាយ៉ាងណាក៏ដោយក៏លោកប្រធានាធិបតីអាហ្វហ្កានីស្ថាន ហាមីឌការហ្សៃ ទទួលស្គាល់ថា “សន្តិភាពនៅប្រទេសអាហ្វហ្កានីស្ថានអាចមានទៅកើត លុះត្រាណាតែមានកិច្ចសម្រុះសម្រួលជាមួយប្រទេសប៉ាគីស្ថានផងដែរ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ