សម្តេចសង្ឃ ដាឡៃ ឡាម៉ា ចោទប្រទេសចិន
សម្តេចសង្ឃនៃពុទ្ធសាសនិកជន នៅទីបេត៍ ដាឡៃ ឡាម៉ាជាជ័យលាភីរង្វាន់ណូបែលផ្នែកសន្តិភាព នៅឆ្នាំ១៩៨៩ បានថ្លែង នៅឱកាសដំណើរទស្សនកិច្ច នៅទីក្រុងតូក្យូថា “ ឩក្រិដ្ឋកម្មប្រល័យវប្បធម៌ “ ធ្វើដោយប្រទេសចិន នៅទីបេត៍គឺជាដើមកំណើតនៃការដុតសម្លាប់ខ្លួនឯងរបស់ជនជាតិទីបេត៍ជាបន្តបន្ទាប់គ្នានាពេលថ្មីៗ។ការដុតសម្លាប់ខ្លួនឯងនិងការប៉ុនប៉ងដុតសម្លាប់ខ្លួនឯងរបស់ជនជាតិទីបេត៍បានកើតមាននៅឆ្នាំ២០១១នៅប្រទេសចិន រួមមាន១១ករណីនៅតំបន់នានានៃខេត្តSichuanដែលមានជនជាតិទីបេត៍រស់នៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
អ្នកតវ៉ាប្រឆាំងទី១នៃសោកនាដកម្មជាបន្តបន្ទាប់គ្នានេះគឺជាភិក្ខុសង្ឃវ័យក្មេងមួយអង្គនៃវត្តkirtiនៅខែមីនាមុននេះ។ភិក្ខុសង្ឃអង្គនេះតាមរយៈកាយវិការរបស់ខ្លួន ចង់ប្រារព្ធខួបឆ្នាំទីបីរំលឹកការចាប់ផ្តើមការបះបោរប្រឆាំងនឹងអាជ្ញាធរចិន នៅទីក្រុងLhassa។នៅថ្ងៃសុក្រសប្តាហ៍មុន ជនជាតិទីបេត៍ម្នាក់រស់នៅប្រទេសឥណ្ឌា បានប៉ុនប៉ងដុតសម្លាប់ខ្លួនឯង នៅពីមុខស្ថានទូតចិន នៅទីក្រុងNew Delhi។
ជនជាតិទីបេត៍ជាច្រើនលែងទ្រាំទ្របានទៀតឡើយការជិះជាន់គ្របសង្កត់របស់ពួកហានជាជាតិពន្ធុមានភាគច្រើននៅប្រទេសចិន។ព្រះសង្ឃនៅទីបេត៍ត្អូញត្អែរអំពីការត្រួតពិនិត្យឃ្លាំមើលរបស់ប៉ូលិសចិន។ ព្រះសង្ឃមួយចំនួនទទួលរងយុទ្ធនាការអប់រំខាងនយោបាយ។
អត្តឃាតកម្មជាសាធារណៈគឺជាបាតុភាពមួយថ្មីបង្គួរសម្រាប់ជនជាតិទីបេត៍។ សម្តេចសង្ឃដាឡៃឡាម៉ាបានថ្លែងប្រឆាំងនឹងបាតុភាពនេះ ដោយយល់ឃើញថា ស្របតាមពុទ្ធសាសនាគឺជាការមិនគោរពលក្ខណៈដ៏ពិសិដ្ឋនៃជីវិត។ ប៉ុន្តែនាយករដ្ឋមន្ត្រីនៃរដ្ឋាភិបាលនិរទេសបានសម្តែងគារវកិច្ចចំពោះ “សេចក្តីក្លាហាន” របស់ពួកជនដែលបូជាជីវិតខ្លួនឯងដើម្បីមូលហេតុទីបេត៍។
រដ្ឋាភិបាលក្រុងប៉េកាំងបានបញ្ចេញប្រតិកម្មខ្លាំងណាស់ដោយអះអាងថា ហេតុការណ៍មិនថ្កោលទោសការដុតសម្លាប់ខ្លួនឯងគឺជាការធ្វើផ្ទុយពីមនសិការរួមនិងសីលធម៌របស់មនុស្សជាតិ។ សម្រាប់អាជ្ញាធរចិន ការដុតសម្លាប់ខ្លួនឯងគឺជាទង្វើជាប់ទាក់ទងនឹងកម្លាំងបរទេសទាមទារចង់ផ្តាច់ទឹកដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ