ទីក្រុងប៉េកាំងទាមទារតួនាទីសំខាន់នៅក្នុងកិច្ចការសេដ្ឋកិច្ចពិភពលោក
នាឱកាសធ្វើអន្តរាគមន៍នៅថ្ងៃសៅរ៍ម្សិលមិញ នៅជំនួបកំពូលអាស៊ី-ប៉ាស៊ីហ្វិកនៅទីក្រុងហូណូលូលូ លោកប្រធានាធិបតីចិន ហ៊ូ ជិនតាវ បានថ្លែងអះអាងប្រាប់អ្នកដឹកនាំនៃប្រទេសអាស៊ី-ប៉ាស៊ីហ្វិកពីនយោបាយបើកចំហរបស់ចិនឆ្ពោះទៅរកការដោះដូរពាណិជ្ជកម្មសេរី ហើយនិងការបន្តធ្វើកំណែទម្រង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
នៅជំនួបកំពូលសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកហៅកាត់ថា APEC នៅទីក្រុងហូណូលូលូ លោកប្រធានាធិបតីចិន ហ៊ូ ជិនតាវ បានថ្លែងគូសបញ្ជាក់ប្រាប់ថា ប្រទេសចិនត្រូវមានតួនាទីសំខាន់ក្នុងការសម្រេចទិសដៅនៃសេដ្ឋកិច្ចពិភពលោក។ ហើយកិច្ចចរចាពាក់ព័ន្ធនឹងការដោះដូរពាណិជ្ជកម្មសេរីត្រូវឋិតនៅក្រោមការឧបត្ថម្ភរបស់អង្គការពាណិជ្ជកម្មពិភពលោក OMC ។
ក៏ប៉ុន្តែទស្សនៈរបស់លោក ហ៊ូ ជិនតាវ នេះបានប៉ះទង្គិចនឹងគោលជំហរការពារដោយលោកប្រធានាធិបតីអាមេរិកបារ៉ាក់អូបាម៉ាដែលបានឲ្យអាទិភាពទៅលើ គម្រោងបង្កើតតំបន់ដោះដូរពាណិជ្ជកម្មសេរីរវាងប្រទេសដៃគូអន្តរ-ប៉ាស៊ីហ្វិកឬ Trans-Pacific Partnership (TPP)។
លោក ហ៊ូ ជិនតាវបានថ្លែងប្រាប់អ្នកដឹកនាំសហគ្រាសសំខាន់ៗថា “ប្រទេសចិនបានប្តេជ្ញាចិត្តជួយជំរុញនយោបាយដោះដូរពាណិជ្ជកម្មសេរីនៅតំបន់ជុំវិញមហាសាគរប៉ាស៊ីហ្វិក។ ហើយកិច្ចព្រមព្រៀងដោះដូរពាណិជ្ជកម្មសេរីពហុភាគីដែលក្នុងនោះមាន គម្រោងបង្កើតតំបន់ដោះដូរពាណិជ្ជកម្មសេរីរវាងប្រទេសដៃគូអន្តរ-ប៉ាស៊ីហ្វិកឬ Trans-Pacific Partnership (TPP) ដែលគាំទ្រដោយសហរដ្ឋអាមេរិកគឺពិតជាគំនិតផ្តួចផ្តើមដ៏សំខាន់សម្រាប់ប្រយុទ្ធប្រឆាំងនឹងនយោបាយ “ការពារនិយម” ពោលគឺនយោបាយការពារផលិតផលក្នុងស្រុកទល់នឹងផលិតផលបរទេសដោយប្រើវិធានការពន្ធគយ Le Protectionnisme ។
“ប្រទេសចិននឹងជួយធ្វើកំណែទម្រង់ទៅលើប្រព័ន្ធសេដ្ឋកិច្ចអន្តរជាតិ ហើយនិងជួយបង្កើតឲ្យមានប្រព័ន្ធសណ្តាប់ធ្នាប់សេដ្ឋកិច្ចអន្តរជាតិមួយដែលមានលក្ខណៈយុត្តិធម៌និងត្រឹមត្រូវជាងនេះ”។ នេះជាសេចក្តីថ្លែងប្រកាសរបស់លោកប្រធានាធិបតីចិន ហ៊ូ ជិនតាវ ដោយបានគូសបញ្ជាក់ទៀតថា “ទីក្រុងប៉េកាំងនឹងមានតួនាទីសំខាន់នៅក្នុងសេដ្ឋកិច្ចអន្តរជាតិនិងនៅក្នុងស្ថាប័នហិរញ្ញវត្ថុអន្តរជាតិ”។
ចំណែកឯសហរដ្ឋអាមេរិកនិងប្រទេសអឺរ៉ុបវិញ ច្បាស់ជាបដិសេធពុំព្រមប្រគល់អំណាចឲ្យបានធំទូលាយជាងនេះទៅប្រទេសកំពុងអភិវឌ្ឍន៍សំខាន់ៗដូចជាប្រទេសចិនឡើយ។
ក៏ប៉ុន្តែ ការទាមទាររបស់ប្រទេសចិនពិតជាធ្វើឲ្យប្រទេសអឺរ៉ុបមានការលំបាកនឹងប្រកែកបដិសេធ ដោយហេតុថា ប្រទេសអឺរ៉ុបកំពុងងាកទៅរកប្រទេសចិនដើម្បីសុំជំនួយហិរញ្ញវត្ថុសម្រាប់ដោះស្រាយវិបត្តិប្រាក់បំណុលដ៏សែនធ្ងន់ធ្ងររបស់ខ្លួន។ ហើយម្យ៉ាងទៀត ប្រទេសចិនក៏ជាម្ចាស់បំណុលទីមួយរបស់សហរដ្ឋអាមេរិកផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ