ជប៉ុនត្រូវការពង្រឹងកម្លាំងជើងទឹក និងយន្តហោះគ្មានមនុស្សបើក ដើម្បីការពារដែនសមុទ្រ
ចុះផ្សាយនៅថ្ងៃ៖
ស្តាប់ - ០៦:២១
នៅព្រឹកថ្ងៃសុក្រទី ២៦ កក្កដា កប៉ាល់ល្បាតរបស់ចិនបានបើកចូលទៅក្បែរកោះសេនកាគូ របស់ជប៉ុន និងស្ថិតនៅទីនោះ អស់ជាច្រើនម៉ោង មុននឹងត្រូវឆ្មាំល្បាតជប៉ុនបណ្តេញចេញទៅវិញ។ កាលពីថ្ងៃព្រហស្បតិ៍ របាយការណ៍ក្រសួងការពារជាតិជប៉ុនបានសរសេរថា គេត្រូវការពង្រឹងកងទ័ពជើងទឹក និងយន្តហោះគ្មានមនុស្សបើក Drone។
កប៉ាល់ល្បាតរបស់ចិនបានបើកចូលទៅជិត កាន់តែក្បែរ កោះ សេនកាគូតែម្តង គឺទៅក្នុងដែនទឹកដែលគ្រប់គ្រងដោយរដ្ឋាភិបាលជប៉ុន។ លើកមុនៗ ចិនបញ្ជូនកប៉ាល់រដ្ឋាភិបាល ឬទូកនេសាទចូលទៅក្រវែល នៅម្តុំប្រជុំកោះសេនកាគូ គឺស្ថិតនៅប្រមាណ ចម្ងាយ ជាង២០គីឡូម៉ែត្រប៉ុណ្ណោះ ប៉ុន្តែ មិនដែលបានចូលទៅជិតកោះដែលខ្លួនទាមទារ និងដាក់ឈ្មោះថា កោះទាវយូទេ។
លើកនេះ ចិនប្រើកប៉ាល់ល្បាតដល់ទៅ៤គ្រឿងទៅចូលសំចតនៅក្នុងដែនទឹកជប៉ុន ដែលនេះមិនធ្លាប់មានទេពីមុនមក ពោលគឺនៅតែពីរថ្ងៃប៉ុណ្ណោះ ក្រោយពីចិនបានប្រើយន្តហោះចម្បាំងជាលើកទីមួយ ទៅបើកត្រួតពិនិត្យ (ក្នុងដែនអាកាសអន្តរជាតិ) ពីលើកោះសេនកាគូ កាលពីថ្ងៃពុធទី ២៤ កក្កដា។ សម្រាប់ជប៉ុន ចិនកំពុងចង់គំរាមកំហែងជប៉ុន តាមរយៈបង្អួត បញ្ជូនយន្តហោះ និងកប៉ាល់ល្បាតរបស់ខ្លួន ចូលមកក្នុងដែនទឹករបស់ជប៉ុន។
កាលពីពេលថ្មីៗនេះ រដ្ឋាភិបាលទីក្រុងប៉េកាំងទើបនឹងសម្រេចបញ្ចូល ផ្នែកនេសាទ ពន្ធដា និងការដើរត្រួតពិនិត្យដែនសមុទ្រ ឲ្យចូលរួមគ្នាក្នុងអង្គភាពពិសេសតែមួយឈ្មោះ ឆ្មាំការពារសមុទ្រ ដែលឆ្មាំសមុទ្រលើកប៉ាល់ សុទ្ធតែត្រូវបំពាក់ដោយអាវុធគ្រប់ដៃ។ នយោបាយថ្មីរបស់ចិន ត្រូវបានគេមើលឃើញថា នឹងអាចបង្កឲ្យមានឧប្បតិ្តហេតុ នៅថ្ងៃណាមួយ មិនខាន ដោយសារកប៉ាល់ល្បាតរបស់ចិន ដែលមានបំពាក់អាវុធនឹងមានកាន់តែច្រើន នៅក្នុងតំបន់ទឹកដែលមានជម្លោះ ជាមួយជប៉ុនតែម្តង។
ចិនដែលចេះតែបង្កើនសមត្ថភាព និងបង្ហាញវត្តមានទ័ពជើងទឹករបស់ខ្លួន នៅក្នុងដែនសមុទ្រមានជម្លោះ ក៏ព្រោះតែចិនបានឃើញនយោបាយរបស់រដ្ឋាភិបាលជប៉ុនមានការផ្លាស់ប្តូរ ខុសពីមុន។ ជាញឹកញយ ចិន តាមរយៈទិនានុប្បវត្តរបស់បក្សកុម្មុយនិស្ត បានរិះគន់រដ្ឋាភិបាលជប៉ុនថ្មី ដែល ដឹកនាំដោយនាយករដ្ឋមន្រ្តីជាតិនិយម គឺលោកShinzo Abeថា ជារដ្ឋាភិបាលញុះញង់។
កាលពីថ្ងៃព្រហស្បតិ៍ម្សិលមិញ ក្នុងរបាយការណ៍បណ្តោះអាសន្ន ដាក់ជូនទៅរដ្ឋាភិបាល ក្រសួងការពារជប៉ុន បានស្នើសុំឲ្យរដ្ឋាភិបាលបង្កើនការត្រួតពិនិត្យ និងពង្រឹងអង្គភាពការពារដែនសមុទ្រ។
ក្នុងរបាយការណ៍បណ្តោះអាសន្នរបស់ក្រសួងការពារជាតិដែលត្រូវបញ្ចប់ នៅចុងឆ្នាំនេះ ទៅតាមការបញ្ជារបស់លោកនាយករដ្ឋមន្រ្តីAbe ក្រសួងការពារជាតិជប៉ុនបានស្នើឲ្យរដ្ឋាភិបាលពិចារណាពីការបំពាក់សព្វាវុធទំនើបថ្មីៗ ដល់វិស័យការពារជើងទឹក ដូចជា គេត្រូវការយន្តហោះគ្មានមនុស្សបើកដើម្បីតាមដានត្រួតពិនិត្យ គ្រប់គ្រងកោះ ទាំង៦៥០០របស់ជប៉ុន។ រដ្ឋមន្រ្តីជប៉ុនទាមទារផងដែរ ឲ្យមានអង្គភាពទ័ពមួយដែលអាចអន្តរាគមបានភ្លាមៗ ទាំងនៅលើក្នុងទឹក និងនៅលើដែនគោក គឺដូចនាវាចម្បាំងផ្ទុកមនុស្ស និងរថពាសដែករបស់អាមេរិក ដែលមានសមត្ថភាពអន្តរគម ទាំងក្នុងទឹក និងនៅលើគោក។
កន្លងមក កាសែតក្នុងស្រុកជប៉ុនបានឲ្យដឹងថា ជប៉ុនគ្រោងបង្កើតអង្គភាពពិសេសមួយ ដែលមានទាហាន ៦០០នាក់ និងនាវា ១២គ្រឿង ដើម្បីការពារប្រជុំកោះសេនកាគូ ។ លើសពីនោះ រដ្ឋាភិបាលក្រុងតូក្យូមានគម្រោងបង្ហោះផ្កាយរណបចំនួន ៩គ្រឿង ក្នុងរយៈពេល ៥ឆ្នាំខាងមុខ ដើម្បីទុកឃ្លាំមើលដែនសមុទ្រ។
នៅក្នុងរបាយការណ៍បណ្តោះអាសន្នដែលត្រូវគេបង្ហាញកាលពីថ្ងៃម្សិលមិញ ក្រសួងការពារជាតិជប៉ុនលើកឡើងផងដែរ ពីជម្រើសយោធាថ្មី តើជប៉ុនគួរតែពឹងផ្អែកទាំងស្រុងលើសម្ព័ន្ធមិត្តអាមេរិក ដើម្បីធានាសន្តិសុខឲ្យជប៉ុនតទៅទៀត ឬយ៉ាងណា? ចាប់តាំងពីចប់សង្រ្គាមលោកលើកទីពីរ អាមេរិកនិងជប៉ុនបានចុះសន្ធិសញ្ញាមួយ ដែលបញ្ជាក់ថា ទីក្រុងវ៉ាស៊ីនតោននឹងអន្តរាគមជួយជប៉ុន នៅពេលជប៉ុនរងការវាយប្រហារពីប្រទេសណាមួយ។
ជប៉ុនពេលនេះ កំពុងពិចារណាផងដែរ ក្នុងការទិញមីស៊ីលទំនើបៗ ដើម្បីឆ្លើយតបនឹងការវាយប្រហាររបស់មីស៊ីលអន្តរទ្វីបកូរ៉េខាងជើង។ មន្រ្តីយោធាម្នាក់ដែលសុំមិនបញ្ចេញឈ្មោះបាននិយាយថា វាចាំបាច់ ដែលគេអាចវាយប្រហារទៅលើទីតាំងមីស៊ីលរបស់សត្រូវ។ ប៉ុន្តែ ទោះជាយ៉ាងណា មន្រ្តីដដែលនោះបានបញ្ជាក់ថា ជប៉ុននឹងមិនគិតវាយប្រហារទៅលើទីតាំងរបស់សត្រូវទេ បើសិនជាជប៉ុនមិនរងការវាយប្រហារនោះ។
តាមរដ្ឋធម្មនុញ្ញសន្តិភាពជប៉ុនដែលសរសេរឡើងដោយអាមេរិក កងទ័ពជប៉ុនមិនអាចវាយប្រហារទៅលើប្រទេសដទៃបានទេ ប៉ុន្តែ យោធាជប៉ុនមានសិទ្ធិត្រឹមស្វ័យការពារតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ