ថៃរៀបចំការបោះឆ្នោតជាថ្មីនៅថ្ងៃអាទិត្យនេះ
នៅថ្ងៃអាទិត្យទី ២ មីនា ប្រទេសថៃ បានរៀបចំការបោះឆ្នោតឡើង នៅតំបន់ណាដែលបានទទួលការរារំាងពីក្រុមប្រឆាំង កាលពីថ្ងៃទី ២កុម្ភៈកន្លងមក។ តាមអគ្គលេខាធិការគណៈកម្មាធិការជាតិរៀបចំការបោះឆ្នោតថៃ ដំណើរការបោះឆ្នោត នៅថ្ងៃនេះបានប្រព្រឹត្តដោយរលូន ដោយគ្មានការរំខានពីក្រុមប្រឆាំង។
ចុះផ្សាយនៅថ្ងៃ៖
នៅព្រឹកថ្ងៃអាទិត្យ ប្រជាជនថៃមួយចំនួន បានត្រលប់ចូលបោះឆ្នោត នៅតាមការិយាល័យ បន្ទាប់ពីក្រុមប្រឆាំង បានរារាំង រំខាន កាលពីអំឡុងបោះឆ្នោតលើកមុន។ ខុសពីពេលមុន នៅព្រឹកនេះ ពួកគេមិនបានទទួលរារាំងពីបាតុករក្រុមប្រឆាំងទៀតទេ។ នេះបើតាមលោកភូជុង នុត្រាវង្ស អគ្គលេខាធិការគណៈកម្មាធិការជាតិ រៀបចំការបោះឆ្នោតថៃ។ យោងតាមគណៈកម្មាធិការជាតិរៀបចំការបោះឆ្នោតថៃ គេបានរៀបចំបោះឆ្នោតសាជាថ្មី នៅតាមការិយាល័យ អាក់ខាន មិនអាចបើកទ្វារ កាលពីថ្ងៃបោះឆ្នោត ទី ២កុម្ភៈ។
នៅថ្ងៃទី ២កុម្ភៈ ចលនាប្រឆាំងរបស់បាតុករបានរារាំងដំណើរការបោះឆ្នោត រហូតធ្វើឲ្យមណ្ឌលប្រមាណ ១៨ភាគរយ នៃមណ្ឌលសរុបជាង៣០០ត្រូវបិទទ្វារ។ គណបក្សប្រឆាំង ដែលបដិសេធមិនចូលរួមនៅក្នុងការបោះឆ្នោត បានដឹកនាំក្រុមបាតុករថៃឲ្យរារាំងដំណើរការបោះឆ្នោត។ ក្រុមប្រឆាំងថៃ មិនចង់ឲ្យមានការរើសថ្នាក់ដឹកនាំចេញពីការបោះឆ្នោត ប៉ុន្តែ ពួកគេចង់ឲ្យប្រទេសថៃដឹកនាំដោយក្រុមប្រឹក្សាប្រជាជន ជំនួសលោកស្រីនាយករដ្ឋមន្រ្តី។ គណបក្សរបស់លោកស្រីនាយករដ្ឋមន្រ្តីយីងឡាក់ត្រូវគេរំពឹងថា នឹងឈ្នះឆ្នោត ដោយមកពីមានការគំាទ្រច្រើនពីប្រជាជនថៃភាគច្រើន ដែលរស់នៅតាមជនបទ ជាពិសេស នៅខេត្តភាគខាងជើង។
យ៉ាងណាក៏ដោយ តាមអ្នកវិភាគខ្លះ ការបោះឆ្នោត នៅថ្ងៃអាទិត្យនេះ អាចធ្វើឲ្យគណបក្សភឿថៃឈ្នះឆ្នោត ប៉ុន្តែ ទំនងជាមិនអាចជួយបង្រ្គប់ចំនួនសមាជិកសភា ដើម្បីអាចបោះឆ្នោតតែងតាំងចេញជានាយករដ្ឋមន្រ្តីទេ។ កន្លងមក បក្សប្រឆាំងមិនត្រឹមតែមិនចូលរួមនៅក្នុងការបោះឆ្នោត ប៉ុន្តែ ថែមទាំងបានរារាំងមិនឲ្យគេចុះឈ្មោះធ្វើជាបេក្ខជនតំណាងរាស្ត្រទៀត។
ដំណើរការបោះឆ្នោតប្រព្រឹត្តទៅធម្មតា នៅថ្ងៃអាទិត្យ នៅពេលក្រុមបាតុករប្រឆាំងបានដកខ្លួនចេញពីជំរំកាន់កាប់ ដែលពួកគេបានបោះទីតាំង តាំងពីខែវិច្ឆិកា ក្នុងទីក្រុង ក្នុងគោលដៅផ្តួលអំណាចរបស់លោកស្រីនាយករដ្ឋមន្រ្តីថៃ។ នៅថ្ងៃអាទិត្យនេះ ពួកបាតុករបន្តដើរហែក្បួនធម្មតា នៅតាមផ្លូវក្នុងទីក្រុងបាងកក ដោយមិនបង្កឲ្យមានប្រទូស្តរាយអ្វីទេ។ លោកស៊ូថេប ដែលជាប្រមុខដឹកនាំក្រុមបាតុករប្រឆាំង បានប្រកាសពីការដកខ្លួន លែងកាន់កាប់ផ្លូវនៅក្នុងទីក្រុងបាងកកតទៅទៀត ប៉ុន្តែ លោកបានសន្យាមិនបោះបង់ចោលចលនាតស៊ូប្រឆាំងទេ។ គេរំពឹងថា ការចរចារវាងភាគីជម្លោះទាំងពីរ នឹងត្រូវធ្វើឡើង នៅសប្តាហ៍ក្រោយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ