វិបត្តិនយោបាយថៃ ៖ស្ថានភាពធូរស្បើយ ប៉ុន្តែមិនមែនជាការបញ្ចប់វិបត្តិ
សកម្មជនថៃដែលបានប្រមូលផ្តុំគ្នាធ្វើបាតុកម្មតាំងពីជិតបួនខែ ដើម្បីទម្លាក់រដ្ឋាភិបាល បានប្រកាសបិទបញ្ចប់ការបិទខ្ទប់ក្រុងបាងកក ចាប់ពីថ្ងៃចន្ទទី ៣ មីនាទៅ។ រនាំង ជំរំកាន់កាប់ តាមចំណុចផ្លូវបំបែកសំខាន់ក្នុងក្រុងនឹងត្រូវរុះរើចេញទាំងអស់វិញ ដោយរក្សាទុកជំរំនៅក្នុងឧទ្យានលុមពិនី មួយប៉ុណ្ណោះ។ ក្នុងខណៈដែលវិបត្តិនយោបាយហាក់បានធូរស្រាលមួយកំរិត សហរដ្ឋអាមេរិកបានជំរុញឱ្យរដ្ឋាភិបាលថៃបើកអង្កេតរកមុខអ្នកបង្កអំពើហិង្សា។
ចុះផ្សាយនៅថ្ងៃ៖
ស្តាប់ - ០១:៥៣
នៅក្នុងសេចក្តីថ្លែងការណ៍ជាលាយលក្ខណ៍អក្សរ ប្រមុខការទូតសហរដ្ឋអាមេរិក បានបង្ខំឱ្យអាជ្ញាធរថៃ បើកអង្កេត ដើម្បីបំភ្លឺឱ្យឆាប់រហ័សទំនួលខុសត្រូវក្នុងអំពើហិង្សា។ អំពើហិង្សាដែល មានបង្កប់លាយលំដោយមូលហេតុនយោបាយ បានផ្តាច់ជិវិតមនុស្ស ២៣នាក់ និងរបួសជាច្រើននាក់ និងមិនមែនជាមធ្យោបាយសមស្របសម្រាប់សម្តែងអំពីភាពខុសគ្នាផ្នែកនយោបាយឡើយ។ នេះជាការគូសបញ្ជាក់បន្ថែមរបស់សហរដ្ឋអាមេរិក។
សូមបញ្ជាក់ថា សេចក្តីអំពាវនាវរបស់អាមេរិកនេះ ធ្លាក់មកជួនចំពេល ដែលបាតុករថៃ ត្រៀមនឹងរុះរើ បោះបង់ជំរំ ដកខ្លួនចេញ លែងធ្វើរនាំងបិទខ្ទប់ក្រុងបាងកក តាមរយៈសេចក្តីប្រកាសដ៏គួរឱ្យភ្ញាក់ផ្អើលបំផុត ! នៅល្ងាចថ្ងៃសុក្រម្សិលមិញ របស់លោក ស៊ូថេប ថងស៊ូបាន ប្រមុខដឹកនាំបក្សប្រឆាំងនិងចលនាបាតុកម្មតាំងពីជាងបួនខែមក។
បញ្ចប់ប្រតិបត្តិការបិទខ្ទប់រាជធានីក្រោមហេតុផលជាផ្លូវការ គឺដើម្បីសម្រួលចរាចរណ៍ ប៉ុន្តែបើគេសង្កេតជាទូទៅឃើញថា សកម្មភាពបាតុករ បានធ្លាក់ចុះជាលំដាប់ បន្ទាប់ពីមានការបាញ់ គប់គ្រាប់បែកទៅលើជំរំគ្មានមនុស្សស្នាក់នៅពេលថ្ងៃ នៅតែពេលយប់។ ម្យ៉ាងទៀត ទំនងជាអាចមានការចរចារវាងលោកស្រីប្រមុខរដ្ឋាភិបាល និងលោកស៊ូថេប ប្រមុខបក្សប្រឆាំង ប្រព្រឹត្តទៅក្នុងពេលឆាប់នេះ។
បញ្ឈប់ការបិទខ្ទប់ក្រុងបាងកក ជាក្តីសង្ឃឹមថ្មីសម្រាប់បិទបញ្ចប់អំពើហិង្សា ប៉ុន្តែដំបៅនយោបាយមិនប្រាកដថាអាចជា និងដោះស្រាយចេញរួចទេ ព្រោះបក្សប្រឆាំង អ្នកជាតិនិយមបំផុត មិនបោះបង់គំនិតផ្តួលត្រកូលថាក់ស៊ីនឡើយ។ លោកស៊ូថេប ក្រោយពី មិនសម្រេចផែនការតាមរយៈចលនាបះបោរប្រជាជន និងរដ្ឋប្រហារយោធា កំពុងរកយុទ្ធសាស្ត្រថ្មី។ រដ្ឋាភិបាលលោកស្រីយីងឡាក់ មានលក្ខណៈផុយស្រួយដដែល ដោយត្រូវប្រឈមមុខនឹងតុលាការ។ សេចក្តី សម្រេចនឹងត្រូវធ្លាក់មកនៅខែមីនា នេះ អាចនឹងធ្វើឱ្យលោកស្រីយីងឡាក់ បាត់បង់អំណាច និងសិទ្ធិធ្វើនយោបាយដល់ទៅ៥ឆ្នាំផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ