ប្រវត្តិជោគជ័យនៃក្រុមហ៊ុន AirAsia នៅមុនពេលជួបហេតុការណ៍ធ្លាក់យន្តហោះ
ចុះផ្សាយនៅថ្ងៃ៖
ស្តាប់ - ០៤:២១
ក្រុមហ៊ុនអាកាសចរណ៍ AirAsia កំពុងក្លាយជាចំណុចចាប់អារម្មណ៍ដ៏ធំមួយ នៅក្នុងពេលបច្ចុប្បន្ន នៅក្រោយពេលដែលយន្តហោះមួយគ្រឿងរបស់ក្រុមហ៊ុននេះបានធ្លាក់ កាលពីថ្ងៃអាទិត្យ នៅក្នុងពេលហោះហើរចេញពីឥណ្ឌូណេស៊ី ឆ្ពោះទៅកាន់សិង្ហបុរី។ ក៏ប៉ុន្តែ មកទល់នឹងពេលមានហេតុការណ៍នេះ ក្រុមហ៊ុន AirAsia ត្រូវបានគេស្គាល់ថាជាក្រុមហ៊ុនអាកាសចរណ៍ប្រកបដោយជោគជ័យបំផុតមួយ នៅក្នុងតំបន់អាស៊ី។
ក្រុមហ៊ុន AirAsia ថ្វីដ្បិតតែមិនសូវមានគេស្គាល់ច្រើន ដូចក្រុមហ៊ុនអាកាសចរណ៍ជាតិផ្សេងទៀត តែតាមពិត គឺជាក្រុមហ៊ុនអាកាសចរណ៍ដ៏ធំ និងប្រកបដោយជោគជ័យមួយ នៅក្នុងតំបន់អាស៊ី។ ក្រុមហ៊ុន AirAsia ត្រូវបានគេចាត់ទុកជាក្រុមហ៊ុនអាកាសចរណ៍តម្លៃទាប (Low-Cost Airlines) ដ៏ល្អបំផុត នៅលើពិភពលោក នៅក្នុងរយៈពេល ៦ឆ្នាំជាប់ៗគ្នា ចាប់តាំងពីឆ្នាំ២០០៩ រហូតមកទល់នឹងឆ្នាំ២០១៤នេះ។
ក៏ប៉ុន្តែ ក្រុមហ៊ុនអាកាសចរណ៍ប្រកបដោយជោគជ័យមួយនេះ កាលពីមុន ធ្លាប់ជាក្រុមហ៊ុនដែលទទួលបរាជ័យរហូតហៀបតែនឹងត្រូវក្ស័យធន។ ដំណើររឿងជោគជ័យរបស់ AirAsia បានចាប់ផ្តើមឡើង កាលពីឆ្នាំ២០០១ នៅពេលដែលក្រុមហ៊ុនអាកាសចរណ៍ដែលហៀបនឹងក្ស័យធនមួយនេះត្រូវបានអ្នកជំនួញម៉ាឡេស៊ីម្នាក់ ឈ្មោះថា Tony Fernandes ទិញយកពីរដ្ឋាភិបាលម៉ាឡេស៊ី។ នៅពេលនោះ លោក Tony Fernandes បានចំណាយលុយតែ ២៥សេនប៉ុណ្ណោះ ដើម្បីទិញយកក្រុមហ៊ុន AirAsia ដែលមានយន្តហោះកញ្ចាស់ៗ ២គ្រឿង ហើយមានជាប់ជំពាក់បំណុលគេរហូតដល់ទៅជាង ១០លានដុល្លារ។
នៅពេលនោះ ថ្វីដ្បិតតែទីផ្សារអាកាសចរណ៍នៅទូទាំងពិភពលោកកំពុងរំជើបរំជួល ដោយសារហេតុការណ៍ភេរវកម្ម ១១កញ្ញា តែលោក Tony Fernandes មានចក្ខុវិស័យមួយថា អនាគតនៃទីផ្សារអាកាសចរណ៍ គឺស្ថិតនៅក្នុងតំបន់អាស៊ី ពីព្រោះ អាស៊ី គឺជាតំបន់ដែលមានប្រជាជនច្រើន ហើយជាមួយនឹងកំណើនសេដ្ឋកិច្ចខ្ពស់ជារៀងរាល់ឆ្នាំ អ្នកដែលមានប្រាក់ចំណូលខ្ពស់ក៏នឹងមានចំនួនកើនឡើង ដែលបង្កើតទៅជាទីផ្សារប្រកបដោយសក្តានុពលមួយ សម្រាប់ក្រុមហ៊ុនអាកាសចរណ៍។
សម្រាប់លោក Tony Fernandes យុទ្ធសាស្រ្តគោល ក្នុងការអភិវឌ្ឍមុខជំនួញរបស់ក្រុមហ៊ុន AirAsia គឺការបង្កើតជាក្រុមហ៊ុនអាកាសចរណ៍ដែលលក់សំបុត្រក្នុងតម្លៃទាប (Low-Cost) ដើម្បីទាញយកអតិថិជនពីរប្រភេទ។ ទីមួយ គឺអតិថិជន ដែលគ្រាន់តែចង់ធ្វើដំណើរពីទីក្រុងមួយទៅក្រុងមួយទៀត ឬពីប្រទេសមួយទៅប្រទេសមួយទៀត ដោយចំណាយពេលតិច និងក្នុងតម្លៃសមរម្យ ដោយមិនទាមទារចង់បានសេវាកម្មល្អប្រណីត។ ទីពីរ គឺអ្នកមានប្រាក់ចំណូលមធ្យម ហើយដែលកាលពីមុន មិនធ្លាប់ធ្វើដំណើរតាមយន្តហោះ ដោយសារតែមិនមានលទ្ធភាពទិញសំបុត្រយន្តហោះរបស់ក្រុមហ៊ុនអាកាសចរណ៍ធំៗ ដែលមានតម្លៃថ្លៃ។
ជាមួយនឹងពាក្យស្លោក “Now Everyone Can Fly” ដែលមានន័យថា “ឥឡូវនេះអ្នកណាក៏អាចធ្វើដំណើរតាមយន្តហោះបាន” ក្រុមហ៊ុន AirAsia លក់សំបុត្រយន្តហោះក្នុងតម្លៃគិតជាមធ្យមតែប្រមាណជា ៥០ដុល្លារតែប៉ុណ្ណោះ។ ការលក់សំបុត្រក្នុងតម្លៃថោកនេះបានធ្វើឲ្យ AirAsia អាចទាក់ទាញអតិថិជនបានកាន់តែច្រើនពីមួយថ្ងៃទៅមួយថ្ងៃ ហើយបូករួមជាមួយនឹងការប្រើប្រាស់យន្តហោះប្រកបដោយប្រសិទ្ធភាព ដោយមិនទុកឲ្យយន្តហោះទំនេរនៅដីក្នុងរយៈពេលយូរ ក្រុមហ៊ុនអាកាសចរណ៍ ដែលហៀបនឹងក្ស័យធនមួយនេះ ក៏ចាប់ផ្តើមរកប្រាក់ចំណេញបាន នៅឆ្នាំ២០០២ ពោលគឺ តែមួយឆ្នាំប៉ុណ្ណោះ ក្រោយពីលោក Tony Fernandes ទិញយកពីរដ្ឋម៉ាឡេស៊ី។
បន្តិចម្តងៗ AirAsia ក៏បានពង្រីកផ្លូវហោះហើរ រហូតដល់បច្ចុប្បន្ននេះ AirAsia មានទិសដៅហោះហើរចំនួន ១២១ ក្នុងនោះ ក៏មានការហោះហើរទៅកាន់សៀមរាបប្រទេសកម្ពុជាផងដែរ។ កាលពីឆ្នាំ២០១៣កន្លងទៅ AirAsia ដឹកអ្នកដំណើរសរុបចំនួនប្រមាណជា ៨លាននាក់ ហើយរកប្រាក់ចំណូលបានរហូតដល់ទៅជាង ១០០លានដុល្លារអាមេរិក។
ក្រៅពីក្រុមហ៊ុនមេ ដែលមានមូលដ្ឋាននៅក្នុងប្រទេសម៉ាឡេស៊ី AirAsia ក៏មានសាខាជាច្រើនផងដែរ នៅតាមបណ្តាប្រទេសមួយចំនួន នៅអាស៊ី ដូចជា នៅថៃ ឥណ្ឌូណេស៊ី ហ្វីលីពីន និងឥណ្ឌា ជាដើម ហើយយន្តហោះដែលធ្លាក់ កាលពីថ្ងៃអាទិត្យ គឺជាជើងហោះហើររបស់សាខា AirAsia នៅឥណ្ឌូណេស៊ី។
នៅមុនពេលមានហេតុការណ៍ធ្លាក់យន្តហោះនេះ ក្រុមហ៊ុន AirAsia ត្រូវបានគេទទួលស្គាល់ថាជាក្រុមហ៊ុន ដែលមានប្រវត្តិសុវត្ថិភាពល្អ និងមានយន្តហោះថ្មីៗ ដែលសុទ្ធតែជាយន្តហោះរបស់ក្រុមហ៊ុន Airbus។
តាមពិត ក្រុមហ៊ុន AirAsia គឺជាអតិថិជនដ៏ធំបំផុតរបស់ក្រុមហ៊ុន Airbus ដោយគិតចាប់តាំងពីឆ្នាំ២០០២មក បានបញ្ជាទិញយន្តហោះ Airbus រហូតដល់ទៅជិត ៥០០គ្រឿង។ ការបញ្ជាទិញដ៏ធំចុងក្រោយ ត្រូវបានធ្វើ កាលពីពាក់កណ្តាលខែធ្នូ កន្លងទៅថ្មីៗនេះ គឺការបញ្ជាទិញយន្តហោះធុន A330 ចំនួន ៥៥គ្រឿង ដែលមានតម្លៃសរុប ១៥ពាន់លានដុល្លារ។ យន្តហោះដែលធ្លាក់ កាលពីថ្ងៃអាទិត្យ គឺជាយន្តហោះ Airbus ធុន A320៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ