បំណែកយន្តហោះAirAsia និងសាកសព ត្រូវបានរកឃើញក្នុងសមុទ្រ
ចុះផ្សាយនៅថ្ងៃ៖
ស្តាប់ - ០៥:៣២
យន្តហោះមួយគ្រឿងរបស់ក្រុមហ៊ុនAirAsia ដែលដឹកមនុស្ស១៦២នាក់ ហើយបានជួបគ្រោះថ្នាក់ធ្លាក់ កាលពីថ្ងៃអាទិត្យ ទី២៨ ធ្នូ ពេលនេះត្រូវបានអាជ្ញាធរឥណ្ឌូនេស៊ី ផ្តល់ព័ត៌មានថា ពួកគេបានរកឃើញ បំណែករបស់យន្តហោះនេះ ដែលអណ្តែតក្នុងសមុទ្រ នៅម្តុំចន្លោះកោះប័រណេអូ និងកោះស៊ូម៉ាត្រា។ ក្រុមអ្នករុករក ក៏បានប្រទះឃើញ សាកសពមនុស្ស អណ្តែតផងដែរ។
បំណែកយន្តហោះ និងសាកសពមនុស្សជាង៤០ ត្រូវបានរកឃើញ៖
អាជ្ញាធរឥណ្ឌូនេស៊ី ដែលជាក្រុមរករកយន្តហោះ ដែលបានជួបគ្រោះថា្នក់ បានផ្តល់ដំណឹង នៅរសៀលថ្ងៃអង្គារនេះ។ លោក អគ្គនាយកអាកាសចរស៊ីវិល របស់ឥណ្ឌូនេស៊ី បានរៀបចំសន្និសីទកាសែតមួយ ដើម្បីផ្តល់ដំណឹងដល់ក្រុមគ្រួសារជនរងគ្រោះ។ លោកបាននិយាយថា នៅម៉ោងប្រមាណជា ១-៣០នាទី រសៀស ក្រុមអ្នករុករក បានប្រទះឃើញ វត្ថុមួយចំនួន អណ្តែតលើទឹកសមុទ្រព្រមទាំងមានវត្ថុមួយទៀត ដែលទំនងប្រហែលជាសាកសពមនុស្ស ដែលអណ្តែត។
ក្រោយមកបន្តិច អាជ្ញាធរបានចេញ មកបញ្ជាក់ម្តងទៀតថា វត្ថុដែលអណ្តែត លើទឹកសមុទ្រនោះ ពិតជាសាកសពមនុស្សមែន តែថាជាសាកសព របស់អ្នកជិះយន្តហោះមែន រឺមិនមែន គេមិនទាន់អាចនិយាយបានទេ។ ទូរទស្សន៍ ឥណ្ឌូនេស៊ី ក៏បានផ្សាយរូបភាព សាកសពមនុស្ស អណ្តែតក្នុងទឹកសមុទ្រ ផងដែរ។ អាជ្ញាធរ ក៏បានបញ្ជាក់ទៀតថា បំណែកវត្ថុផ្សេងទៀត ដែលគេរកឃើញអណ្តែត អាចជា ទ្វារយន្តហោះ អាវពោង ជើងទម្រដាក់ឥវ៉ាន់អ្នកដំណើរ និងកញ្ចប់ស្ពានពោងខ្យល់ របស់យន្តហោះ។ យន្តហោះស៊ើបការណ៍ ដែលហោះស្រាវជ្រាវរកដានយន្តហោះ ក៏បានឃើញ ស្រមោលក្នុងបាតសមុទ្រ ដែលមានទ្រង់ទ្រាយ ស្រដៀងនឹង យន្តហោះដែរ។
សូមបញ្ជាក់ផងដែរ ថាដោយផ្អែកទៅលើរយៈពេលហោះហើររបស់យន្តហោះ មុនពេលជួបគ្រោះថ្នាក់ អាជ្ញាធរបានសន្និដ្ឋានថា យន្តហោះអាចធ្លាក់ក្នុងសមុទ្រហ្សាវ៉ា នៅចន្លោះកោះប័រណេអូ និងកោះស៊ូម៉ាត្រា របស់ឥណ្ឌូនេស៊ី។ ពេលនេះ ក្រុមអ្នករុករក បានពង្រីក ផ្ទែក្រឡានៃតំបន់ដែលត្រូវរុករក ព្រោះថា រលក និងខ្យល់ អាចបោកបក់សំណាត់ ទៅទីឆ្ងាយៗ ដាច់ពីគ្នា។
សហរដ្ឋអាមេរិក ក៏បានបញ្ជូននាវាចម្បាំងមួយគ្រឿង ទៅជួយអាជ្ញាធរឥណ្ឌូនេស៊ី ក្នុងការស្វែងរកក្នុងសមុទ្រ។ ដូចគ្នាដែរ អូស្រា្តលី សឹង្ហបុរី ម៉ាឡេស៊ី បានបញ្ជូនយន្តហោះស៊ើបការណ៍ ជាច្រើនគ្រឿង ដើម្បីសហការជាមួយឥណ្ឌូនេស៊ី ក្នុងការស្វែងរក បំណែកយន្តហោះ និងសាកសពមនុស្ស។
តាមព័តមានចុងក្រោយ ដែលយើងទើប ទទួលបានពីភ្នាក់ងារ ព័ត៌មាន Reuters បានឲ្យដឹងថា ទាហានជើងទឹក ឥណ្ឌូនេស៊ី ទើបតែបាន ស្រង់សាកសពមនុស្ស ចំនូនជាង៤០ ចេញពីទឹកសមុទ្រ។ ដូច្នេះ វាគ្មានអ្វី គួរឲ្យសង្ស័យទៀតទេ ថាយន្តហោះ ពិតជាបានធ្លាក់ ចូលទៅក្នុងសមុទ្រហ្សាវ៉ា ប្រាកដមែន
ឥណ្ឌូនេស៊ីដឹកនាំការស៊ើបអង្កេត ទាំងខ្វះមុខខ្វះក្រោយ៖
តាមធម្មតា គ្រោះថ្នាក់កើតឡើងនៅប្រទេសណា ប្រទេសនោះ ជាអ្នកមានទួនាទី ក្នុងការស៊ើបអង្កេត ស្វែងរកមូលហេតុនៃការធ្លាក់ តាំងពីដើមដល់ចប់។ ក្នុងករណីនេះ គ្រោះថ្នាក់បានកើតឡើងនៅប្រទេសឥណ្ឌូនេស៊ី ដូចនេះ គឺឥណ្ឌូនេស៊ី ដែលជាអ្នកមានទួនាទីស៊ើបអង្កេត។ ប៉ុន្តែ ម៉ូនីកា គេអាចប្រគល់ ការសហការក្នុងការស៊ើបអង្កេត ទៅឲ្យ ប្រទេសផ្សេងទៀតដែរ ដូចជាប្រទេសដែលជាម្ចាស់ក្រុមហ៊ុនអាកាសចរណ៍ និងប្រទេសអ្នកផលិតយន្តហោះ ដែលធ្លាក់ផ្ទាល់តែម្តង។ ដូចគ្នាដែរ ប្រទេសដែលមានប្រជាជនស្លាប់ក្នុងហេតុការណ៍នេះ ក៏អាចចូលរួមក្នុងការស៊ើបអង្កេតដែរ។
យើងដឹងហើយថា យន្តហោះនេះ ជាប្រភេទយន្តហោះ Airbus-A320 ដែលផលិតដោយ ក្រុមហ៊ុនAirbus របស់ បារាំង។ ដូចនេះ បារាំងអាចបញ្ជូន អ្នកជំនាញរបស់គេ ទៅចូលរួមសហការក្នុងការស៊ើបអង្កេត។ និយាយពីក្រុមហ៊ុនអាកាសចរណ៍ វិញ តាមពិតទៅក្រុមហ៊ុនAirAsia គឺជាក្រុមហ៊ុនដែលចុះបញ្ជីរនៅប្រទេសម៉ាឡេស៊ី ក៏ពិតមែន ប៉ុន្តែយន្តហោះដែលបានធ្លាក់ មិនមែនជារបស់ក្រុមហ៊ុនAirAsia ម៉ាឡេទេ តែជា របស់សាខាមួយរបស់ក្រុមហ៊ុននេះ ដែលបានចុះបញ្ជីរ នៅឥណ្ឌូនេស៊ី។ ចំណែកអ្នកដំណើរដែលនៅលើយន្តហោះវិញ ភាគច្រើន ជាជនជាតិឥណ្ឌូនេស៊ី ទាំងអស់។ ក្រៅពីនោះ មានកូរ៉េម្នាក់ ម៉ាឡេស៊ី ៣នាក់ អង់គ្លេសម្នាក់ និងបារាំងម្នាក់ ប៉ុណ្ណោះ។
ដូច្នេះ យើងឃើញថា ឥណ្ឌូនេស៊ី សឹងតែត្រូវ រ៉ាប់រងការស៊ើបអង្កេតតែឯង បើសិនជាប្រទេសពាក់ព័ន្ធដ៏ទៃទៀត គេមិនមក សុំចូលរួមសហការទេ។ ប៉ុន្តែ ម៉ូនីកា ឥណ្ឌូនេស៊ី ធ្លាប់បានបញ្ជាក់ហើយថា ខ្លួនគ្មានលទ្ធភាព និងសម្ភារៈទំនើបៗ ឯណា ឲ្យបាន គ្រប់គ្រាន់សម្រាប់ការស្រាវជ្រាវ រក ប្រអប់ខ្មៅ នៅក្នុងបាតសមុទ្រទេ។ ឥណ្ឌូនេស៊ី អាចនឹងជួបការលំបាក បើសិនជាគ្មានជំនួយពីគេឯង។
អាកាសធាតុអាក្រក់ អាចជាមូលហេតុធ្វើឲ្យយន្តហោះធ្លាក់៖
មូលហេតុ អាចមានច្រើន គួបផ្សំគ្នា ដែលយើងមិនទាន់អាចស្មានបានទេ ក្នុងពេលនេះ ដ៏រាបណាគេមិនទាន់រកប្រអប់ខ្មៅ របស់យន្តហោះឃើញ។ មានតែប្រអប់ខ្មៅទេ ដែលអាចឲ្យយើងសន្និដ្ឋានបាន ព្រោះវាបានកត់ទុក នូវទិន្នន័យហោះហើរ របស់យន្តហោះទាំងស្រុង ព្រមទាំងការឆ្លើយឆ្លងគ្នារបស់អ្នកបើកបរ ជាមួយក្រុមការងារលើយន្តហោះ។
រហូតមកដល់ពេលនេះ អាជ្ញាធរឥណ្ឌូនេស៊ី គ្រាន់តែបានប្រាប់ឲ្យដឹងត្រួសៗ ពីការឆ្លើយឆ្លងគ្នា រវាងអាកាសយានិក និងអ្នកត្រួតពិនិត្យការហោះហើរ ប្រចាំការនៅព្រលានយន្តហោះស៊ូរ៉ាបាយ៉ា។ អាជ្ញាធរប្រាប់ថា មុនពេលចេញដំណើរបន្តិច អាកាសយានិក បានស្នើសុំ ហោះឲ្យបានខ្ពស់ លើសពីកំពស់ដែលបានគ្រោងទុក ដើម្បីចៀសពីផ្លូវដែលមានខ្យល់ និងព្យុះខ្លាំង។ ប៉ុន្តែការស្នើសុំនេះ ត្រូវបានបដិសេធ ដោយសារផ្លូវហោះហើរ ខាងលើ មានលក្ខណៈចង្អៀត ព្រោះមានយន្តហោះច្រើនពេក ក្នុងពេលនោះ។
បន្ទាប់មកទៀត ពេលកំពុងហោះហើរ អាកាសយានិក បានស្នើសុំ បត់ទៅខាងឆ្វេងបន្តិច ដើម្បីគេច ម្តុំដែលមានសម្ពាធខ្លាំង។ ការស្នើសុំនេះ ក៏ត្រូវបានអ្នកត្រូតពិនិត្យ នៅខាងក្រោម យល់ព្រម។ ប៉ុន្មាននាទីក្រោយមក អ្នកបើកបរ បានសុំហោះឡើងទៅខ្ពស់ម្តងទៀត ប៉ុន្តែ អ្នកបញ្ជាខាងក្រោម មិនព្រម ដោយសារខាងលើ កំពុងមានយន្តហោះ ហោះកាត់។ បីនាទីក្រោយមក អ្នកបញ្ជាខាងក្រោម រៀបនឹងឲ្យសញ្ញា ថាព្រមឲ្យហោះទៅខាងលើបាន ប៉ុន្តែយន្តហោះ បានបាត់ចេញពីរ៉ាដា លែងឲ្យសញ្ញាអ្វីទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ