តើអ្វីជាសម្មតិកម្ម នៃការបាត់យន្តហោះ AirAsia ប្រភេទ Airbus ៣២០-២០០ ?
ចុះផ្សាយនៅថ្ងៃ៖
ការស្វែងរកយន្តហោះ airAsia ប្រភេទអ៊ែរប៊ូស ៣២០ នៃក្រុមហ៊ុនម៉ាឡេស៊ី បានចូលដល់ថ្ងៃទីពីរហើយ ! ក្រុមការងារឥណ្ឌូណេស៊ី កំពុងវែករកទីតាំងចុងក្រោយដែលយន្តហោះអ៊ែរប៊ូល បាត់ពីប្រព័ន្ធរ៉ាដា។ ប្រតិបត្តិការស្វែងរកយន្តហោះកំពុងបន្ត ដោយមានការចូលរួមពីសំណាក់បណ្តាប្រទេសជិតខាងជាច្រើន អូស្ត្រាលី សិង្ហបុរី ម៉ាឡេស៊ី។ ចិន សហរដ្ឋអាមេរិក បារាំងដែលជាម្ចាស់ផលិតយន្តហោះក៏បានស្នើសុំចូលជួយស្វែងរកដែរ។ នៅមុននេះបន្តិច អាជ្ញាធរឥណ្ឌូណេស៊ី បានព្រលយព័ត៌មានថា យន្តហោះមានផ្ទុកមនុស្ស១៦២នាក់ ទំនងជាធ្លាក់ ហើយលិចក្នុងបាតសមុទ្ទ។ នេះជាលើកទីបីហើយ ក្នុងរយៈពេលមិនដល់មួយឆ្នាំផង ដែលម៉ាឡេស៊ីបានបាត់យន្តហោះដឹកអ្នកដំណើរយ៉ាងដូច្នេះ ?
ភ្នាក់ងារអ្នកដឹកនាំប្រតិបត្តិការស្វែងរកយន្តហោះ សង្ឃឹមថានឹងអាចរកឃើញដានដោយឆាប់ ព្រោះផ្ទៃមេឃស្រឡះល្អនៅថ្ងៃចន្ទនេះ ឯចំណែកតំបន់រុករកមានទំហំប្រមាណតែ៦៥០០គីឡូម៉ែត្រ ពោលខ្លី និងតូចជាង ប្រតិបត្តិការស្វែងរកយន្តហោះMH370 ដែលធ្លាក់បាត់កាលពីខែមីនាឆ្ងាយណាស់។
នាវា យន្តហោះ ឧទ្ធម្ភាគចក្រ ជាច្រើនគ្រឿងកំពុងធ្វើប្រតិបត្តិការរុករកយន្តហោះ នៅក្បែរកោះបេលីតុង ដែលស្ថិតនៅចន្លោះកោះស៊ូម៉ាត្រា និងកោះប័រនេអូរបស់ឥណ្ឌូណេស៊ី បើយោលទៅតាមរយៈពេលនិងរយៈចម្លាយហោះហើរ ព្រោះយន្តហោះបានផ្តាច់ទំនាក់ទំនងនិងបាត់ស្រមោល នៅពេលហោះឡើងបានទើបតែប្រមាណ៤២នាទី។ ដូច្នេះទើបគេសន្និដ្ឋានថា គឺត្រូវចំលើតំបន់នេះហើយ។ ប៉ុន្តែគេមិនអាចដឹង ថាចំណុចណា ឬកន្លែងណា ច្បាស់លាស់ណាស់ ដោយហេតុតែយន្តហោះមិនបានផ្តល់សញ្ញាអាសន្នមុននឹងបាត់ខ្លួន។
អូស្ត្រាលី សិង្ហបុរី និងម៉ាឡេស៊ី ក៏បានបញ្ជូននាវានិងយន្តហោះមកដល់កន្លែងកើតហេតុ ដើម្បីចូលរួមចំណែកក្នុងប្រតិបត្តិការស្វែងរកយន្តហោះAirasia។ ប្រទេសផ្សេងទៀត ដូចយ៉ាងចិន សហរដ្ឋអាមេរិក ភ្នាក់ងារអង្កេតអាកាសចរណ៍បារាំង ក៏បានស្នើសុំចូលជួយដែរ។ បារាំងគឺជាប្រទេសអ្នកផលិតយន្តហោះAirasiaនេះតែម្តង។
ចូលមកថ្ងៃទីពីរនៃការស្វែងរកនេះ អាជ្ញាធរឥណ្ឌូណេស៊ីបានអះអាងយន្តហោះទំនងជាធ្លាក់ប៉ះទឹករួចលិចក្នុងបាតសមុទ្ទ។ ជាមួយទឹកសមុទ្ទក្នុងសីតុណ្ហភាព៣០អង្សារ អ្នករុករកអាចមានសង្ឃឹមមួយទៀត គឺរកឃើញអ្នកដំណើរអាចនៅមានជីវិត
ក្រុមរុករកនិងសង្គ្រោះឥណ្ឌូណេស៊ី មានបទពិសោធន៍ខ្ពស់
ជាមួយនឹងការឆ្លងកាត់គ្រោះធ្លាក់យន្តហោះញយៗ ក្រុមអង្កេតឥណ្ឌូណេស៊ី ជាក្រុមការងារមានបទពិសោធន៍ខ្ពស់ ៖ កាលពីខែមេសា ២០១៣ យន្តហោះប្រភេទប៊ូអ៊ីន ៧៣៧របស់ក្រុមហ៊ុន លីយ៉ុងអ៊ែរ បានធ្លាក់នៅបាលី ហើយកាលពីមួយឆ្នាំនៅខែឧសភា២០១២ ត្រូវជួយសង្គ្រោះនិងស្វែងរកយន្តហោះដឹកអ្នកដំណើរតំបន់ ដឹកមនុស្ស៤៥នាក់ធ្លាក់ពេលហោះសាកល្បង។
ទីតាំងភូមិសាស្ត្រឥណ្ឌូណេស៊ី មានកោះប្រជុំកោះដល់ទៅ ១៨០០០ ពិតជាមិនអំណោចផលខាងសង្គ្រោះទេ ដូច្នេះហើយបានជាក្រុមការងារនេះអាចប្រមូលបទពិសោធន៍បានច្រើន ទទួលស្គាល់នៅលើពិភពលោកតែម្តង។ អ្នកអង្កេតការណ៍ឥណ្ឌណេស៊ីផ្នែកអាកាសចរណ៍ ធ្វើការដោយទៀងទាត់ជាមួយសមភាគីបរទេស មិនថាជាមួយការិយាល័យអង្កេតនិងវិភាគអាកាចរណ៍បារាំង ឬ ភ្នាក់ងារសន្តិសុខដឹកជញ្ជូនអាមេរិកទេ។
ជាមួយនឹងសមត្ថភាពនិងបទពិសោធន៍ដូច្នេះ ទើបគ្រប់គ្នាមានសង្ឃឹមថានឹងអាចរកឃើញយន្តហោះAirasia ទោះបីជាអាកាសធាតុមិនអំណោចផលយ៉ាងណាក៏ដោយ ! ក្រុមការងារឥណ្ឌូណេស៊ីបានត្រៀមជាស្រេច ប្រើនាវាដ្រូន គ្មានមនុស្សបើក ដើម្បីអាចសាងការងារពីមនុស្ស។
សម្មតិកម្មនៃការធ្លាក់យន្តហោះ
ថៅកែក្រុមហ៊ុន និងអាជ្ញាធរម៉ាឡេស៊ី បានបញ្ជាក់យ៉ាងទទូច មិនចង់ឃើញមានការបំបោង គេងចំណេញព័ត៌មានអ្វី ទាក់ទងនឹងការបាត់យន្តហោះលើកនេះឡើយ។ នាយករដ្ឋមន្ត្រីអូស្ត្រាលី ក៏បានអំពាវនាវកុំឱ្យភ្ជាប់ ឬប្រៀបប្រដូចការបាត់យន្តហោះAirasiaម្សិលមិញ ទៅនឹងការបាត់យន្តហោះ MH៣៧០ កាលពីខែមីនា ដែលជាករណីដ៏ចម្លែកប្រចាំសតវត្ស តែហេតុការណ៍មិ្សលមិញគឺមិនដូច្នោះឡើយ។
ទំនាក់ទំនងចុងក្រោយរវាងក្រុមអ្នកបើកបរយន្តហោះ និងប៉ុស្តិ៍ត្រួតពិនិត្យ គឺស្នើសុំការអនុញ្ញាតប្តូរផែនការហោះហើរ។ អាកាសធាតុមិនល្អ អ្នកបើកចង់ហោះឱ្យខ្ពស់ផុតពពកអ័ព្ទ ជាសំណើដែលតែងកើតមានញឹកញយ តែការបញ្ចេញសកម្មភាពអាចជួបភាពប្រថុយប្រថាន ព្រោះបើយន្តហោះឡើងខ្ពស់ពេក លើសសមត្ថភាព យន្តហោះក៏អាចធ្លាក់ដែរ។ ប្រសិនបើដូចសម្មតិកម្មនេះ យន្តហោះទំនងជាធ្លាក់និងលិចក្នុងបាតសមុទ្ទម្តុំកោះ បេលីតុង ដែលក្រុមរុករកកំពុងផ្តុំកម្លាំង។
Airasiaជាក្រុមហ៊ុនលក់សំបុត្រថោកមែន ប៉ុន្តែសម្រាប់អ្នកឯកទេសអាកាសចរណ៍ គឺគ្មានពាក់ព័ន្ធនឹងបញ្ហាសន្តិសុខ សុវត្ថិភាពហោះហើរឡើយ ព្រោះក្រុមហ៊ុនថោក តែងជ្រើសរើសយន្តហោះល្អ ដើម្បីកុំឱ្យចំណាយច្រើនផ្នែកជួសជុល។ យ៉ាងណាមិញ យន្តហោះAirasia នេះ ថ្មីមានអាយុទើប១៣ឆ្នាំ ទំនើប ១០០%អ៊ែរប៊ូស មានឈ្មោះជាក្រុមហ៊ុនល្អជាងគេបំផុត នៅលើពិភពលោក នៅឆ្នាំ២០០៩។ ប៉ុន្តែយ៉ាងណាក៏ដោយ ក៏នៅព្រឹកថ្ងៃចន្ទនេះ ភាគហ៊ុនរបស់ក្រុមហ៊ុន នៅក្រុងកូឡាឡាំងពួរ បានដាំក្បាលធ្លាក់ចុះអស់៨%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ