ក្រុមតាលីបង់វាយប្រហារមូលដ្ឋានទ័ពអាកាសភាគខាងជើងប៉ាគីស្ថាន
ក្រុមឧទ្ទាមតាលីបង់បានធ្វើការវាយឆ្មក់ ក្នុងវេលាទៀបភ្លឺ ព្រឹកថ្ងៃសុក្រនេះ នៅមូលដ្ឋានទ័ពអាកាសមួយ នៅជាយក្រុងប៉េឆាវ៉ារ ភាគខាងជើងប្រទេសប៉ាគីស្ថាន។ ការបាញ់តបតគ្នា រវាងទាហានប៉ាគីស្ថាន និងក្រុមតាលីបង់ បានបណ្តាលឲ្យស្លាប់មនុស្ស យ៉ាងហោចណាស់ ១៧នាក់។ នេះជាការវាយប្រហារថ្មីមួយទៀត ពីសំណាក់ក្រុមតាលីបង់ បន្ទាប់ពីក្រុមនេះ បានចូលមកបាញ់រះ សម្លាប់ក្មេងសិស្សសាលា ចំនួន១៥០នាក់ កាលពីខែធ្នូឆ្នាំ២០១៤ នៅក្នុងក្រុងប៉េឆាវ៉ារនេះដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នៅពេលព្រឹកព្រហាមស្រាងៗ សម្លេងផ្ទុះគ្រាប់បែក និងគ្រាប់កាំភ្លើង បានលាន់ឮរន្ធាន់ឡើង ចេញពីមូលដ្ឋានទ័ពអាកាសមួយ របស់ប៉ាគីស្ថាន ដែលស្ថិតនៅជាយក្រុងប៉េឆាវ៉ារ ភាគខាងជើងបង្អស់របស់ប៉ាគីស្ថាន។ អ្នកនាំពាក្យកងទ័ពប៉ាគីស្ថាន បានបញ្ជាក់ឲ្យដឹងថា នេះជាស្នាដៃរបស់ក្រុមឧទ្ទាមតាលីបង់ ដែលមានគ្នាវា ប្រហែលជាជាង១០នាក់ ដែលបានវាយឆ្មក់ បន្ទាយទាហានទ័ពអាកាសរបស់ប៉ាគីស្ថាន។
ការបាញ់តបតគ្នា បានផ្ទុះឡើងភ្លាមៗ ដោយកងទ័ពប៉ាគីស្ថាន បានឡោមព័ទ្ធក្រុមតាលីបង់ មិនឲ្យរត់ចេញត្រឡប់ទៅវិញ។ នៅក្បែរកន្លែងកើតហេតុ មានវិហារម៉ូស្កេមួយ ដែលមានមនុស្សកំពុងតែជួបជុំគ្នាសូត្រធម៌ ហើយដែលត្រូវបានក្រុមតាលីបង់ ចូលទៅបន្លំសំងំលាក់ខ្លួន។ មានមនុស្សនៅក្នុងវិហារម៉ូស្កេ បានស្លាប់ចំនួន ១៦នាក់ ប៉ុន្តែគេមិនទាន់ដឹងថាមានពួកតាលីបង់ ក្នុងចំណោមនោះ រឺមួយក៏សុទ្ធសឹងជាប្រជាជនសាមញ្ញទេ។ ទាហានប៉ាគីស្ថានម្នាក់ ក៏បានស្លាប់ ក្នុងហេតុការណ៍នេះផងដែរ។ នេះគ្រាន់តែជាតួលេខបឋម ហើយការរុករក ក្រុមឧទ្ទាម ដែលកំពុងតែពួនសំងំលាក់ខ្លួន នៅតែបន្តមិនទាន់ចប់នៅឡើយ។
សូមបញ្ជាក់ថា នេះជាការវាយប្រហារ យ៉ាងចេញមុខរបស់ក្រុមឧទ្ទាមដែលមានឈ្មោះថា ក្រុម Tehreek-e-Taliban Pakistan ដែលជាក្រុមកើតឡើង ដោយការរួមផ្សំនូវអតីតក្រុមឧទ្ទាមអ៊ីស្លាម ដែលបានធ្វើការប្រយុទ្ធប្រឆាំងនឹងរដ្ឋាភិបាលប៉ាគីស្ថាន តាមរយៈការធ្វើភេរវកម្មអត្តឃាត ជាច្រើនករណី។ គេនៅមិនភ្លេចទេ កាលពីខែធ្នូកន្លងទៅ ក្រុមនេះហើយ ដែលបានធ្វើភេរវកម្ម នៅក្នុងសាលារៀនមួយ នៅក្រុងប៉េឆាវ៉ារ ដោយបានបាញ់រះ សម្លាប់ក្មេងសិស្សសាលា ចំនួនប្រមាណជា១៥០នាក់ យ៉ាងព្រៃផ្សៃជាទីបំផុត។
ជាការឆ្លើយតប ទាហានប៉ាគីស្ថាន បានបន្ថែមការវាយប្រហារ ដើម្បីបំបែកសំបុកក្រុមនេះ ដែលបានលាក់ខ្លួន នៅតាមរូងភ្នំដាច់ស្រយាល នៅភាគខាងជើង ដែលធ្លាប់ជាអតីត ជុំរំលាក់ខ្លួន របស់ពួកអាល់កាអីដា។ មិនត្រឹមតែប៉ុណ្ណោះ អាជ្ញាធរប៉ាគីស្ថាន បានចាប់ផ្តើមធ្វើការកាត់ទោសប្រហារជីវិត សាជាថ្មី ទៅលើជនសង្ស័យ ដែលជាក្រុមអ៊ីស្លាមជ្រុលនិយម។ បើគិតពីដើមឆ្នាំ២០១៥មក ប៉ាគីស្ថានបានព្យួរកមនុស្ស ជាង២០០នាក់ហើយ ដែលភាគច្រើន ពុំមានសាវនការកាត់ក្តីឲ្យបានច្បាស់លាស់នោះទេ។ ក្រុមសកម្មជនការពារសិទ្ធិមនុស្ស បានបរិហារសកម្មភាពនេះ ហើយបានអំពាវនាវឲ្យរដ្ឋាភិបាល លប់ចោលទោសប្រហារជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ