ប៉ាគីស្ថាន៖មរណភាពអតីតប្រមុខក្រសួងស៊ើបការណ៍សម្ងាត់ដ៏មានឥទ្ធិពល និងបង្កប់ដោយរឿងអាស្រូវ
នៅក្នុងប្រទេសប៉ាគីស្ថាន រដ្ឋអំណាចបានប្រកាសឲ្យដឹងនៅថ្ងៃអាទិត្យ ទី១៥ សីហាពីមរណភាពលោកឧត្តមសេនីយហាមីដ ហ្គុល អតីតប្រមុខក្រសួងស៊ើបការណ៍សម្ងាត់ដ៏មានឥទ្ធិពលម្នាក់។ ស្លាប់ក្នុងអាយុ ៧៩ឆ្នំាដោយជម្ងឺ ឧត្តមសេនីយហាមីដ ហ្គុលជាឥស្សរជនម្នាក់ដែលទទួលបានការគំាទ្រពីក្រុមអ្នកជាតិនិយមនៅប៉ាគីស្ថាន តែទទួលការរិះគន់ពីប្រទេសឥណ្ឌាជិតខាង។ តើលោកឧត្តមសេនីយហាមីដ ហ្គុលមានប្រវត្តិរូបសង្ខេបយ៉ាងម៉េចខ្លះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
កងទ័ព គឺជាអាជីពដែលលោកហាមីដ ហ្គុលបានបំពេញក្នុងមួយជីវិតរបស់លោកតំាងពីអាយុ ១៨ឆ្នំាមកម្ល៉េះ។ ក្នុងឆ្នំា ១៩៦៥ លោកហាមីដបានចូលរួមធ្វើសង្រ្គាមប្រឆំាងនឹងប្រទេសឥណ្ឌាជិតខាង។ ក្រោយពីបានបញ្ចប់ការសិក្សានៅសាលាយោធាជាន់ខ្ពស់ក្នុងទីក្រុងកឹតតាមក លោកហាមីដក៏បានឡើងបុណ្យសក្តិលឿងដូចកំាជណ្តើររហូតដល់ក្លាយជាប្រមុខដឹកនំាក្រសួងស៊ើបការណ៍សម្ងាត់ពីឆ្នំា ១៩៨៧ ដល់ឆ្នំា ១៩៨៩។ កាន់តំណែងប្រមុខដឹកនំាក្រសួងស៊ើបការណ៍សម្ងាត់បានរយៈពេលខ្លីមែន តែវាចំនឹងកាលៈទេសៈមួយដែលស្ថានការណ៍ក្នុងតំបន់មានការក្រឡាប់ចាក់យ៉ាងខ្លំាង ពោលជាសម័យកាលនៃបិទបញ្ចប់សង្រ្គាមរវាងប្រទេសអាហ្វហ្កានីស្ថាន និងសហភាពសូវៀត ព្រមទំាងជាសម័យកាលនៃការចាប់ផ្តើមមានការងើបបះបោរប្រឆំាងនឹងវត្តមានពលរដ្ឋឥណ្ឌានៅក្នុងតំបន់ Cachemire។
ចូលនិវត្តន៍តំាងពីឆ្នំា ១៩៩២ មែន តែឧត្តមសេនីយហាមីដ ហ្គុលនៅបន្តមានឥទ្ធិពលយ៉ាងខ្លំាងនៅក្នុងផ្នែកសន្តិសុខជាតិ។ ឧត្តមសេនីយ៍ចូលនិវត្តន៍រូបនេះចូលចិត្តឲ្យគេអញ្ជើញលោកទៅអន្តរាគមន៍តាមទូរទស្សន៍ដើម្បីនិយាយពីបញ្ហាប្រទេសជាតិ ក៏ដូចជាបញ្ហាដទៃទៀតនៅក្នុងតំបន់។ តែជាទូទៅ ឧត្តមសេនីយហាមីដមិនញញើតនឹងនិយាយវាយប្រហារប្រទេសឥណ្ឌា និងអាមេរិកទេ។ គួររម្លឹកជូនថា ពិតមែនតែលោកហាមីដធ្លាប់ជាអតីតសម្ព័ន្ធមិត្តរបស់ CIA អាមេរិកំាងក៏ដោយ ក៏នៅទីបំផុត លោកហាមីដបែរជាបានក្លាយជាសត្រូវទី១ អាមេរិកទៅវិញ។ ក្រៅពីបានគំាទ្រសកម្មភាពរបស់មេភេរវជនអ៊ូសាម៉ា បិនឡាដិន ឧត្តមសេនីយហាមីដក៏ត្រូវបានគេស្គាល់ជាអាណាព្យាបាលរបស់ពួកតាលីបង់ដែរ។
គឺប្រទេសប៉ាគីស្ថានដែលបានជួយហ្វឹកហ្វឺនក្រុមបះបោរឲ្យប្រឆំាងសហភាពសូវៀតក្នុងទសវត្សឆ្នំា ៨០ បន្ទាប់មក គឺប៉ាគីស្ថានដដែលនេះហើយដែលបានជួយជ្រោមជ្រែង ទំនុកបម្រុងពួកតាលីបង់របស់ម៉ូឡា អូម៉ាឲ្យឡើងកាន់អំណាចនៅក្នុងប្រទេសអាហ្វហ្កានីស្ថាននាពាក់កណ្តាលទសវត្សឆ្នំា ៩០។ ថ្មីៗនេះទៀត ឧត្តមសេនីយហាមីដមិនបានលាក់កំបំាងពីសមានចិត្តរបស់ខ្លួនចំពោះមេចលនាអ៊ីស្លាមនិយមជ្រុល និងគំាទ្រឲ្យមានការងើបបះបោរផ្លូវអាវុធនៅអាហ្វហ្កានីស្ថាន និងនៅតំបន់ Cachemire ឥណ្ឌាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ