លោកអូបាម៉ាសន្យាបើកអង្កេតស៊ីជម្រៅ ខណៈដែលអ.ស.ប.ចាត់ទុកជាឧក្រិដ្ឋកម្មសង្គ្រាម
ប្រធានាធិបតីអាមេរិក លោក បារ៉ាក់ អូបាម៉ា បានសន្យាធ្វើអង្កេតបន្ថែមឱ្យបានលម្អិតស៊ីជម្រៅ ទាក់ទងនឹងការវាយប្រហារផ្លូវអាកាសលើមន្ទីររបស់អង្គការគ្រូពេទ្យគ្មានព្រំដែន នៅក្រុងគូនឌូស្ស ប្រទេសអាហ្វហ្កានីស្ថាន កាលពីម្សិលមិញ ដែលបានបង្កឱ្យមានមនុស្សស្លាប់១៩នាក់ និងរងរបួសជាច្រើននាក់។ ការវាយប្រហារដែលកងទ័ពអាកាសអាមេរិកទំនងជាដៅទិសច្រឡំ។ ប៉ុន្តែសម្រាប់អង្គការសហប្រជាជាតិ ការវាយប្រហារផ្លូវអាកាសអាចចាត់ទុកជាឧក្រិដ្ឋកម្មសង្គ្រាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
លោកអូបាម៉ា បានប្រកាសចូលរួមរំលែកទុក្ខដ៏ជ្រាលជ្រៅ ក្រោយហេតុការណ៍វាយប្រហារលើមន្ទីរពេទ្យនៅគូនឌូស្ស ដែលផ្តាច់ជីវិតបុគ្គលិកអង្គការគ្រូពេទ្យគ្មានព្រំដែន១២នាក់ និងអ្នកជំងឺ៧នាក់ ក្នុងនោះបីនាក់ជាកុមារ។ ប៉ុន្តែលោកបានសំណូមពរឱ្យគ្រប់គ្នារង់ចាំលទ្ធផលអង្កេតបន្ថែមសិន មុននឹងកំណត់អំពីដើមហេតុនាំឱ្យមានសោកនាដកម្ម។ ភាពប្រុងប្រយ័ត្ននេះ បានរបូតចេញពីមាត់តំណាងអូតង់ប្រចាំនៅអាហ្វហ្កានីស្ថាន តាំងពីម្សិលមិញ ដោយបានអះអាងថា ការវាយប្រហារផ្លូវអាកាសលើពួកតាលីបង់ពិតជាអាចបង្កការខូចខាតដល់តំបន់ជិតខាងមែន។
ប៉ុន្តែសម្រាប់អង្គការសហប្រជាជាតិ ដែលបានបញ្ចេញប្រតិកម្មគ្មានបង្អង់ដែរ បានចាត់ទុកការទម្លាក់គ្រាប់បែកអាមេរិក ថាមិនអាចអត់ទោសឱ្យបានទេ ! ការវាយប្រហារតាមផ្លូវអាកាសអាចនឹងត្រូវប្រឈមមុខនឹងតុលាការពីបទ ឧក្រិដ្ឋកម្មសង្គ្រាមផង។ នេះបើតាមសេចក្តីប្រកាសរបស់ឧត្តមស្នងការសិទ្ធិមនុស្សអង្គការសហប្រជាជាតិ។
ជាអ្នករងគ្រោះផ្ទាល់ អង្គការគ្រូពេទ្យគ្មានព្រំដែន បានសម្តែងការខឹងសម្បារយ៉ាងខ្លាំង។ ព្រោះ បន្ទាប់ពីបានរងគ្រាប់ទីមួយ និងប្រាប់ដំណឹងដល់ទាហានអាហ្វហ្កានីស្ថាននិងអាមេរិកហើយ មន្ទីរពេទ្យបានបន្តរងការវាយប្រហាររយៈពេល៤៥នាទីទៀត។ អង្គការក្រៅរដ្ឋាភិបាលដែលជាអ្នកគ្រប់គ្រងមន្ទីរពេទ្យនៅគូនឌូស្ស ជាទីរំពឹងរបស់ជនស៊ីវិលអាហ្វហ្កានីស្ថាន បានទាមទារតម្លាភាព និងបានបដិសេធមិនទទួលយកពាក្យ “ការខូចខាតប៉ះពាល់តំបន់ជិតខាង” ជំនួស សោកនាដកម្មជាក់ស្តែងនេះទេ។
បើតាមអ្នកទទួលខុសត្រូវអាមេរិក ការអង្កេតនឹងផ្ចង់ទៅលើតួនាទីរបស់យន្តហោះចម្បាំង AC-១៣០ ដែលមានបំពាក់កាណុងជាច្រើន សម្រាប់ចេញធ្វើប្រតិបត្តិការផ្លូវអាកាសជាជំនួយដល់ទ័ពថ្មើរជើង។ ឧត្តមសេនីយ៍អាមេរិកម្នាក់នឹងចុះទៅធ្វើការស៊ើបអង្កេតដល់ផ្ទាល់កន្លែងក្នុងក្រុងគូនឌូស្សតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ