ភេរវកម្មនៅអាហ្វហ្កានីស្ថានជាសញ្ញានៃការបាក់បែកក្នុងជួរឧទ្ទាមតាលីបង់?
ការវាយប្រហារភេរវកម្មបានកើតមានឡើងផ្ទួនគ្នានៅក្នុងទីក្រុងកាប៊ុល ប្រទេសអាហ្វហ្កានីស្ថាន ចាប់តាំងពីថ្ងៃព្រហស្បតិ៍ ដោយបណ្តាលឲ្យមនុស្សយ៉ាងតិច ៥១នាក់ត្រូវស្លាប់ និងរាប់រយនាក់ផ្សេងទៀតត្រូវរងរបួស។ មន្រ្តីអ.ស.បប្រចាំប្រទេសអាហ្វហ្កានីស្ថានបានអះអាងថា សកម្មភាពវាយប្រហារភេរវកម្មនេះ ទំនងជាមានជាប់ទាក់ទងនឹងជម្លោះផ្ទៃក្នុងក្រុមឧទ្ទាមតាលីបង់ ក្រោយពីមានដំណឹងស្តីពីការស្លាប់របស់មេដឹកនាំម៉ូឡាអូម៉ា។
ចុះផ្សាយនៅថ្ងៃ៖
ស្តាប់ - ០១:៥៤
ការវាយប្រហាភេរវកម្មផ្ទួនៗគ្នា កាលពីប៉ុន្មានថ្ងៃកន្លងទៅនេះ គឺជាសកម្មភាពភេរវកម្មទ្រង់ទ្រាយធំលើកដំបូងបង្អស់នៅក្នុងប្រទេសអាហ្វហ្កានីស្ថាន ចាប់តាំងពីក្រុមឧទ្ទាមតាលីបង់ប្រកាសឲ្យដឹងថា មេដឹកនាំរបស់ខ្លួន គឺម៉ូឡា អូម៉ា បានស្លាប់តាំងពី២ឆ្នាំមុន។
ប្រមុខដឹកនាំស្ថានបេសកកម្មអ.ស.បប្រចាំប្រទេសអាហ្វហ្កានីស្ថានបានប្រាប់ទូរទស្សន៍ BBC នៅថ្ងៃសៅរ៍ថា ការកើនឡើងនៃសកម្មភាពវាយប្រហារភេរវកម្មនៅពេលនេះ ទំនងជាមានជាប់ពាក់ព័ន្ធនឹងការប្រជែងដណ្តើមអំណាចគ្នានៅក្នុងជួរថ្នាក់ដឹកនាំរបស់តាលីបង់។
គួរបញ្ជាក់ថា ក្រោយពីបានប្រកាសទទួលស្គាល់អំពីមរណភាពរបស់ម៉ូឡា អូម៉ា ក្រុមឧទ្ទាមតាលីបង់បានប្រកាសតែងតាំងម៉ូឡា ម៉ានសួរ ជាប្រមុខដឹកនាំថ្មី។ ក៏ប៉ុន្តែ អ្នកវិភាគជាច្រើនបានលើកឡើងថា ការតែងតាំងម៉ូឡា ម៉ានសួរនេះ មិនបានទទួលការគាំទ្រជាឯកច្ឆន្ទនោះទេ ដោយក្រុមតាលីបង់មួយក្រុម ដែលប្រកាន់គំនិតប្រឆាំងនឹងការចរចាជាមួយនឹងរដ្ឋាភិបាលក្រុងកាប៊ុល ជំទាស់នឹងការតែងតាំងម៉ូឡា ម៉ានសួរ ដែលជាអ្នកមានជំហរចង់ឲ្យតាលីបង់ចរចាជាមួយរដ្ឋាភិបាលអាហ្វហ្កានីស្ថាន ដើម្បីបញ្ចប់សង្រ្គាម។
ហេតុដូច្នេះហើយបានជាគេគិតថា សកម្មភាពវាយប្រហារភេរវកម្មប៉ុន្មានថ្ងៃកន្លងទៅនេះបង្កឡើងដោយក្រុមប្រឆាំងនឹងម៉ូឡា ម៉ានសួរ ដើម្បីបង្កើតបញ្ហាអសន្តិសុខ ក្នុងគោលដៅរារាំងគម្រោងចរចាជាមួយនឹងរដ្ឋាភិបាលអាហ្វហ្កានីស្ថាន។
ក៏ប៉ុន្តែ អ្នកវិភាគមួយចំនួនទៀតលើកឡើងថា គេក៏មិនអាចច្រានចោលទាំងស្រុងបានដែរនូវសម្មតិកម្មមួយទៀត គឺការវាយប្រហារភេរវកម្មនេះរៀបចំធ្វើឡើងដោយក្រុមរបស់ម៉ូឡា ម៉ានសួរខ្លួនឯងផ្ទាល់ ក្នុងគោលដៅបង្ហាញឲ្យគេឯងឃើញថា ក្រុមតាលីបង់នៅតែមានកម្លាំងខ្លាំង បើទោះបីជាគ្មានម៉ូឡាអូម៉ា ហើយការបង្ហាញសាច់ដុំនេះ អាចជាយុទ្ធសាស្រ្តមួយ នៅក្នុងការចរចាជាមួយរដ្ឋាភិបាល។
ប្រធានាធិបតីអាហ្វហ្កានីស្ថានវិញបានលើកឡើងថា រដ្ឋាភិបាលនៅតែប្រកាន់ជំហរចង់ចរចាជាមួយក្រុមឧទ្ទាមតាលីបង់ ដើម្បីស្វែងរកដំណោះស្រាយបញ្ចប់សង្រ្គាម ក៏ប៉ុន្តែ រដ្ឋាភិបាលក៏នឹងមិនទុកបណ្តោយឲ្យមានការវាយប្រហារភេរវកម្មបែបនេះ ដោយគ្មានការតបតនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ