ការទម្លាក់គ្រាប់បែកបរមាណូអាមេរិកនៅហ៊ីរ៉ូស្ហ៊ីម៉ា ប្រធានបទដ៏រសើបនិងមិនចេះចប់
ចុះផ្សាយនៅថ្ងៃ៖
ស្តាប់ - ០៤:៤៦
នៅសប្តាហ៍ក្រោយ លោក បារ៉ាក់ អូបាម៉ា នឹងអញ្ជើញទៅបំពេញទស្សនកិច្ច ជាប្រវត្តិសាស្ត្រ និងជាលើកទីមួយសម្រាប់ប្រធានាធិបតីអាមេរិក នៅ ទីក្រុងហ៊ីរ៉ូស្ហ៊ីម៉ា ប្រទេសជប៉ុន គិតចាប់សង្គ្រាមលោកលើកទីពីរបិទបញ្ចប់ទៅ។ គម្រោងទស្សនកិច្ចនេះបានបំផុសឱ្យមានការតស៊ូមតិយ៉ាងខ្លាំង ជាថ្មីឡើងវិញ លើសេចក្តីសម្រេចចិត្តទម្លាក់គ្រាប់បែកបរមាណូលើប្រទេសជប៉ុន របស់ប្រធានាធិបតីអាមេរិកសម័យនោះ ដែលអះអាង ជាជម្រើសដ៏ចាំបាច់ ដើម្បីបញ្ចប់សោកនាដកម្ម ?! នេះជាប្រធានបទដ៏រសើបមួយអាមេរិក និងទំនងជាបន្តអន្ទោលតាមប្រាណសហរដ្ឋយូរទៀត។
ឆ្នាំ១៩៤៥ ថ្ងៃទី ២៥មេសា ១៣ថ្ងៃក្រោយមរណភាពរបស់លោក ហ្វ្រង់ក្លាំង រ៉ូស្វែល អាមេរិកមានប្រធានាធិបតីឈ្មោះថា ហារី ទ្រូម៉ាន់ Harry Truman។ ក្នុងនាមជាអគ្គមេបញ្ជាការកងទ័ពថ្មី លោកបានទទួលដឹងព័ត៌មានដ៏សម្ងាត់មួយ ដែលបានប្រែក្រឡាស់ប្រវត្តិសាស្ត្រ។ “នៅបួនខែទៀត អាមេរិកទំនងជានឹងមានអាវុធប្រល័យលោកដ៏សាហាវបំផុតមួយ ក្នុងប្រវត្តិមនុស្សជាតិ នោះគឺគ្រាប់បែកដែលអាចកម្ទេចក្រុងមួយទាំងមូលតែម្តង!”។ នេះជាកំណត់ហេតុដ៏ខ្លីនិងសម្ងាត់ ដែលអ្នកទទួលបន្ទុកសង្គ្រាម ប្រគល់ជូនប្រធានាធិបតី។
ព័ត៌មានសម្ងាត់ស្តីពីកម្មវិធីអភិវឌ្ឍន៍នុយក្លេអ៊ែរ ឬគម្រោងម៉ាណាតាន់ ដែលសូម្បីកាលនៅជាអនុប្រធានាធិបតីក៏មិនត្រូវឱ្យដឹងដែរ។ បួនខែក្រោយ នៅថ្ងៃទី ៦ និង៩ សីហា គ្រាប់បែបបរមាណូពីរត្រូវបានយកទៅទម្លាក់លើក្រុងហ៊ីរ៉ូស្ហ៊ីម៉ា និងណាវ៉ាហ្សាគី សម្លាប់មនុស្សអស់ជាង ២១៤០០០នាក់ និងបានរុញច្រានឱ្យជប៉ុនចុះចាញ់សង្គ្រាម។ ប៉ុន្តែដំណើរដើមហេតុដែលជំរុញឱ្យប្រធានាធិបតីអាមេរិក ទ្រូម៉ាន់ ចេញបញ្ជាឱ្យទម្លាក់គ្រាប់បែក នៅតែជាប្រធានបទតស៊ូមតិយ៉ាងពុះកញ្ជ្រោលនិងរសើបបំផុតជានិច្ច ! ហេតុអ្វី ?
នៅសហរដ្ឋអាមេរិក មានសំឡេងព្រួយបារម្ភខ្លះ បានលាន់ឡើង ខ្លាចក្រែងដំណើរទស្សនកិច្ចរបស់លោកអូបាម៉ា នៅសប្តាហ៍ក្រោយ នៅហ៊ីរ៉ូស្ហ៊ីម៉ា ជាទម្រង់មួយនៃការ “សុំទោស”។ ក្រុមនេះ បានអំពាវនាវឱ្យលោកប្រធានាធិបតីកុំធ្វើឱ្យជ្រុល និងយល់ថាលោកអូបាម៉ាគួរតែទៅគោរពវិញ្ញាណក្ខន្ធព្រលឹងអតីតប្រធានាធិបតីដែលបានបញ្ចេញស្នាដៃបិទបញ្ចប់សង្គ្រាមលោកដ៏គួរឱ្យខ្លាចរអា។
សម្រាប់អ្នកគាំទ្រ អាមេរិកពេលនោះគ្មានជម្រើសច្រើនទេ ! នៅដើមខែវស្សាឆ្នាំ១៩៤៥ ពេលអ៊ីត្លែចាញ់ សង្គ្រាមនៅអឺរ៉ុបចប់ តំបន់ប៉ាស៊ីហ្វិកវឹកវរអន្តរាយយ៉ាងខ្លាំង ទោះបាត់បង់ជីវិតទាហានច្រើន និងបរាជ័យជាបន្តបន្ទាប់ច្រើនឡើងៗក្តី តែគ្មានសញ្ញាណាមួយបញ្ជាក់ថាជប៉ុនព្រមចុះចាញ់ឡើយ ... ដើម្បីទប់ទល់ការរុករានឈ្លានពានរបស់ទ័ពថ្មើរជើងជប៉ុន គឺមានតែប្រើគ្រាប់បែកបរមាណូ បើពុំនោះទេអាមេរិកត្រូវធ្វើប្រតិបត្តិការមួយដែលមានកម្លាំងទាហានយ៉ាងតិច១លាននាក់ អ្នករងគ្រោះប្រមាណ២៥ម៉ឺននាក់ និងមានរយៈពេល យ៉ាងហោចមួយឆ្នាំ។
គិតត្រឹមណេះ ជម្រើសរបស់ប្រធានាធិបតីទ្រូម៉ាន់ ជាសេចក្តីសម្រេចចិត្តចាំបាច់ ! តែក៏មានសំឡេងឧត្តមសេនីយ៍ម្នាក់ប្រឆាំង។ ឧត្តមសេនីយ៍នោះ ក្រោយមកបានក្លាយជាប្រធានាធិបតីអាមេរិកទី ៣៤ និងបានសរសេររំលឹកអំពីភាពសង្ស័យលើជម្រើសទម្លាក់គ្រាប់បែកលើជប៉ុន។
ប៉ុន្តែគ្មានឯកសារឬកត្តាជាក់ស្តែងណាមួយ បញ្ជាក់ថាលោក ទ្រូម៉ាន់ ចង់សម្រេចលទ្ធផល នៃគម្រោងការងារសម្ងាត់រាប់សិបឆ្នាំ តម្លៃជាងពីរពាន់លានដុល្លាររបស់ប្រធានាធិបតីរៀមច្បងមុន និងចង់បង្ហាញមហិទ្ធិរិទ្ធិនៃគ្រាប់បែកបរមាណូ ព្រមទាំងការប្រកួតប្រជែងនុយក្លេអ៊ែរដែលអាចបន្តដុះដាលរាប់ទសវត្សរ៍ក្រោយមកទៀតយ៉ាងដូច្នេះទេ។
សម័យនោះ ថ្នាក់ដឹកនាំអាមេរិក ដែលបានជជែកពិភាក្សាគ្នា ប្រកបដោយជំនក់ចិត្តផងពេលខ្លះ គឺលើតែចំណោទមួយចំនួនដូច តើគេត្រូវប្រើគ្រាប់បែកនុយក្លេអ៊ែរ នៅទីណា ? ពេលណា ? និងយ៉ាងដូចម្តេច ? លើអាល្លឺម៉ង់ ឬលើជប៉ុន ? ដោយត្រូវដៅលើចំណុចមួយណា ? ហើយត្រូវព្រមានប្រាប់ជាមុនឬ អត់ ?
ក្រោយការចុះចាញ់របស់ជប៉ុន លោកប្រធានាធិបតីអាមេរិក ទ្រូម៉ាន់ បានត្រលប់មកបកស្រាយអំពីគម្រោងអភិវឌ្ឍន៍គ្រាប់បែកនុយក្លេអ៊ែរនេះយ៉ាងវែងអន្លាយ ប៉ុន្តែនិយាយតិចបំផុតអំពីផលវិបាក និងជនរងគ្រោះស៊ីវិល។ ក្រោយមកពីរបីថ្ងៃទៀត លោកបាននិយាយអំពីក្រុងហ៊ីរ៉ូស្ហ៊ីម៉ា ដោយចាត់ទុកថាជាមូលដ្ឋានទ័ពមួយ។ សំដីមួយឃ្លានេះបានបំផុសឱ្យមានសំណួរជាច្រើនថា តើអតីតប្រធានាធិបតីអាមេរិកមានដឹងខ្លួនអំពីមហន្តរាយដែលបង្កឡើងគ្រាប់បែកប្រល័យលោកមួយនេះឬអត់។
សម្រាប់ពេលបច្ចុប្បន្ននេះ សេតវិមាន បានគូសបញ្ជាក់យ៉ាងច្បាស់ណាស់ប្រធានាធិបតី អូបាម៉ា នឹងមិនចូលរួមចំណែកបញ្ចេញមតិយោបល់អ្វីជាមួយអ្នកប្រវត្តិសាស្ត្រមួយទេ លោកប្រាថ្នាតែម្យ៉ាងគឺផ្តល់ទស្សនៈវិស័យអាមេរិកសម្រាប់ទៅអនាគត។ ឆ្លើយនឹងសំណួរថា តើលោកអូបាម៉ា ត្រូវធ្វើសេចក្តីសម្រេចចិត្តដូចទ្រូម៉ាន់ដែរឬយ៉ាងណា បើស្ថិតនៅក្នុងស្ថានភាពជាក់ស្តែងឆ្នាំ១៩៤៥ ? វាពិតពិបាកថាណាស់ ព្រោះយើងមិនមែនលោកទ្រូម៉ាន់ និងមិននៅក្នុងស្ថានការណ៍ជាក់ស្តែង។ ប៉ុន្តែលោកអូបាម៉ា យល់ថា ប្រធានាធិបតីទ្រូម៉ាន់ បានធ្វើការសម្រេចចិត្តប្រកបដោយហេតុផល។ ហេតុផលដែលផ្អែកលើសន្តិសុខសហរដ្ឋអាមេរិក និងភាពចាំបាច់ក្នុងការបិទបញ្ចប់សង្គ្រាមដ៏ឃោរឃៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ