ឯកអគ្គរដ្ឋទូតរងកូរ៉េខាងជើងប្រចាំប្រទេសអង់គ្លេសបានផ្តាច់ខ្លួនទៅជ្រកកោណនៅកូរ៉េខាងត្បូង
បន្ទាប់ពីមានការទម្លាយដោយបណ្តាញសារព័ត៌មានជាច្រើនមក រដ្ឋាភិបាលកូរ៉េខាងត្បូងបានប្រកាសឲ្យដឹងជាផ្លូវការនាថ្ងៃពុធ ទី១៧ សីហាថា ឯកអគ្គរដ្ឋទូតរងកូរ៉េខាងជើងប្រចាំទីក្រុងឡុងដ៏ ប្រទេសអង់គ្លេសលោក Thae Yong-Ho និងក្រុមគ្រួសារពិតជាបានរត់ទៅជ្រកកោណនៅកូរ៉េខាងត្បូងមែន។ ទង្វើផ្តាច់ខ្លួនរបស់មន្រ្តីជាន់ខ្ពស់កូរ៉េខាងជើងទៅជ្រកកោណនៅកូរ៉េខាត្បូងមិនមែនជាលើកទី១ និងក៏ប្រហែលមិនមែនជាលើកចុងក្រោយដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ព័ត៌មាននេះត្រូវបានប្រកាសឲ្យដឹងជាផ្លូវការដោយលោក Jeong Joon-Hee អ្នកនាំពាក្យរបស់ក្រសួងបង្រួបបង្រួមកូរ៉េនៅកូរ៉េខាងត្បូង។ លោក Joon-Hee បានបញ្ជាក់ថាពេលនេះ លោក Thae Yong-Ho រួមទាំងភរិយា និងកូនប្រុសរបស់លោកកំពុងស្ថិតក្នុងទឹកដីកូរ៉េខាងត្បូងដោយសុវត្ថិភាព ព្រមទាំងទទួលបានការការពារយ៉ាងយកចិត្តដាក់ពីរដ្ឋាភិបាលក្រុងសេអ៊ូលផង។ ក៏ប៉ុន្តែ អ្នកនាំពាក្យក្រសួងបង្រួបបង្រួមកូរ៉េរូបនេះដដែលបានបដិសេធមិនបញ្ជាក់ទេ ពីទីកន្លែងដែលក្រុមគ្រួសារលោក Ho កំពុងស្នាក់នៅ និងពីឈ្មោះប្រទេសដែលបានអនុញ្ញាតឲ្យគ្រួសារលោក Ho ឆ្លងកាត់មុននឹងទៅដល់ទឹកដីកូរ៉េខាងត្បូង។ ការលាក់ព័ត៌មានទាំងអស់នេះ គឺដើម្បីបញ្ជៀសការសងសឹកពីរដ្ឋាភិបាលកូរ៉េខាងជើង។
ដោយឡែក លោក Hee បានប្រាប់ពីមូលហេតុនៃការរត់របស់លោក Ho ដែលស្អប់ខ្ពើមការដឹកនាំរបស់មនុស្សខ្លាំងកូរ៉េខាងជើងលោកគីម ជុងអ៊ុន និងការចង់បានសិទ្ធិសេរីភាព និងលទ្ធិប្រជាធិបតេយ្យនៅកូរ៉េខាងត្បូង រួមទាំងចង់ផ្តល់អនាគតល្អឲ្យគ្រួសារផង។ សូមជម្រាបជូនថា ការផ្តាច់ខ្លួនរបស់ពលរដ្ឋកូរ៉េខាងជើងទៅជ្រកកោណនៅកូរ៉េខាងត្បូងមិនមែនជារឿងថ្មី និងឧស្សាហ៍កើតមានញឹកញាប់ណាស់ តែការផ្តាច់ខ្លួនរបស់មន្រ្តីទូតជាន់ខ្ពស់ដូចករណីលោក Ho ជារឿងដែលគេកម្រឃើញមានណាស់។
ជីវិតថ្មីរបស់ពលរដ្ឋកូរ៉េខាងជើងគ្រប់រូបដែលរត់ទៅកូរ៉េខាងត្បូងនឹងត្រូវចាប់ផ្តើមដោយកម្មវិធីសួរចម្លើយពីភ្នាក់ងារសម្ងាត់កូរ៉េខាងត្បូងដើម្បីចង់ដឹងថា តើអ្នករត់គេចខ្លួនទាំងនោះពិតជាមនុស្សចង់ស្វែងរកសេរីភាព និងអនាគតថ្មីមែន ឬមួយជាគេញសម្ងាត់បញ្ជូនដោយរបបកូរ៉េខាងជើង។ បន្ទាប់មកក្នុងរយៈពេល ៣ខែ ពួកគេនឹងត្រូវរដ្ឋាភិបាលក្រុងសេអ៊ូលបញ្ជូនឲ្យទៅស្នាក់នៅក្នុងផ្ទះរបស់រដ្ឋ និងទទួលការរៀនសូត្រពីរបៀបរបបរស់នៅរបស់ពលរដ្ឋកូរ៉េខាងត្បូង របៀបជិះរថភ្លើងក្រោមដី រៀនប្រើទូរស័ព្ទដៃ ឬមួយក៏រៀនពីទៅផ្សារទិញអីវ៉ាន់ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ