សភាកូរ៉េខាងត្បូងបោះឆ្នោតទម្លាក់លោកស្រីប្រធានាធិបតី ប៉ាក់ គុនហេ
ចុះផ្សាយនៅថ្ងៃ៖
ស្តាប់ - ០៧:៣០
រឿងអាស្រូវពុករលួយបានធ្វើឲ្យសភាកូរ៉េខាងត្បូង នៅថ្ងៃសុក្រទី ៩ធ្នូ បោះឆ្នោតទម្លាក់ លោកស្រីប្រធានាធិបតីកូរ៉េខាងត្បូង។ អត្ថបទច្បាប់ស្នើឡើងដោយបក្សប្រឆាំងដែលទាមទារឲ្យគេបោះឆ្នោតទម្លាក់លោកស្រីប៉ាក់ គុនហេ ជាប់សង្ស័យក្នុងរឿងអាស្រូវពុករលួយ និងរំលោភអំណាច ត្រូវបានបោះឆ្នោតគាំទ្រ ដោយសមាជិកសភា ២៣៤នាក់ ដែលក្នុងនោះ ក៏មានផងដែរសំឡេងគាំទ្ររបស់សមាជិកសភាមកពីគណបក្សកាន់អំណាចរបស់លោកស្រី។
សភាបោះឆ្នោតទម្លាក់លោកស្រីប៉ាក់ គុនហេ ជាមួយនឹងសំឡេង២ភាគ៣។ តំណែងប្រធានាធិបតីរបស់លោកស្រីប៉ាក់ គុនហេ នឹងត្រូវគេព្យួរមួយរយៈដើម្បីរង់ចាំការសម្រេចចុងក្រោយរបស់តុលាការរដ្ឋធម្មនុញ្ញ ដែលមានរយៈពេល៦ខែដើម្បីសម្រេចថា តើគួររក្សា ឬរុញច្រានចោលការបោះឆ្នោតរបស់សភា។
ក្នុងពេលរង់ចាំការសម្រេចរបស់តុលាការធម្មនុញ្ញ លោកស្រីប៉ាក់ គុនហេត្រូវគេដកអំណាចទាំងអស់ ពីដៃ រួមទាំងអំណាចនៅលើផ្នែកកងទ័ពផង។ លោកស្រីនៅមានតែនាមជាប្រធានាធិបតី តែប៉ុណ្ណោះ។ ចំណែកការងារសម្រេចរបស់រដ្ឋាភិបាលទាំងអម្បាលម៉ាននឹងផ្ទេរទៅឲ្យនាយករដ្ឋមន្រ្តី លោកវ៉ាង ចូអានដែលលោកស្រីប៉ាក់ បានតែងតាំងនៅឆ្នាំ ២០១៥។
នៅក្នុងអត្ថបទច្បាប់ ដែលសភាបោះឆ្នោត នៅថ្ងៃនេះ លោកស្រីប្រធានាធិបតីកូរ៉េខាងត្បូងត្រូវគេចោទប្រកាន់ថា បានរំលោភរដ្ឋធម្មនុញ្ញ ប្រព្រឹត្តបទឧក្រិដ្ឋ ពុករលួយ រំលោភអំណាច និងបរាជ័យ មិនការពារជីវិតប្រជាជន។
តើតុលាការធម្មនុញ្ញកូរ៉េខាងត្បូងអាចសម្រេចផ្ទុយពីសភាដែរ ឬទេ?
សមាជិកភាពរបស់តុលាការធម្មនុញ្ញ លោកស្រីប៉ាក់ គុនហេ ទំនងអាចត្រលប់មកធ្វើជាប្រធានាធិបតីដូចដើមវិញ។ ចៅក្រមទាំង៩របស់តុលាការធម្មនុញ្ញសុទ្ធតែត្រូវបានលោកស្រី ឬថ្នាក់ដឹកនាំអភិរក្សមុនៗ មកពីបក្សរបស់លោកស្រីប៉ាក់ គុនហេ ជាអ្នកជ្រើសរើស តែងតាំង។
សភាបោះឆ្នោតទម្លាក់ ប៉ុន្តែ តុលាការធម្មនុញ្ញអាចសម្រេចផ្ទុយ ឲ្យលោកស្រីប៉ាក់ គុនហេត្រលប់មកកាន់តំណែងប្រធានាធិបតីវិញ បើសិនគេរកឃើញថា លោកស្រីស្អាតស្អំ មិនពុករលួយដូចការចោទប្រកាន់។ រឿងនេះធ្លាប់មានម្តងហើយ នៅកូរ៉េខាងត្បូង កាលពីឆ្នាំ ២០០៤។ កាលណោះ ប្រធានាធិបតីកូរ៉េខាងត្បូង លោករ៉ូ ម៉ូយុន ត្រូវបានសភាបោះឆ្នោតទម្លាក់ដោយសាររឿងរំលោភច្បាប់បោះឆ្នោត។ ប៉ុន្តែ ២ខែក្រោយមក តុលាការរដ្ឋធម្មនុញ្ញបានសម្រេចបដិសេធ មិនយល់ស្របតាមសភា ទៅវិញ ក្នុងហេតុផលថា គេគ្មានភស្តុតាងរឹងមាំដើម្បីទម្លាក់លោករ៉ូ ម៉ូយុន។ ដូច្នេះលោករ៉ូ ម៉ូយុនបានត្រលប់មកធ្វើជាប្រធានាធិបតីរហូតដល់ចប់អាណត្តិរបស់លោក នៅឆ្នាំ ២០០៨។
ប៉ុន្តែ ក្នុងករណីរបស់លោកស្រីប៉ាក់ គុនហេ តុលាការធម្មនុញ្ញ អាចមិនធ្វើបានដូចលើកមុន ដោយហេតុថា តុលាការអាចរងការដាក់សម្ពាធពីបណ្តាជនកូរ៉េខាងត្បូង។ ខុសពីលោករ៉ូ ម៉ូយុនដែលមានប្រជាប្រិយភាព នៅពេលលោកត្រូវសភាបោះឆ្នោតទម្លាក់ លោកស្រីប៉ាក់ គុនហេ ឯណេះវិញ គឺបានបាត់បង់ ទំនុកចិត្ត ការការគាំទ្រ ពីប្រជាជនទាំងស្រុង ដោយសារតែរឿងអាស្រូវចុងក្រោយទាក់ទងនឹងស្រ្តីមន្តអាគម ឆយ ស៊ុនស៊ីល។ រឿងអាស្រូវ ពុករលួយ ឃុបឃិតរំលោភអំណាចប្រធានាធិបតី រួមផ្សំនឹងការធ្វេសប្រហែសធ្វើឲ្យលិចសាឡាងសម្លាប់សិស្សសាលាប្រមាណ ៣០០នាក់ កាលពីឆ្នាំ ២០១៤ បានធ្វើឲ្យប្រជាជនកូរ៉េខាងត្បូង កាន់ច្រើន ស្អប់ និងចុះថ្នល់ធ្វើបាតុកម្ម ទាមទារឲ្យលោកស្រីចុះចេញពីតំណែង។
ហេតុអ្វីលោកស្រីប៉ាក់ គុនហេមិនព្រមលាលែងពីតំណែងដោយខ្លួនឯង?
លោកស្រីប៉ាក់ គុនហេបានថ្លែងជាសាធារណៈរួចហើយថា លោកស្រីសោកស្តាយដែលធ្វើឲ្យប្រទេសជាតិលង់ខ្លួន ដោយសាររឿងអាស្រូវ ពុករលួយលើកនេះ។ បើទោះបីជាលោកស្រីបានបដិសេធថា មិនបានជាប់ពាក់ព័ន្ធ ក្នុងរឿងឃុបឃិត ប្រព្រឹត្តពុករលួយជាមួយស្រ្តីមិត្តជិតស្និទ្ធឆយ ស៊ុនស៊ីល ប៉ុន្តែ លោកស្រីបញ្ជាក់ថា លោកស្រីត្រៀមចុះពីអំណាច ប៉ុន្តែ លោកស្រីបានទាមទារឲ្យសភាជាអ្នកសម្រេច រៀបចំផ្លូវចាកចេញពីអំណាចរបស់លោកស្រី ដើម្បីជៀសវាងកុំឲ្យកូរ៉េខាងត្បូងជួបវិបត្តិនយោបាយ។
លោកស្រីប៉ាក់ គុនហេដែលមិនព្រមចុះចេញដោយខ្លួនឯង និងរង់ចាំការសម្រេចរបស់សភា ដោយសារតែលោកស្រីអាចម្យ៉ាង លោកស្រីនៅមានក្តីសង្ឃឹមពីតុលាការរដ្ឋធម្មនុញ្ញ ដែលអាចសម្រេចឲ្យលោកស្រីត្រលប់មកធ្វើជាប្រធានាធិបតីវិញ។ បើទោះបីជាប្រជាជនខឹងសម្បារនឹងលោកស្រីក៏ដោយចុះ ប៉ុន្តែ បើតុលាការរកឃើញថា លោកស្រីស្អាតស្អំ នោះលោកស្រីនឹងអាចលាងជម្រះមន្ទិលរួចពីការចោទប្រកាន់ទាំងឡាយ។ លាលែងចុះចេញពីតំណែងដោយខ្លួនឯង អាចមានន័យ ស្មើនឹងការដែលថា លោកស្រីទទួលស្គាល់ ជាប់ពាក់ព័ន្ធ ឃុបឃិតពុករលួយជាមួយស្រ្តីឆយ ស៊ុនស៊ីល។
មួយវិញទៀត បើមើលប្រវត្តិគ្រួសាររបស់លោកស្រី ប៉ាក់ គុនហេ លោកស្រីធំដឹងក្តី និងប្រលូកក្នុងនយោបាយតាំងពីក្មេងវ័យ។ ឪពុករបស់លោកស្រី ជាអតីតប្រធានាធិបតីផ្តាច់ការ ប៉ុន្តែ គឺជាឪពុក ដែលលោកស្រី គោរព ស្រឡាញ់ ជាប់ជានិច្ច។ ដោយសារតែម្តាយរបស់លោកស្រី ត្រូវបានចារកិច្ចកូរ៉េខាងជើងលួចសម្លាប់ លោកស្រី ប៉ាក់ គុនហេ បានចូលធ្វើជាស្រ្តីកូរ៉េខាងត្បូងទីមួយ ជំនួសម្តាយ ដើម្បីបំពេញកិច្ចការជាមួយឪពុកដែលជាប្រធានាធិបតីកូរ៉េខាងត្បូងរហូតដល់ឆ្នាំ ១៩៧៩។ គេអាចថា ដោយសារងប់ ជាប់ប្រលូកជ្រៅក្នុងជីវិតនយោបាយរបស់ឪពុក ធ្វើឲ្យលោកស្រី ប៉ាក់ គុនហេ ស្រឡាញ់ មិនចង់បាត់បង់អំណាច ប្រធានាធិបតី ដែលលោកស្រីទើបស្រវ៉ាចាប់បាន នៅឆ្នាំ ២០១៣។
ការបោះឆ្នោតសភា ទម្លាក់លោកស្រីប៉ាក់ គុនហេពីតំណែងប្រធានាធិបតីជាជោគជ័យដ៏ធំធេងរបស់បក្សប្រឆាំង និងប្រជាជនកូរ៉េខាងត្បូងរាប់សែន រាប់លាន ដែលទាមទាររាប់សប្តាហ៍មកហើយ ឲ្យលោកស្រីប៉ាក់ គុនហេចុះចេញពីតំណែង។ ប៉ុន្តែ ការបោះឆ្នោតសភា នៅថ្ងៃសុក្រ មិនបានសំដៅបិទបញ្ចប់វិបត្តិនៅ កូរ៉េខាងត្បូងនោះទេ។
រឿងអាស្រូវពុករលួយរបស់លោកស្រីប្រធានាធិបតីនឹងនៅបន្តធ្វើឲ្យកូរ៉េខាងត្បូង ធ្លាក់ត្រាំត្រែង ក្នុងវិបត្តិនយោបាយយូរខែទៅទៀត។ កូរ៉េខាងត្បូងបច្ចុប្បន្នកំពុងមានសេដ្ឋកិច្ចនៅទ្រឹង ប្រឈមនឹងវិបត្តិមនុស្សគ្មានការងារធ្វើ។ ប្រជាជនអស់ទឹកចិត្តលើថ្នាក់ដឹកនាំ ដែលពីមួយអាណត្តិ អាណត្តិត្រូវគេរកឃើញថា មានជាប់ពាក់ព័ន្ធ ពុករលួយជាមួយក្រុមហ៊ុនឯកជន ដែលរកជំនួញ មានបានដោយសារប្រើអំណាចឥទ្ធិពលរបស់ថ្នាក់ដឹកនាំ។
រឿងអាស្រូវពុករលួយនៅកូរ៉េខាងត្បូងកំពុងធ្វើឲ្យ ប្រទេសសេដ្ឋកិច្ចធំទី៤នៅអាស៊ី ធ្លាក់ចូលកាន់តែជ្រៅ ក្នុងវិបត្តិនយោបាយ ដែលជាការធ្វើឲ្យគេបារម្ភមែនទែន មិនថា ប្រទេសសម្ព័ន្ធមិត្ត ឬទីផ្សារហិរញ្ញវត្ថុ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ