គ្រាប់មីស៊ីលបាលីស្ទិកកូរ៉េខាងជើងហោះរំលងប្រទេសជប៉ុន មុននឹងធ្លាក់ក្នុងមហាសមុទ្រប៉ាស៊ីហ្វិក
ចុះផ្សាយនៅថ្ងៃ៖
ស្តាប់ - ០៦:៣៣
កូរ៉េខាងជើងបានបន្តផ្គើនសហគមន៍អន្តរជាតិដោយបានបាញ់សាកល្បងគ្រាប់មីស៊ីលបាលីស្ទិកជាថ្មីនៅថ្ងៃអង្គារ ទី២៩ សីហា។ គ្រាប់មីស៊ីលបានធ្លាក់ក្នុងមហាសមុទ្រប៉ាស៊ីហ្វិក បន្ទាប់ពីហោះបានចម្ងាយ ២ ៧០០គីឡូម៉ែត្រ និងហោះរំលងទឹកដីជប៉ុន។ លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានបញ្ចេញប្រតិកម្មថ្កោលទោស និងចាត់ទុកទង្វើរបស់ព្យុងយ៉ាងថា ជាការគំរាមពិតប្រាកដ និងធ្ងន់ធ្ងរដល់ប្រទេសជប៉ុន។ ចំណែកក្រុមប្រឹក្សាសន្តិសុខអង្គការសហប្រជាជាតិកោះប្រជុំជាបន្ទាន់ក្នុងថ្ងៃនេះតាមសំណើរបស់ជប៉ុន អាមេរិក និងកូរ៉េខាងត្បូង។ រីឯចិនយល់ឃើញថា វិបត្តិនៅឧបទ្វីបកូរ៉េបានដើរមកដល់ចំណុចរបត់មួយ។
គេអាចនិយាយបានថា ការដែលកូរ៉េខាងជើងបានបាញ់គ្រាប់មីស៊ីលបាលីស្ទិកសំដៅជប៉ុនពេលនេះជាទង្វើបន្តផ្គើនសហគមន៍អន្តរជាតិ។ នាដើមខែសីហាថ្មីៗនេះ ភាពតានតឹងបានឡើងដល់កំពូលរវាងកូរ៉េខាងជើង និងអាមេរិកស្ទើរតែផ្ទុះសង្រ្គាមទៀតផង តែហាក់បានធ្លាក់ចុះវិញក្រោយពីមនុស្សខ្លាំងកូរ៉េខាងជើងលោកគីម ជុងអ៊ុនប្រកាសពីការសម្រាកមួយរយៈ។ តែក្នុងថ្ងៃសៅរ៍ចុងសប្តាហ៍កន្លងទៅ ក្រុងព្យុងយ៉ាងបានផ្តើមសកម្មភាពជាថ្មីដោយបានបាញ់សាកល្បងគ្រាប់មីស៊ីលចម្ងាយខ្លីចំនួន ៣គ្រាប់សំដៅសមុទ្រជប៉ុន។
ចំណែកគ្រាប់មីស៊ីលដែលក្រុងព្យុងយ៉ាងបានបាញ់ជាថ្មីថ្ងៃនេះ គឺជាប្រភេទគ្រាប់មីស៊ីលបាលីស្ទិកដែលហោះបានចម្ងាយ ២ ៧០០គីឡូម៉ែត្រ រំលងទឹកដីជប៉ុនទៅធ្លាក់ក្នុងមហាសមុទ្រប៉ាស៊ីហ្វិកស្ថិតចម្ងាយប្រមាណជា ១ ១៨០គីឡូម៉ែត្រប៉ែកខាងកើតកោះជប៉ុនហុកកៃដូ។ គួររម្លឹកជូនថា នេះជាលើកទី៣ ហើយដែលមានគ្រាប់មីស៊ីលបាលីស្ទិកកូរ៉េខាងជើងហោះរំលងទឹកដីជប៉ុន បន្ទាប់ពីហោះរំលងលើកទី១ ក្នុងឆ្នាំ ១៩៩៨ និងលើកទី២ ក្នុងឆ្នាំ ២០០៩។ អ្វីជាការកត់សម្គាល់ គ្រាប់មីស៊ីលបាញ់លើកទី១ និងលើកទី២ ត្រូវបានរបបក្រុងព្យុងយ៉ាងប្រកាសថា ជាការបាញ់បញ្ជូនផ្កាយរណប។
យ៉ាងណាក៏ដោយ គ្រាប់មីស៊ីលបាលីស្ទិកដែលកូរ៉េខាងជើងបានបាញ់រំលងជប៉ុនពេលនេះបានធ្វើឲ្យប្រព័ន្ធប្រកាសអាសន្នមានដំណើរការដោយបានអំពាវនាវឲ្យប្រជាជនរស់ក្នុងតំបន់ពាក់ព័ន្ធរត់ចូលទីជម្រក ហើយចរាចរណ៍រថភ្លើងក៏ត្រូវបានផ្អាកដំណើរការរយៈពេល ២០នាទី។
ហេតុផលដែលកូរ៉េខាងជើងបាញ់គ្រាប់មីស៊ីលបាលីស្ទិកក្នុងថ្ងៃទី២៩ សីហា
មានហេតុផលចំនួន ៣ ដែលកូរ៉េខាងជើងបានបាញ់គ្រាប់មីស៊ីលបាលីស្ទិកក្នុងថ្ងៃទី២៩ សីហា ទី១ ចំពេលដែលទ័ពអាមេរិក និងទ័ពកូរ៉េខាងត្បូងកំពុងធ្វើសមយុទ្ធរួមគ្នារហូតដល់ថ្ងៃទី៣១ សីហាទើបចប់។ សមយុទ្ធរួមគ្នាអាមេរិក និងកូរ៉េខាងត្បូង គឺជាសមយុទ្ធប្រចាំឆ្នាំ ហើយវ៉ាស៊ីតោន និងសេអ៊ូលចាត់ទុកជាការហ្វឹកហ្វឺនដើម្បីប្រឈមទប់នឹងការវាយប្រហារជាយថាហេតុពីកូរ៉េខាងជើង។ តែក្រោមភ្នែក ច្រមុះរបស់កូរ៉េខាងជើង សមយុទ្ធនេះជាការរៀបចំជើងព្រួលដើម្បីវាយសម្រុកផ្តួលរំលំរបបក្រុងព្យុងយ៉ាងសព្វថ្ងៃ។
ហេតុផលទី២ ព្រោះថ្ងៃទី២៨ សីហា ជាខួបលើកទី៦៨ នៃការបង្កើតកម្លាំងទ័ពជើងទឹកកូរ៉េខាងជើង និងហេតុផលទី៣ ព្រោះថ្ងៃទី២៨ សីហា លោកប្រធានាធិបតីកូរ៉េខាងត្បូងមូន ចៃអ៊ីនបានអំពាវនាវឲ្យធ្វើកំណែទម្រង់យ៉ាងស៊ីជម្រៅលើវិស័យកងទ័ពកូរ៉េខាងត្បូងចាប់ពីពេលនេះទៅដល់ឆ្នាំ ២០២០។ តាមលោកចៃអ៊ីន បើកូរ៉េខាងជើងផ្តោតលើការអភិវឌ្ឍន៍គ្រាប់មីស៊ីល និងអាវុធនុយក្លេអ៊ែរ កូរ៉េខាងត្បូងក៏ត្រូវមានមធ្យោបាយដើម្បីទប់ទល់វិញដែរ។
សំណួរដែលគ្រប់គ្នាកំពុងចោទសួរពេលនេះគឺថា ហេតុអ្វីបានជាជប៉ុនដែលមានបំពាក់ប្រព័ន្ធខែលមីស៊ីលប្រឆាំងមីស៊ីលមិនបាញ់កម្ទេចគ្រាប់មីស៊ីលរបស់កូរ៉េខាងជើងទៅ?។ លោករដ្ឋមន្រ្តីក្រសួងការពារជាតិជប៉ុនបានចេញមុខពន្យល់បកស្រាយយ៉ាងខ្លីថា គ្រាប់មីស៊ីលបាលីស្ទិកកូរ៉េខាងជើងដែលបានហោះរំលងប៉ែកខាងជើងកោះហុកកែដូនោះ គឺមានរយៈពេលខ្លី ពោលតែ ២នាទីប៉ុណ្ណោះ និងមិនបានបង្កហានិភ័យអាចធ្លាក់លើទឹកដីជប៉ុនឡើយ។
ក្រុមប្រឹក្សាសន្តិសុខកោះប្រជុំបន្ទាន់ និងអាចដាក់ទ័ណ្ឌកម្មថ្មីលើកូរ៉េខាងជើង
ក៏ដូចជាសព្វមួយដង ប្រតិកម្មថ្កោលទោសពីសហគមន៍អន្តរជាតិបានធ្លាក់មកជាបន្តបន្ទាប់។ ចំណែកក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់មួយក្នុងថ្ងៃអង្គារ ទី២៩ សីហានេះតាមសំណើរបស់កូរ៉េខាងត្បូង អាមេរិក និងជប៉ុន។ តើសហគមន៍អន្តរជាតិអាចធ្វើអ្វីបានទៀតចំពោះកូរ៉េខាងជើង? នេះពិតជាសំណួរមួយដែលគេពិបាកផ្តល់ចម្លើយជាក់ច្បាស់ណាមួយ។ លើកណាក៏ដូចជាលើកណាដែរឲ្យតែកូរ៉េខាងជើងសាកល្បងនុយក្លេអ៊ែរ ឬគ្រាប់មីស៊ីលម្តងៗ ប្រតិកម្មផ្តន្ទាទោស រួមទាំងទ័ណ្ឌកម្មលើកូរ៉េខាងជើងមានច្រើនរាប់មិនអស់ តែរបបក្រុងព្យុងយ៉ាងមិនដែលខ្វាយខ្វាល់ឈឺក្បាល និងយកត្រចៀកស្តាប់ឡើយ។
រឿងកូរ៉េខាងជើងបន្តផ្គើនសហគមន៍អន្តរជាតិជារឿងមួយ តែរឿងដែលសហគមន៍អន្តរជាតិតប់ប្រមល់ចិត្តខ្លាំងជាងគេនោះ គឺការដែលរុស្ស៊ី និងចិនក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខបន្តមានសមានចិត្តចំពោះកូរ៉េខាងជើងដើម្បីប្រយោជន៍ផ្ទាល់ខ្លួន។ នៅដើមខែសីហាកន្លងទៅថ្មីៗនេះ ក្រុមប្រឹក្សាសន្តិសុខបានដាក់ទ័ណ្ឌកម្មលើក្រុងព្យុងយ៉ាងមិនឲ្យនាំចេញធ្យូងថ្ម ហើយតាមប្រភពទូតជាច្រើនឲ្យដឹងថា នៅក្នុងកិច្ចប្រជុំបន្ទាន់ថ្ងៃនេះ ក្រុមប្រឹក្សាសន្តិសុខអាចដាក់នឹងទ័ណ្ឌកម្មថ្មីដោយហាមមិនឲ្យលក់ប្រេងទៅឲ្យកូរ៉េខាងជើង។
តែគេមិនត្រូវភ្លេចនិយាយទេថា ការឯកភាពគ្នាក្នុងការដាក់ទ័ណ្ឌកម្មជារឿងមួយ រីឯការអនុវត្តន៍ទ័ណ្ឌកម្មជារឿងមួយផ្សេងទៀត។ ចូរកុំភ្លេចថា ទោះបីជាមានទ័ណ្ឌកម្មក្នុងកម្រិតណា និងក្នុងផ្នែកអ្វីក៏ដោយ ក៏ព្យុងយ៉ាងនៅតែអាចរកស៊ីបានដោយប្រើវិធីសាស្រ្តគ្រប់បែបយ៉ាងក្នុងការពង្វាងទ័ណ្ឌកម្មអន្តរជាតិដោយមានការស៊ុមគ្រលំរកស៊ីពីក្រុមប្រទេសនៅអាស៊ី ក្នុងនោះក៏មានចិនម្នាក់ដែរ។
មែនទែនទៅ គ្មានបញ្ហាណាមួយដែលគ្មានដំណោះស្រាយនោះទេ គ្រាន់តែថា មានកត្តាច្រើនណាស់ដែលបានធ្វើឲ្យសំណុំរឿងមួយនេះជាប់គាំងអូសបន្លាយមកដល់សព្វថ្ងៃ។ អាមេរិក ចិន ជប៉ុន រុស្ស៊ី កូរ៉េខាងត្បូង និងកូរ៉េខាងជើងពិតជាមានឆន្ទៈចង់បញ្ចប់បញ្ហា តែគេត្រូវដឹងថា មានប្រទេសមហាអំណាចខ្លះបែរជាកំពុងបន្តចិញ្ចឹមបញ្ហាមួយនេះដើម្បីទទួលបានប្រយោជន៍ និងការប្រជែងកម្លាំងគ្នាទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ