ចិនបន្តចរចាពាណិជ្ជកម្មជាមួយអាមេរិក តែការពារជានិច្ចប្រយោជន៍ជាតិ
ឧបនាយករដ្ឋមន្ត្រីចិនលោក លីវ ហេ Liu He បានប្រាស្រ័យតាមទូរស័ព្ទជាមួយនឹងរដ្ឋមន្ត្រីក្រសួងហិរញ្ញវត្ថុអាមេរិក លោក Steven Mnuchin ដោយបានព្រមព្រៀងគ្នាថានឹងបន្តជជែកទាក់ទងគ្នាស្តីអំពីបញ្ហាពាណិជ្ជកម្មទៀត ប៉ុន្តែលោក លីវហេ បានឆ្លៀតព្រមានថា ចិនត្រៀមលក្ខណៈជាស្រេចនឹងការពារផលប្រយោជន៍ជាតិរបស់ខ្លួន។ នេះបើតាមការពាំពាក្យចុះផ្សាយក្នុងទំព័រសារព័ត៌មានផ្លូវការចិនថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កិច្ចពិភាក្សាតាមទូរស័ព្ទ ដែលបង្ហើបឱ្យដឹងដោយសារព័ត៌មានចិនថ្មី Xinhua ប្រព្រឹត្តទៅក្នុងខណៈដែលភាពតានតឹងពាណិជ្ជកម្មរវាងសហរដ្ឋអាមេរិកនិងចិន បានប៉ោងឡើងយ៉ាងខ្លាំង ដោយសារតែលោកប្រធានាធិបតីអាមេរិក ដូណាល់ ត្រាំ បានប្រកាសយកពន្ធលើផលិតផលនាំចូលមកពីចិន ក្នុងទំហំអាចឡើងដល់៦០ពាន់លានដុល្លារ។ ជាការយកពន្ធដៅលើវិស័យមួយចំនួនដែលវ៉ាស៊ីនតោនយល់ថាចិនបានលួចបច្ចេកវិទ្យានិងកម្មសិទ្ធិបញ្ញាអាមេរិក។
ជាទីប្រឹក្សាសេដ្ឋកិច្ចដ៏ជំនិតរបស់ប្រធានាធិបតីចិនស៊ីជីនពីង បានទទួលការសិក្សានិងបំពាក់បំប៉ននៅសាកលវិទ្យាល័យHarvard អាមេរិក លោក លីវ ហេ ដែលទើបត្រូវបានតែងតាំងជាឧបនាយករដ្ឋមន្ត្រី ទទួលបន្ទុកត្រួតពិនិត្យវិស័យពាណិជ្ជកម្មនិងសេដ្ឋកិច្ច បានគូសបញ្ជាក់ ទៅកាន់រដ្ឋមន្ត្រីក្រសួងហិរញ្ញវត្ថុអាមេរិកថា វិធានការពាណិជ្ជកម្មអាមេរិកប្រឆាំងនឹងចិន ជាការរំលោភច្បាប់ពាណិជ្ជកម្មអន្តរជាតិ និងគ្មានចំណេញប្រយោជន៍ដល់អាមេរិក ឬដល់ចិន និងពិភពលោកទាំងមូលទេ ! វ៉ាស៊ីនតោន និងប៉េកាំង គួរតែដឹងថាត្រូវប្រកាន់ខ្លួនរបៀបណា ក្នុងការរក្សាទំនាក់ទំនងពាណិជ្ជកម្មឱ្យមានស្ថិរភាពល្អ។
ប៉ុន្តែចិនបានត្រៀមលក្ខណៈរួចជាស្រេចហើយ ! ហើយចិនក៏មានកម្លាំងខ្លាំងគ្រប់គ្រាន់នឹងការពារប្រយោជន៍ជាតិខ្លួនដែរ ! នេះជាការពាក្យព្រមានរបស់លោក លីវ ហេ ដោយចំៗទៅកាន់ភាគីអាមេរិក។
កាលពីថ្ងៃសុក្រម្សិលមិញ ចិនបានអំពាវនាវឱ្យវ៉ាស៊ីនតោន បញ្ចៀសមហន្តរាយ ! និង អះអាងថាប៉េកាំងមិនខ្លាចនឹងប្រកាសសង្គ្រាមពាណិជ្ជកម្មជាមួយអាមេរិក ព្រមទាំងបានគំរាមដាក់ទណ្ឌកម្មប្រឆាំងតបនឹងសហរដ្ឋអាមេរិក ក្នុងតម្លៃប្រមាណ៣ពាន់លានដុល្លារ។ បញ្ជីឈ្មោះផលិតផលអាមេរិកនាំចូលមកចិន តាំងពីផ្លែឈើស្រល់ រហូតដល់សាច់ជ្រូក ដែលជាប់ពន្ធដល់ទៅ២៥% ក៏ត្រូវបានបង្ហាញ ប៉ុន្តែលោក លីវ ហេ បានបញ្ជាក់ថាមិនរួសរាន់ធ្វើសង្គ្រាមជាមួយអាមេរិកទេ ! លោកបានយល់ព្រមចំហទ្វារ និងសុខចិត្តចូលចរចាពាណិជ្ជកម្មដើម្បីស្វែងរកកិច្ចព្រមព្រៀងជាមួយវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ