ចិនដំឡើងសម្លេងដាក់អាមេរិក បន្ទាប់ពីលោកដូណាល់ ត្រាំចុះហត្ថលេខាលើច្បាប់គាំទ្របាតុករហុងកុង
ចុះផ្សាយនៅថ្ងៃ៖
ស្តាប់ - ០៧:០៧
នៅថ្ងៃព្រហស្បតិ៍ ទី២៨ វិច្ឆិកា សង្រ្គាមពាក្យសម្តីកំពុងផ្ទុះឡើងយ៉ាងផុសផុលរវាងចិន និងសហរដ្ឋអាមេរិក។ អាមេរិកដែលប្រធានាធិបតីលោកដូណាល់ ត្រាំបានចុះហត្ថលេខា និងប្រកាសដាក់ឲ្យប្រើប្រាស់នូវច្បាប់គាំទ្រក្រុមបាតុករអ្នកប្រជាធិបតេយ្យនៅហុងកុង។ ចិនបានបញ្ចេញប្រតិកម្មខឹងសម្បារដោយបានចាត់ទុកជាច្បាប់ដ៏អាក្រក់ខ្លាំងណាស់ និងព្រមានចាត់វិធានការសងសឹកវិញ។ ទន្ទឹមគ្នានេះ ក្រសួងការបរទេសចិនបានហៅឯកអគ្គរដ្ឋទូតអាមេរិកប្រចាំក្រុងប៉េកាំងទៅសួរនាំ និងបានស្នើអាមេរិកកុំឲ្យអនុវត្តច្បាប់នោះឲ្យសោះ។ ប្រតិកម្មប្រឆាំងអាមេរិកក៏មានដែរពីរដ្ឋអំណាចនៅហុងកុង តែបានត្រឹមចោទអាមេរិកពីបទលូកដៃក្នុងរឿងកិច្ចការផ្ទៃក្នុងរបស់ហុងកុង។ ចំណែកអ្នកដែលត្រេកត្រអាលខ្លាំងជាងគេ គឺក្រុមអ្នកប្រជាធិបតេយ្យហុងកុង។
មានសេចក្តីសម្រេចចិត្តចំនួនពីរដែលប្រធានាធិបតីអាមេរិកលោកដូណាល់ ត្រាំបានចុះហត្ថលេខា និងប្រកាសដាក់ឲ្យប្រើប្រាស់ស្តីពីបញ្ហានៅហុងកុង ទី១ គឺច្បាប់ឆ្នាំ ២០១៩ ស្តីពីសិទ្ធិមនុស្ស និងប្រជាធិបតេយ្យនៅហុងកុង ឬហៅច្បាប់គាំទ្រក្រុមបាតុករអ្នកប្រជាធិបតេយ្យហុងកុង និងទី២ គឺច្បាប់ហាមលក់ទៅឲ្យប៉ូលិសហុងកុងនូវគ្រប់សម្ភារៈបរិក្ខារដែលប្រើសំដៅវាយបង្រ្កាបលើបាតុកម្ម។ គួរបញ្ជាក់ថា ច្បាប់អាមេរិកទាំងពីរស្តីពីហុងកុងត្រូវបានសភាអាមេរិកទាំងពីរបោះឆ្នោតគាំទ្រក្នុងសម្លេងភាគច្រើនលើសលុបកាលពី ១សប្តាហ៍មុន។ សូមជម្រាបថា ហុងកុងក្នុងនាមជាដែនដីស្វយ័តរបស់ចិនទទួលបានលក្ខន្តិកៈសេដ្ឋកិច្ចពិសេសមួយពីអាមេរិកដែលចិនដីគោកគ្មានទេ។
លក្ខន្តិកៈសេដ្ឋកិច្ចពិសេសមួយនេះត្រូវបានរដ្ឋបាលអាមេរិកពិនិត្យមើលជារៀងរាល់ឆ្នាំដោយភ្ជាប់ទៅនឹងលក្ខខណ្ឌនៃការគោរពសិទ្ធិមនុស្សពីសំណាក់រដ្ឋអំណាចហុងកុង មានន័យថា បើសេរីភាព និងសិទ្ធិមនុស្សនៅហុងកុងត្រូវបានរំលោភ ក្រុងវ៉ាស៊ីនតោននឹងព្យួរលក្ខន្តិកៈសេដ្ឋកិច្ចពិសេសដែលខ្លួនបានផ្តល់ឲ្យហុងកុង។ រដ្ឋបាលអាមេរិកបានមើលឃើញថា សិទ្ធិបាតុកម្មនៅហុងកុងពេលនេះមិនត្រូវបានគោរព ហើយចំណាត់ការរបស់រដ្ឋអំណាចហុងកុងលើក្រុមបាតុករអ្នកប្រជាធិបតេយ្យហុងកុងតាំងពី ៦ខែកន្លងទៅជាការរំលោភសិទ្ធមនុស្ស។
ជាច្បាប់អាក្រក់ខ្លាំង និងគាំទ្រសកម្មភាពរបស់ក្រុមឧក្រិដ្ឋជន
គ្មានអ្វីគួរឲ្យភ្ញាក់ផ្អើល ប្រតិកម្មរបស់ចិនមានពីក្រុងប៉េកាំង ពីរដ្ឋអំណាចហុងកុង និងពីការិយាល័យចិនប្រចាំនៅហុងកុង។ ក្រុងប៉េកាំងបានចាត់ទុកច្បាប់គាំទ្របាតុករហុងកុងរបស់អាមេរិកជាច្បាប់ដ៏អាក្រក់ផុតលេខ និងយល់ឃើញថា ច្បាប់នេះបានគាំទ្រលើសកម្មភាពរបស់ក្រុមឧក្រិដ្ឋជនហិង្សាដែលបានប្រឆាំងនឹងពលរដ្ឋស្លូតត្រង់នៅហុងកុង។ បន្ទាប់មក ចិនដីគោកបានព្រមានចាត់វិធានការវាយបកទល់នឹងអាមេរិកវិញ តែមិនទាន់បានលំអិតពីវិធានការទាំងនោះទេ។ ទន្ទឹមគ្នានេះ ក្រសួងការបរទេសចិនបានកោះហៅឯកអគ្គរដ្ឋទូតអាមេរិកប្រចាំក្រុងប៉េកាំងទៅសួរនាំ និងបានស្នើអាមេរិកកុំឲ្យអនុវត្តលើច្បាប់នោះ។
ប្រតិកម្មហាក់ស្លូតបន្តិចពីរដ្ឋអំណាចហុងកុងដោយត្រឹមចោទអាមេរិកពីបទលូកដៃចូលកិច្ចការផ្ទៃក្នុងរបស់ហុងកុង។ ដោយឡែក ការិយាល័យទំនាក់ទំនងរបស់ចិនប្រចាំហុងកុងបានថ្កោលទោសចំពោះអាកប្បកិរិយាគួរឲ្យស្អប់ខ្ពើមរបស់រដ្ឋបាលអាមេរិក និងយល់ឃើញថា ទង្វើរបស់ក្រុងវ៉ាស៊ីនតោនអាចនាំឲ្យមានចលាចល និងភាពវឹកវរនៅហុងកុង។ ចិនបានសម្តែងភាពក្តៅក្រហាយចំពោះលោកដូណាល់ ត្រាំដែលបានសម្រេចចុះហត្ថលេខា និងប្រកាសដាក់ឲ្យប្រើប្រាស់នូវច្បាប់គាំទ្រក្រុមបាតុករអ្នកប្រជាធិបតេយ្យហុងកុង។ ចំណែកក្រុមសកម្មជនគាំទ្រប្រជាធិបតេយ្យនៅហុងកុងបានសម្តែងការសប្បាយចិត្តយ៉ាងខ្លាំង រួមទាំងក្រុមអ្នកនយោបាយអាមេរិកគ្រប់និន្នាការ។
« ប្រទេសយើងបាននៅជាមួយក្រុមបាតកុរក្នុងពេលដែលពួកគេកំពុងបន្តតស៊ូទាមទារស្វ័យភាព លទ្ធិប្រជាធិបតេយ្យ និងសិទ្ធិមនុស្សនៅហុងកុង » នេះជាសំណេររបស់លោក Ben Carlin សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ ។ ចំណែកសមាជិកព្រឹទ្ធសភាអាមេរិកមកពីគណបក្សសាធារណរដ្ឋលោក Marco Rubio បានថ្លែងយ៉ាងដូច្នេះថា « ខ្ញុំទះដៃសាទរប្រធានាធិបតីត្រាំដែលបានប្រកាសដាក់ឲ្យប្រើប្រាស់ច្បាប់សំខាន់មួយនេះ »។
សង្រ្គាមពាណិជ្ជកម្មនឹងបន្តអូសបន្លាយ?
វាដូចជារហ័សពេកដែលគេអាចលើកឡើងនូវផលវិបាកជាយថាហេតុណាមួយរវាងអាមេរិក និងចិន ព្រោះក្រុងប៉េកាំងក៏នៅមិនបានលំអិតពីវិធានការដែលខ្លួនចង់តបទៅក្រុងវ៉ាស៊ីនតោនវិញ។ តែគេអាចនិយាយបានថា កាយវិការរបស់អាមេរិកពេលនេះបានធ្លាក់មក ខណៈដែលប្រទេសមហាអំណាចសេដ្ឋកិច្ចលំដាប់ទី១ និងទី២ ក្នុងលោកនៅមិនទាន់អាចដោះស្រាយជម្លោះពាណិជ្ជកម្មរវាងគ្នានៅឡើយ។ ដូច្នេះអ្វីដែលគេអាចនិយាយបាននៅចំពោះមុខពេលនេះ លោកដូណាល់ ត្រាំបានបន្ថែមបញ្ហាលើបញ្ហាដែលមានស្រាប់នៅក្នុងដំណោះស្រាយជម្លោះពាណិជ្ជកម្មជាមួយចិន។
គួរបញ្ជាក់ថា មុននឹងសម្រេចចិត្តចុះហត្ថលេខា និងប្រកាសដាក់ឲ្យប្រើប្រាស់នូវច្បាប់គាំទ្រក្រុមបាតុករហុងកុង លោកដូណាល់ ត្រាំបានរារែក និងប្រើពេលយូរដើម្បីពិចារណា។ នេះក៏ដោយសារតែលោកបារម្ភពីប្រតិកម្មក្តៅក្រហាយខ្លាំងរបស់ចិន ហើយក៏មិនចង់ធ្វើឲ្យប៉ះពាល់ដល់ដំណើរការចរចាដើម្បីបញ្ចប់សង្រ្គាមពាណិជ្ជកម្មដែរ។ តែទីបំផុត លោកត្រាំនៅតែធ្វើដដែល។ ក្នុងរយៈពេលចុងក្រោយនេះ ប៉េកាំង និងវ៉ាស៊ីនតោនសុទ្ធតែបានអះអាងដូចគ្នាពីសញ្ញាវិជ្ជមានឆ្ពោះទៅសម្រេចបានកិច្ចព្រមព្រៀងពាណិជ្ជកម្មបឋមមួយ។ ដូច្នេះគេត្រូវរង់ចាំមើលនាពេលខាងមុខពីការវិវឌ្ឍន៍នៅក្នុងទំនាក់ទំនងរវាងអាមេរិក និងចិន និយាយជារួម និងនៅក្នុងសំណុំរឿងសង្រ្គាមពាណិជ្ជកម្ម និយាយដោយឡែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ