AirAsia៖បំណែកខ្លួនយន្តហោះ និង សាកសពបន្ថែមទៀត ត្រូវបានគេរកឃើញ
ការរុករកបំណែកយន្តហោះAirAsia នៅក្នុងលំហរសមុទ្រហ្សាវ៉ា កំពុងតែបន្ត ទៅមុខ ថ្វីត្បិតតែ មានអាកាសធាតុ ខ្មៅអួរអាប់ ខ្យល់ខ្លាំងយ៉ាងណាក៏ដោយ។ តាមព័ត៌មានចុងក្រោយ ដោយយោងទៅលើ ទិន្នន័យរបស់ម៉ាស៊ីនថតសំឡេង បាតសមុទ្រ គឺគេអាចកំណត់ ពីទីតាំងបំណែកខ្លួនយន្តហោះ នៅបាតសមុទ្រ បានហើយ។ អាជ្ញាធរ ក៏បានស្រង់ យកសាកសពមនុស្ស មួយចំនួន បន្ថែមទៀតដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ថ្ងៃ ៣១ ធ្នូ ជាថ្ងៃបុណ្យ ឆ្លងឆ្នាំសកល ឈានចូលឆ្នាំ ២០១៥។ ប៉ុន្តែសម្រាប់ក្រុមគ្រួសារ ជនរងគ្រោះ ដោយគ្រោះថ្នាក់ធ្លាក់យន្តហោះ AirAsia វិញ គឺពួកគេ គ្មានចិត្តឯណា ទៅសប្បាយទេ។ ពួកគេទាំងអស់ បានជួបជុំគ្នា រងចាំស្តាប់ ដំណឹងពីអាជ្ញាធរឥណ្ឌូណេស៊ី ស្តីពីលទ្ធផល នៃការរុករក យន្តហោះ និងជនរងគ្រោះ នៅក្នុងសមុទ្រ។ ម្នាក់ៗ នៅតែមានកូនចិត្ត សង្ឃឹមថា ប្រហែលជាមានអ្នកនៅរស់រាន មានជីវិត។
ទោះបីជាយ៉ាងណា សេចក្តីសង្ឃឹម វាកាន់តែថយតិចទៅៗ ព្រោះនៅរសៀសថ្ងៃ ពុធ ទី៣១ ធ្នូនេះ អាជ្ញាធរឥណ្ឌូណេស៊ី បានប្រកាសថា ខ្លួនទើបបានទទួលទិន្និន័យ របស់ម៉ាស៊ីនថតសំឡេងបាតសមុទ្រ ដែលគេហៅថាសូណារ(SONAR)។ ទិន្ន័យនេះ បានបង្ហាញ ពីទីតាំងដែលបំណែកខ្លួនយន្តហោះ បានធ្លាក់ទៅក្នុងបាតសមុទ្រ។
កាសែត ញូយ៉កថែម ក៏បានចុះផ្សាយផងដែរថា ក្រុមអ្នករុករក ដែលបានធ្វើការហោះហើរ ពីលើផ្ទៃសមុទ្រ បានសង្កេតឃើញ មានស្រមោលខ្មៅដ៏ធំ ដែលទំនងអាចជាខ្លួនយន្តហោះ ដែលធ្លាក់ចូលទៅបាតសមុទ្រ ដែលទីតាំងនេះ វាស្របទៅនឹង ទិន្ន័យរបស់ម៉ាស៊ីនថតបាតសមុទ្រដែរ។ ប៉ុន្តែការស្រាវជ្រាវ បានជួបការលំបាក ដោយសារតែខ្យល់ និងរលកធំៗពេក ដែលធ្វើឲ្យអ្នកមុជទឹកទៅបាតសមុទ្រ មិនទាន់អាចធ្វើប្រតិបត្តិការបាន។
អាជ្ញាធរឥណ្ឌូណេស៊ី បានប្រកាសទៀតថា ក្រុមអ្នកស្រាវជ្រាវ ទើបបានស្រង់សាកសពមនុស្ស ៤នាក់បន្ថែមទៀត។ សូមបញ្ជាក់ផងដែរ ថាកាលពីម្សិលមិញ ក្រុមអ្នករុករកបានស្រង់សាកសពចំនួនតែ៣នាក់ទេ។ អ្នកនាំពាក្យ ឥណ្ឌូណេស៊ី បានមានការភ័នច្រឡំ ដោយបានផ្តល់ពត៌មាន មកឲ្យក្រុមការងាររបស់វិទ្យុបារាំងថា មាន សាកសព៤០នាក់។ ដូច្នេះ យើងខ្ញុំ សូមធ្វើការកែតម្រូវ។ រហូតមកដល់ពេលនេះ សាកសាពមនុស្ស ដែលគេស្រង់បាន មាន ៧នាក់ហើយ។
ក្នុងចំណោមសាកសពទាំងអស់នេះ មានម្នាក់ ដែលជាបុគ្គលិក បំរើការលើយន្តហោះ ដោយមានពាក់ឯកសណ្ឋាន ជាសំគាល់។ ដោយឡែក មានសាកសព ម្នាក់ទៀត ដែលមានពាក់អាវពោង ជាប់នឹងខ្លួន។ ការនេះ បានធ្វើឲ្យក្រុមអ្នកស្រាវជ្រាវ អាចសន្និដ្ឋានបានថា យន្តហោះបានសំយ៉ុងខ្លួន ធ្លាក់ទៅក្នុងសមុទ្រ ហើយអ្នកបើកបរ បានប្រកាសឲ្យអ្នកដំណើរទាំងអស់ ត្រៀមខ្លួន ហើយយកអាវពោងមកពាក់។ អាជ្ញាធរបានសន្និដ្ឋានទៀតថា យន្តហោះ អាចបែកជាជំរៀក ក្រោយពេល បោកផ្ទប់ ទៅនឹងទឹកសមុទ្រ។ ក្រៅតែពីសាកសព នៅមានបំណែកផ្សេងៗទៀត របស់យន្តហោះ ដូចជាទ្វារយន្តហោះជាដើម ដែលគេបានស្រង់ យកមកលើគោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ