អូស្ត្រាលីកំពុងចរចាបញ្ចុះបញ្ចូលហ្វីលីពីន ឲ្យទទួលជនភៀសខ្លួន បន្តពីខ្លួន
នៅអូស្ត្រាលី មនុស្សរាប់ពាន់នាក់ បានចូលរួមក្នុងក្បួនតវ៉ា មួយ នៅថ្ងៃអាទិត្យ នេះ ដើម្បីទាមទារឲ្យរដ្ឋាភិបាលដោះលែងអ្នកស្វែងរកសិទ្ធិជ្រកកោន និងបិទជំរំជនភៀសខ្លួន ដែលរដ្ឋាភិបាលបានបង្កើត នៅលើដីជួល ក្នុងកោះណូរុ និងកោះប៉ាពូអាស៊ីនូវែលហ្គីណេ ក្នុងមហាសមុទ្រប៉ាស៊ីហ្វិក។ កាលពីថ្ងៃសុក្រ រដ្ឋមន្រ្តីអន្តោប្រវេសន៍បាននិយាយប្រាប់អ្នកកាសែតថា អូស្ត្រាលីកំពុងចរចាជាមួយហ្វីលីពីន ដើម្បី ឲ្យទទួលយកជនភៀសខ្លួន ដែលអូស្ត្រាលីមិនចង់ឲ្យទៅជាន់ទឹកដីអូស្ត្រាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ប្រជាជនអូស្ត្រាលី រាប់ពាន់នាក់ដែលសាមគ្គីភាពជាមួយជនភៀសខ្លួន បានប្រមូលគ្នារាប់ពាន់នាក់ ដើរដង្ហែរក្បួន ដើម្បីទាមទាររដ្ឋាភិបាលឲ្យលះបង់ចោលនយោបាយចាប់ដាក់ឃុំអ្នកស្វែងរកសិទ្ធិជ្រកកោន នៅលើកោះណូរុ តទៅទៀត។ ពួកគេបានទាមទារផងដែរ ឲ្យនាយករដ្ឋមន្រ្តីថ្មី របស់អូស្ត្រាលី លោក Malcolm Turnbull បិទមណ្ឌលឃុំខ្លួនរបស់អូស្ត្រាលីនៅលើកោះ ណូរុ និងកោះ ប៉ាពូអាស៊ីនូវែលហ្គីណេ និងដឹកជញ្ជូនជនភៀសខ្លួនទាំងនោះចូលក្នុងទឹកដីអូស្ត្រាលីវិញ។
បាតុកម្មតវ៉ាដើម្បីបុព្វហេតុជនភៀសខ្លួន កើតឡើង បន្ទាប់ពីមានរបាយការណ៍របស់ក្រុមគ្រូពេទ្យស្ម័គ្រចិត្តរបស់អូស្ត្រាលី បានលើកឡើងពីស្ថានភាពអត្តខ័ត និងអំពើហិង្សា ដែលជនភៀសខ្លួនត្រូវជួបប្រទះ នៅក្នុងជំរំរបស់អូស្ត្រាលី នៅលើកោះ ណូរុ។ ទៅតាមពាក្យបណ្តឹងរបស់សកម្មជនការពារសិទ្ធិជនភៀសខ្លួន តុលាការកំពូលអូស្ត្រាលី កំពុងពិនិត្យមើលទៅលើភាពស្របច្បាប់ នៃការបង្កើតជំរំជនភៀសខ្លួន ដែលរដ្ឋាភិបាលអូស្ត្រាលី កំពុងធ្វើ ក្នុងទឹកដីបរទេស។
នៅក្រោមច្បាប់អន្តោប្រវេសន៍ដ៏តឹងតែង អូស្ត្រាលី តែងចាប់បញ្ចៀស មិនឲ្យទូកដឹកជនអន្តោប្រវេសន៍ ចូលក្នុងទឹកដីរបស់ខ្លួន។ ក្រុមមនុស្សដែលបានដាក់ពាក្យស្វែងរកសិទ្ធិជ្រកកោន ត្រូវអាជ្ញាធរអូស្ត្រាលីចាប់បញ្ជូនទៅដាក់ក្នុងជំរំភៀសខ្លួន នៅលើកោះណូរុ ក្នុងមហាសមុទ្រប៉ាស៊ីហ្វិក។ ថ្មីៗនេះ រដ្ឋាភិបាលអូស្ត្រាលីបានចុះកិច្ចព្រមព្រៀងជាមួយកម្ពុជា ដើម្បីទទួលជនភៀសខ្លួន បន្តពីអូស្ត្រាលី ជាថ្នូរនឹងប្រាក់ជំនួយ សម្រាប់ការអភិវឌ្ឍន៍ ចំនួន៤០លានដុល្លារ។ រហូតមក មានតែជនភៀសខ្លួន ៤នាក់ប៉ុណ្ណោះ ដែលបានយល់ព្រម ទៅរស់នៅកម្ពុជា។
កាលពីថ្ងៃសុក្រ រដ្ឋមន្រ្តីអន្តោរប្រវេសន៍ នៅបានអះអាងថា រដ្ឋាភិបាល កំពុងចរចាជាមួយប្រទេសដទៃទៀត ដើម្បីទទួលបន្តជនភៀសខ្លួន ពីអូស្ត្រាលី ដែលក្នុងនោះ មានផងដែរ ហ្វីលីពីន។ តាមលោកPeter Dutton រដ្ឋមន្រ្តីការបរទេសអូស្ត្រាលី លោកស្រីJulie Bishopដែលកំពុងចូលរួម ក្នុងអង្គប្រជុំអង្គការសហប្រជាជាតិ កំពុងពិភាក្សាជាមួយរដ្ឋមន្រ្តីការបរទេសហ្វីលីពីន។ តាមកាសែត The Australian ដែលជាអ្នកបញ្ចេញព័ត៌មានស្តីពីជំនួបអូស្ត្រាលី និងហ្វីលីពីន គម្រោងថ្មីនេះ នឹងធ្វើឲ្យរដ្ឋាភិបាលអូស្ត្រាលី ចំណាយថវិកា ប្រមាណ ១០៨លានដុល្លារ អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ