លោក Fabius៖បារំាង និងចិនចង់ចាប់ដៃគ្នាដើម្បីក្រសោបទីផ្សារនៅអាស៊ី ឬនៅអាហ្រ្វិក
លោកប្រមុខការទូតបារំាង Laurent Fabius បានទៅបំពេញទស្សនកិច្ចលើកទី១០ ក្នុងប្រទេសចិននៅថ្ងៃសុក្រ ទី១៥ ឧសភា។ ក្រោយពីបានចូលជួបសន្ទនាជាមួយលោកនាយករដ្ឋមន្រ្តីចិនលី ខឺជំាងនៅវិមានរដ្ឋាភិបាលក្នុងទីក្រុងប៉េកំាង លោក Fabius បានបញ្ជាក់ឲ្យដឹងថា បារំាង និងចិនមានបំណងចាប់ដៃគ្នាដើម្បីក្រសោបយកទីផ្សារនៅទ្វីបអាស៊ី ឬនៅទ្វីបអាហ្រ្វិក។ ទន្ទឹមគ្នានេះ ប្រមុខការទូតបារំាងក៏បានប្រាប់ឲ្យដឹងពីគម្រោងបំពេញទស្សនកិច្ចរបស់ប្រមុខរដ្ឋាភិបាលចិនលី ខឺជំាងក្នុងប្រទេសបារំាងនៅពេលខាងមុខឆាប់ៗនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ជាផ្លូវការហើយ លោកនាយករដ្ឋមន្រ្តីចិនលី ខឺជំាងនឹងមកបំពេញទស្សនកិច្ចក្នុងទីក្រុងប៉ារីស និងនៅខេត្តទូលូក្នុងប្រទេសបារំាងនាចុងខែមិថុនា ឬដើមខែកក្កដាខាងមុខ នេះការបញ្ជាក់របស់លោកប្រមុខការទូតបារំាង Laurent Fabius នៅក្រោយជំនួបជាមួយលោកលី ខឺជំាងក្នុងទីក្រុងប៉េកំាង។ ក្រៅពីប្រាប់ឲ្យដឹងពីគម្រោងទស្សនកិច្ចរបស់ប្រមុខរដ្ឋាភិបាលចិនក្នុងទឹកដីបារំាង លោក Fabius ក៏បានបញ្ជាក់ឲ្យដឹងពីបំណងប្រាថ្នារួមគ្នារបស់ប៉ារីស និងប៉េកំាងក្នុងការក្រសោបយកទីផ្សារទី៣ ដោយមិនថានៅទ្វីបអាស៊ី ឬមួយក៏នៅទ្វីបអាហ្រ្វិកទេ។
គម្រោងចាប់ដៃរួមគ្នារវាងបារំាង និងចិនដើម្បីដណ្តើមយកទីផ្សារទី៣ ពេលនេះបានធ្វើឡើង ចំពេលដែលចិនកំពុងស្គាល់កំណើនសេដ្ឋកិច្ចទ្រឹងមួយកន្លែង ដោយសារតែវិស័យនំាចេញធ្លាក់ចុះ និងការស្រុតចុះនៃតម្រូវការក្នុងស្រុក។ អ៊ីចឹងហើយបានជារដ្ឋាភិបាលចិនបានជម្រុញឲ្យរោងចក្រ សហគ្រាសរបស់ខ្លួនផ្តើមគិតគូរបន្ថែមទៀតពីផែនការពង្រីកការអភិវឌ្ឍន៍នៅបរទេស។ នៅក្នុងករណីនេះ ចិនអាចចាប់ដៃជាមួយបារំាងដើម្បីទាញយកបទពិសោធន៍ និងចំណេះដឹងរបស់ក្រុមហ៊ុន រោងចក្រ សហគ្រាសបារំាងស្តីពីទីផ្សារ ពិសេសក្រុមហ៊ុន រោងចក្រ សហគ្រាសបារំាងណាដែលបានបោះទីតំាងយូរអង្វែងនៅក្រៅប្រទេស។
និយាយពីទំនាក់ទំនងសេដ្ឋកិច្ចរវាងបារំាង ចិនវិញ វិនិយោគបារំាងនៅចិនបានកើនឡើងគួរឲ្យកត់សម្គាល់ ពោលកើន ២៩,៨% នៅ ៤ខែដើមឆ្នំា ២០១៥ នេះ។ ចំណែកវិនិយោគចិននៅបារំាងក៏មានការកើនឡើងដែរ។ ក្រៅពីជួបជាមួយលោកលី ខឺជំាង លោក Fabius ក៏បានជួបសន្ទនាជាមួយលោករដ្ឋមន្រ្តីក្រសួងពាណិជ្ជកម្មចិន Gao Hucheng ដែរ។ នៅក្នុងជំនួបនោះ លោក Fabius បាននិយាយប្រាប់លោក Gao ពីការរង់ចំារបស់បារំាងដើម្បីរួមសហការណ៍បន្ថែមជាមួយចិននៅក្នុងវិស័យអាកាសនាវាវិជ្ជា។
គួរជម្រាបជូនថាបច្ចុប្បន្ននេះ ក្រុមហ៊ុនផលិតយន្តហោះអឺរ៉ុប Airbus ដែលមានមូលដ្ឋាននៅខេត្តទូលូ ប្រទេសបារំាងបានសង់រោងចក្រមួយនៅចិនដើម្បីដំឡើងយន្តហោះ Airbus ខ្នាតមធ្យម A ៣២០ តែលោក Fabius ចង់ឲ្យមានការដំឡើងយន្តហោះ Airbus ខ្នាតវែង A ៣៣០ បន្ថែមទៀត។ ក្រៅពីដៃគូក្នុងវិស័យអាកាសនាវាវិជ្ជា បារំាង និងចិនក៏គ្រោងធ្វើជាដៃគូនៅក្នុងវិស័យថាមពល និងយានយន្តផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ