លោកនាយករដ្ឋមន្រ្តីបារំាងផ្តើមទស្សនកិច្ចរយៈពេល ៣ថ្ងៃក្នុងប្រទេសចិន
ចុះផ្សាយនៅថ្ងៃ៖
ស្តាប់ - ០៦:០១
នៅថ្ងៃព្រហស្បតិ៍ ទី២៩ មករានេះ លោកនាយករដ្ឋមន្ត្រីបារំាងម៉ានុយអែល វ៉ាល្សបានផ្តើមដំណើរទស្សនកិច្ចផ្លូវការរយៈពេល ៣ថ្ងៃនៅក្នុងប្រទេសចិន។ គឺជាដំណើរទស្សនកិច្ចដែលបានគ្រោងទុកជាមុនក្នុងឱកាសដែលប្រទេសទំាងពីរបិទបញ្ចប់ខួបគម្រប់ ៥០ឆ្នំានៃទំនាក់ទំនងការទូតបារំាង ចិន។ លោកម៉ានុយអែល វ៉ាល្សបានផ្តើមទស្សនកិច្ចថ្ងៃនេះនៅក្នុងទីក្រុងជំាងយីន មុននឹងបន្តដំណើរទៅកាន់ទីក្រុងប៉េកំាង និងសៀងហៃ។ នៅពេលទៅដល់ទីក្រុងជំាងយីន លោកវ៉ាល្សបានអំពាវនាវឲ្យមានសមភាពនៅក្នុងការដោះដូរពាណិជ្ជកម្មរវាងបារំាង និងចិន ក៏ដូចជារវាងសហភាពអឹរ៉ុប និងចិន។
តាមរយៈសារថ្លែងនៅក្នុងទីក្រុងជំាងយីនថ្ងៃនេះនំាឲ្យគេសន្និដ្ឋានបានភ្លាមថា កម្មវត្ថុសំខាន់នៃទស្សនកិច្ចរបស់ប្រមុខរដ្ឋាភិបាលបារំាងនៅចិនពេលនេះ គឺសេដ្ឋកិច្ច។ ចូរកុំភ្លេចថា នរណាក៏ចង់រកស៊ីជាមួយចិនដែរ ព្រោះក្នុងនាមជាប្រទេសមហាអំណាចសេដ្ឋកិច្ចទី២ ក្នុងលោក និងចំពេលដែលបរិបទសេដ្ឋកិច្ចពិភពលោកកំពុងត្រដរខ្យល់នោះ ចិននៅតែមានកំណើនសេដ្ឋកិច្ចវិជ្ជមានជានិច្ច។ ដូច្នេះសម្រាប់លោកប្រមុខរដ្ឋាភិបាលបារំាង ម៉ានុយអែល វ៉ាល្ស ចិន ជាតួអង្គសេដ្ឋកិច្ចមួយយ៉ាងសំខាន់ដែលបារំាងមិនអាចមើលរំលងបានទេ ហើយដំណើរទៅកាន់ទីក្រុងជំាងយីនមុនគេក្នុងថ្ងៃនេះក៏ដោយសារថា មានវត្តមានរោងចក្រផលិតយន្តហោះ Airbus របស់សហភាពអឺរ៉ុបតំាងពី ១០ឆ្នំាមកហើយនៅក្នុងទីក្រុងជំាងយីន និងដែលយន្តហោះ Airbus ប្រមាណជា ១ភាគ៤ផលិតចេញពីរោងចក្រនោះបានលក់ទៅឲ្យក្រុមហ៊ុនអាកាសចរណ៍ចិន។
ថ្លែងនៅក្នុងជំនួបជាមួយអគ្គនាយកក្រុមហ៊ុន Airbus ក្នុងទីក្រុងជំាងយីន លោកម៉ានុយអែល វ៉ាល្សបញ្ជាក់ថា បារំាងស្វាគមន៍អ្នកវិនិយោគចិនគ្រប់រូប និងប្តេជ្ញាពង្រឹងភាពជាដៃគូជាមួយចិនសម្រាប់រយៈពេលយូរអង្វែង។ សូមជម្រាបជូនថា នៅក្នុងទស្សនកិច្ចនោះ លោកនាយករដ្ឋមន្រ្តីបារំាងបាននំាយកទៅជាមួយលោកនូវអគ្គនាយកក្រុមហ៊ុន និងរោងចក្រ សហគ្រាស ដូចជាក្រុមហ៊ុនអគ្គិសនីបារំាង EDF ក្រុមហ៊ុន Thales ផ្នែកអេឡិចត្រូនិច បច្ចេកវិទ្យា និងការពារ ឬមួយក៏ក្រុមហ៊ុនដឹកជញ្ជូនផ្លូវដែក SNCF ជាដើម។ ទន្ទឹមគ្នានោះ លោកម៉ានុយអែល វ៉ាល្សក៏បានឆ្លៀតសាទរចំពោះការចូលរួមរបស់អ្នកវិនិយោគចិននៅក្នុងការដេញថ្លៃយកអាកាសយានដ្ឋានក្នុងខេត្តទូលូ (Toulouse) និងយកក្រុមហ៊ុនទេសចរណ៍ Club Med ក្នុងប្រទេសបារំាង។
លោកម៉ានុយអែល វ៉ាល្សអំពាវនាវឲ្យមានសមភាពនៅក្នុងការដោះដូរពាណិជ្ជកម្មរវាងបារំាង និងចិន
ការអំពាវនាវរបស់លោកប្រមុខរដ្ឋាភិបាលបារំាងយ៉ាងដូចនេះក៏ដោយសារតែកម្រិតនៃការនំាទំនិញបារំាងចេញទៅចិន និងការនំាទំនិញចិនចូលមកបារំាងមានគម្លាតគ្នាឆ្ងាយពេក។ បច្ចុប្បន្ន បារំាងបាននំាទំនិញចិនចូល ២ដងកន្លះច្រើនជាងចិននំាទំនិញបារំាងចូល។ ទន្ទឹមគ្នានេះ គម្លាតក៏មានដែររវាងចំនួនអ្នកវិនិយោគបារំាងនៅចិន និងអ្នកវិនិយោគចិននៅបារំាង មានន័យថា ជនជាតិបារំាងបាននំាគ្នាទៅរកស៊ីនៅស្រុកចិន ច្រើនជាងជនជាតិចិនចូលមកបោះទុនរកស៊ីក្នុងស្រុកបារំាង។ គឺគម្លាតទំាងពីរនេះហើយដែលលោកប្រមុខរដ្ឋាភិបាលបារំាងចង់ធ្វើការកាត់បន្ថយ តាមរយៈគម្រោងកំណែទម្រង់ប្រកបដោយមហិច្ចតារបស់រដ្ឋាភិបាលលោកក្នុងការពង្រឹងវិស័យប្រកួតប្រជែងរបស់ក្រុមហ៊ុន សហគ្រាសបារំាង។
ក្រៅពីការកាត់បន្ថយគម្លាតនៃការដោះដូរពាណិជ្ជកម្មរវាងបារំាង និងចិន លោកនាយករដ្ឋមន្រ្តីបារំាងក៏បានអំពាវនាវឲ្យមានការកាត់បន្ថយគម្លាតនៃការដោះដូរពាណិជ្ជកម្មរវាងចិន និងសហភាពអឺរ៉ុបផងដែរ។ តែលោកម៉ានុយអែល វ៉ាល្សបានបញ្ជាក់ថា ដើម្បីអាចធ្វើយ៉ាងនេះបាន គេត្រូវតែផ្អែកលើមូលដ្ឋាននៃការទុកចិត្តគ្នា និងការគោរពគ្នាទៅវិញ ទៅមក។ តាមគម្រោង បារំាង និងចិនអាចនឹងចុះហត្ថលេខាលើកិច្ចសន្យាចំនួន ១៥។
សិទ្ធិមនុស្ស ជារឿងដែលចិនមិនចង់ឮ
ក្រៅពីរឿងសេដ្ឋកិច្ចដែលជាប្រធានបទអាទិភាព បញ្ហាអាកាសធាតុ និងរឿងភេរវនិយម ពិសេសអង្គការរដ្ឋអ៊ីស្លាមក៏អាចជាប្រធានរឿងដែលលោកប្រមុខរដ្ឋាភិបាលបារំាងលើកទៅជជែកជាមួយចិន។ តែប្រធានបទមួយដែលគ្រប់ថ្នាក់ដឹកនំាបស្ចិមលោក មិនថាបារំាង អាល្លឺម៉ង់ ឬមួយក៏អាមេរិកមិនភ្លេចលើកទៅជជែកជាមួយចិននោះ គឺរឿងសិទ្ធិមនុស្សក្នុងប្រទេសចិន។ បើតាមអ្នកជំនិតរបស់លោកម៉ានុយអែល វ៉ាល្សឲ្យដឹងថា លោកវ៉ាល្សអាចនឹងនិយាយខ្លះៗ ស្តើងៗ ពីរឿងសិទ្ធិមនុស្ស ឬមួយក៏អ្នកប្រឆំាងចិនមា្នក់ដែលកំពុងជាប់ក្នុងគុក គឺលោក Liu Xiaobao ជ័យលាភីរង្វាន់ណូបែលសន្តិភាព។
គួរជម្រាបជូនថា នេះជាលើកទី២ ហើយដែលលោកម៉ានុយអែល វ៉ាល្សបានដាក់ជើងជាន់ប្រទេសចិន លោកបានទៅលើកទី១ កាលពីឆ្នំា ២០១០ ដើម្បីចូលរួមនៅក្នុងការតំាងពិព័ណ៌ក្រុងសៀងហៃ តែក្នុងនាមជាចៅហ្វាយឃុំ Evry ស្ថិតជាយក្រុងប៉ារីស។ ម្យ៉ាងទៀត គឺក្នុងនាមជាចៅហ្វាយចៅហ្វាយឃុំ Evry នោះឯងដែលលោកបានទទួលដំណើរទស្សនកិច្ចរបស់សម្តេចសង្ឃទីបេដាឡៃ ឡាម៉ាកាលពីឆ្នំា ២០០៨ ហើយលោកប្រធានាធិបតីបារំាងសាកូហ្ស៊ីជំនាន់នោះក៏បានទទួលជួបសម្តេចសង្ឃដាឡៃ ឡាម៉ាដែរ។ ការទទួលសម្តេចសង្ឃដាឡៃ ឡាម៉ាដែលបានធ្វើឲ្យចិនក្តៅក្រហាយមិនតិចទេ។
ជាទូទៅ ថ្នាក់ដឹកនំាបស្ចិមលោកណាក៏ដោយដែលទៅនិយាយជាមួយថ្នាក់ដឹកនំាចិន គឺគេមិនភ្លេចនិយាយពីរឿងសិទ្ធមនុស្សទេ គ្រាន់តែតិច ឬច្រើនប៉ុណ្ណោះ។ តែកន្លងមក ចិនធ្លាប់បានព្រមានថា បញ្ហាសិទ្ធិមនុស្សរបស់ចិនគឺជារឿងរបស់ចិន ដោយចិនមិនត្រូវការមេរៀនពីអ្នកណាទេ និងថា អ្នកណាដែលចង់រកស៊ីជាមួយចិន មិនគួរលើកយករឿងសិទ្ធិមនុស្សទៅនិយាយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ