ប្រធានាធិបតីហ្វីលីពីនប្រដូចចិនទៅនឹងអាល្លឺម៉ង់សម័យសង្រ្គាមលោកលើកទី២
លោកប្រធានាធិបតីហ្វីលីពីន Benigno Aquino ដែលកំពុងបំពេញទស្សនកិច្ចនៅក្នុងប្រទេសជប៉ុន បានថ្លែងនៅថ្ងៃពុធនេះ ដោយធ្វើការប្រៀបប្រដូចប្រទេសចិនបច្ចុប្បន្នទៅនឹងអាល្លឺម៉ង់ក្នុងសម័យសង្រ្គាមលោកលើកទី២។ លោក Aquino ធ្វើការប្រៀបប្រដូចបែបនេះ ដោយសំដៅទៅលើសកម្មភាពវាតទីរបស់ចិន នៅក្នុងសមុទ្រចិនខាងត្បូង និងភាពចាំបាច់នៃតួនាទីរបស់អាមេរិកក្នុងការទប់ស្កាត់មហិច្ឆតារបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ការប្រៀបប្រដូចចិនទៅនឹងអាល្លឺម៉ង់ណាហ្ស៊ីត្រូវបានលោកអាគីណូធ្វើឡើង នៅក្នុងអំឡុងពេលជួបជាមួយអ្នកជំនួញជប៉ុន ក្នុងក្រុងតូក្យូ និងដើម្បីឆ្លើយតបទៅនឹងសំណួរអំពីតួនាទីរបស់អាមេរិកក្នុងការទប់ទល់នឹងការកើនឡើងឥតឈប់នៃអំណាចរបស់ចិន។
សម្រាប់លោកប្រធានាធិបតីហ្វីលីពីន សហរដ្ឋអាមេរិកមានតួនាទីសំខាន់បំផុត ក្នុងការទប់ស្កាត់សកម្មភាពវាតទីរបស់ចិន ហើយថា ប្រសិនបើអាមេរិក ដែលជាមហាអំណាចពិភពលោកមួយនោះ មិនអើពើទេនោះ ប្រហែលជាគ្មានអ្នកណាអាចរារាំងមហិច្ឆតារបស់ចិនបាននោះទេ។
នៅត្រង់ចំណុចនេះហើយដែលលោកអាគីណូបានរំឭកទៅដល់ប្រវត្តិសាស្រ្តសម័យសង្រ្គាមលោកលើកទី២ ដែលប្រទេសមហាអំណាចពេលនោះ បានឈរឱបដៃទុកបណ្តោយឲ្យហ៊ីត្លែរវាតទីពង្រីកទឹកដីឈ្លានពានប្រទេសតូចតាចតាមតែអំពើចិត្ត រហូតធ្វើឲ្យហ៊ីត្លែរបានចិត្តបង្កើនមហិច្ឆតាចង់ត្រួតត្រាពិភពលោក ហើយបង្កទៅជាសង្រ្គាមលោក។ សម្រាប់លោកប្រធានាធិបតីហ្វីលីពីន ប្រសិនបើប្រទេសមហាអំណាច ដូចជា បារាំង ឬអង់គ្លេស ចេញមុខរារាំងហ៊ីត្លែរតាំងពីដំបូង សង្រ្គាមលោកលើកទី២ ទំនងជានឹងមិនត្រូវផ្ទុះឡើងនោះទេ។
គេអាចយល់បានថា អត្ថន័យនៃការប្រៀបធៀបរបស់លោកអាគីណូ គឺចង់សំដៅថា ប្រសិនបើប្រទេសមហាអំណាចដូចជាអាមេរិកឈរឱបដៃទុកបណ្តោយឲ្យចិនធ្វើតាមតែអំពើចិត្ត វានឹងធ្វើឲ្យចិនកាន់តែបានចិត្តបង្កើនសកម្មភាពវាតទីរបស់ខ្លួន ដែលអាចនឹងនាំឲ្យផ្ទុះទៅជាសង្រ្គាមនៅថ្ងៃណាមួយ។
គួរបញ្ជាក់ថា នេះមិនមែនជាលើកទី១ទេ ដែលលោកអាគីណូបានធ្វើការប្រៀបប្រដូចចិនទៅនឹងអាល្លឺម៉ង់សម័យសង្រ្គាមលោកលើកទី២។ នៅក្នុងបទសម្ភាសន៍ជាមួយកាសែតអាមេរិក The New York Times កាលពីឆ្នាំទៅមិញ លោកប្រធានាធិបតីហ្វីលីពីនក៏បានធ្វើការប្រៀបប្រដូចស្រដៀងគ្នានេះដែរ ដែលកាលណោះបានធ្វើឲ្យចិនបញ្ចេញប្រតិកម្មតបតវិញទាំងកំហឹង ដោយបានហៅលោកអាគីណូថាជាមេដឹកនាំ “ស្ទើរភ្លើង” និង “ល្ងីល្ងើគ្មានដឹងខ្យល់អ្វីទាំងអស់”។
ចំពោះការថ្លែងរបស់លោកអាគីណូនៅក្នុងប្រទេសជប៉ុននៅថ្ងៃពុធនេះវិញ ចិនក៏មិនបានបង្អែបង្អង់យូរដែរ ដោយអ្នកនាំពាក្យក្រសួងការបរទេសចិនបានហៅការប្រៀបប្រដូចរបស់លោកអាគីណូថាជា “សម្តីគ្មានមូលដ្ឋាន” និងថា ហ្វីលីពីនកំពុងតែរួមដៃជាមួយប្រទេសក្រៅតំបន់ ដើម្បីមកបង្កជម្លោះនៅក្នុងតំបន់ ហើយទម្លាក់កំហុសដាក់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ