អ្នកជំនាញ៖ កាត់បន្ថយឧស្ម័នកាបូនិកនឹងមិនប៉ះពាល់ខ្លាំងដល់កំណើនសេដ្ឋកិច្ចទេ
ក្រុមអ្នកជំនាញខាងអាកាសធាតុរបស់អ.ស.ប បានចេញផ្សាយរបាយការណ៍មួយ នៅថ្ងៃអាទិត្យ ដោយជំរុញឲ្យគ្រប់ប្រទេសទាំងអស់ខិតខំប្រឹងប្រែងក្នុងការទប់ស្កាត់ការឡើងកម្តៅនៃភពផែនដី ព្រមទាំងបានសង្កត់ធ្ងន់ថា ការកាត់បន្ថយការបញ្ចេញឧស្ម័នកាបូនិកនឹងមិនធ្វើឲ្យប៉ះពាល់ដល់កំណើនសេដ្ឋកិច្ចខ្លាំងក្លា ដូចការព្រួយបារម្ភរបស់ប្រទេសមួយចំនួននោះទេ។
ចុះផ្សាយនៅថ្ងៃ៖
ស្តាប់ - ០២:២២
ឧស្ម័នកាបូនិក គឺជាដើមហេតុដ៏ចម្បងមួយ ដែលនាំឲ្យផែនដីឡើងកម្តៅ។ ក៏ប៉ុន្តែ ការបញ្ចេញឧស្ម័នកាបូនិក គឺជាលទ្ធផលនៃសកម្មភាពសេដ្ឋកិច្ច។ ហេតុដូច្នេះហើយបានជាបណ្តាប្រទេសជាច្រើនតែងតែនាំគ្នាព្រួយបារម្ភថា ប្រសិនបើគេខិតខំប្រឹងប្រែងកាត់បន្ថយការបញ្ចេញឧស្ម័នកាបូនិកឲ្យបានច្រើន អាចនឹងធ្វើឲ្យប៉ះពាល់ដល់សកម្មភាពសេដ្ឋកិច្ច។
ក៏ប៉ុន្តែ ក្រុមអ្នកជំនាញខាងអាកាសធាតុរបស់អ.ស.បបានបង្ហាញនូវការសិក្សាមួយ ដែលបង្ហាញថា ការកាត់បន្ថយការបញ្ចេញឧស្ម័នកាបូនិក បើទោះបីជាធ្វើនៅក្នុងទំហំធំធេងជាអតិបរមា អាចនឹងធ្វើឲ្យអត្រាកំណើនសេដ្ឋកិច្ចពិភពលោកថយចុះត្រឹមតែ ០,០៦%ប៉ុណ្ណោះ ក្នុងមួយឆ្នាំ។ ការថយចុះដ៏តិចតួចនៃកំណើនសេដ្ឋកិច្ចនេះគួរតែជារឿងដែលគួរឲ្យទទួលយកបាន បើគេប្រៀបធៀបទៅនឹងផលប៉ះពាល់ដ៏ធ្ងន់ធ្ងរ ដែលអាចបង្កឡើងដោយការឡើងកម្តៅនៃភពផែនដី។
ក្រុមអ្នកជំនាញក៏បានគូសបញ្ជាក់ផងដែរថា ប្រជាជនដែលរស់នៅតាមបណ្តាប្រទេសក្រីក្រ នឹងត្រូវក្លាយជាជនរងគ្រោះធ្ងន់ធ្ងរជាងគេ ដោយផលប៉ះពាល់ពីការឡើងកម្តៅនៃភពផែនដី។
គួរបញ្ជាក់ថា នៅក្នុងយុទ្ធនាការប្រយុទ្ធប្រឆាំងនឹងការឡើងកម្តៅនៃភពផែនដី សហគមន៍អន្តរជាតិបានដាក់ចេញនូវគោលដៅមួយថានឹងធ្វើយ៉ាងណាកុំឲ្យសីតុណ្ហភាពមធ្យមនៃភពផែនដីកើនឡើងលើសពី ២អង្សា ធៀបនឹងសីតុណ្ហភាពនៅពេលបច្ចុប្បន្ន។
នៅក្នុងរបាយការណ៍ចេញផ្សាយនៅថ្ងៃអាទិត្យ នៅក្នុងប្រទេសដាណឺម៉ាក ក្រុមអ្នកជំនាញអាកាសធាតុបានលើកឡើងថា ដើម្បីអាចសម្រេចតាមគោលដៅនេះបាន គេចាំបាច់ត្រូវតែកាត់បន្ថយការបញ្ចេញឧស្ម័នកាបូនិកឲ្យបានពី ៤០% ទៅ ៧០% នៅចន្លោះ ពីឆ្នាំ២០១០ ដល់ឆ្នាំ២០៥០ ដើម្បីឈានទៅបញ្ឈប់ការបញ្ចេញឧស្ម័នកាបូនិកទាំងស្រុង នៅត្រឹមឆ្នាំ២១០០។ ដើម្បីធ្វើបែបនេះបាន ពិភពលោកត្រូវតែរកវិធីថ្មីក្នុងការផលិតថាមពល ជំនួសថាមពលផូស៊ីល ដូចជា ប្រេង ឧស្ម័ន និងធ្យូងថ្ម ត្រូវបង្កើនប្រសិទ្ធភាពក្នុងការប្រើប្រាស់ថាមពល គ្រប់គ្នាត្រូវតែប្រើប្រាស់ថាមពលដោយសន្សំសំចៃ ព្រមទាំងត្រូវទប់ស្កាត់ការកាប់បំផ្លាញព្រៃឈើ។
ភ្លាមៗក្រោយពីរបាយការណ៍អាកាសធាតុនេះត្រូវចេញផ្សាយ លោកអគ្គលេខាធិការអ.ស.ប បាន គីមូន លោកប្រធានាធិបតីបារាំង ហ្វ្រង់ស័រ ហូឡង់ និងលោករដ្ឋមន្រ្តីការបរទេសអាមេរិក ចន ឃែរី សុទ្ធតែបាននាំគ្នាបង្ហាញនូវការគាំទ្រយ៉ាងពេញទំហឹង ចំពោះសេចក្តីសន្និដ្ឋានរបស់ក្រុមអ្នកជំនាញអាកាសធាតុ ហើយបានទទូចឲ្យមានកិច្ចខិតខំប្រឹងប្រែងជាសកល នៅក្នុងការទប់ស្កាត់ការឡើងកម្តៅនៃភពផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ