ឥណ្ឌាប្រារព្ធខួបគម្រប់ ៦៥ឆ្នំានៃថ្ងៃសាធារណរដ្ឋ « Republic Day » ដោយមានវត្តមានលោកអូបាម៉ា
នៅថ្ងៃចន្ទ ទី២៦ មករានេះ ប្រទេសឥណ្ឌាបានប្រារព្ធខួបគម្រប់ ៦៥ឆ្នំានៃថ្ងៃសាធារណរដ្ឋ « Republic Day » នៅក្រោមដំណក់ទឹកភ្លៀង។ ជាថ្ងៃដែលច្បាប់រដ្ឋធម្មនុញ្ញរបស់សាធារណរដ្ឋឥណ្ឌាបានចូលជាធរមានកាលពីថ្ងៃទី២៦ មករា ឆ្នំា ១៩៥០។ ក៏ដូចជារៀងរាល់ឆ្នំា បុណ្យជាតិមួយនេះត្រូវបានរៀបចំឡើងជាមួយនឹងពិធីដង្ហែរក្បួនព្យុះហយាត្រាស៊ីវិល និងយោធាដោយមានការបង្ហាញនូវគ្រឿងសព្វាវុធជាច្រើនប្រភេទ។ តែលក្ខណៈពិសេសនៅក្នុងខួបគម្រប់ ៦៥ឆ្នំាថ្ងៃនេះ គឺវត្តមានចូលរួមជាភ្ញៀវកិត្តិយសរបស់លោកប្រធានាធិបតីអាមេរិកអូបាម៉ា និងភរិយា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
វត្តមានលោកអូបាម៉ានៅក្នុងពិធីបុណ្យជាតិឥណ្ឌាថ្ងៃនេះ គឺជានិមិត្តរូបចំណងមិត្តភាពមួយដែលបង្កប់ដោយអត្ថន័យយ៉ាងជ្រាលជ្រៅរវាងអាមេរិក និងឥណ្ឌា។ អត្ថន័យជ្រាលជ្រៅ ព្រោះនេះជាលើកមួយបង្អស់ដែលមានប្រធានាធិបតីអាមេរិកកំពុងកាន់អំណាចម្នាក់ត្រូវបានឥណ្ឌាអញ្ជើញឲ្យចូលរួមជាភ្ញៀវកិត្តិយសនៅក្នុងពិធីបុណ្យថ្ងៃសាធារណរដ្ឋ « Republic Day »។ គ្រឿងសព្វាវុធរុស្ស៊ី និងសត្វអូដ្ឋលំអដោយកម្រងផ្កាគ្រប់ពណ៌ត្រូវបានគេយកទៅដង្ហែរនៅក្នុងក្បួនព្យុះហយាត្រដើរកាត់មុខវេទិកាក្រោមក្រសែភ្នែករបស់លោកនាយករដ្ឋមន្រ្តីឥណ្ឌា និងលោកប្រធានាធិបតីអាមេរិកអូបាម៉ា ព្រមទំាងថ្នាក់ដឹកនំាឥណ្ឌា និងមន្រ្តីគ្រប់ជាន់ថ្នាក់ជាច្រើនរូបផ្សេងទៀត។ នាឱកាសក្បួនព្យុះហយាត្រាថ្ងៃនេះ សន្តិសុខនៅក្នុងទីក្រុងញូដែលីត្រូវបានគេពង្រឹងដល់កម្រិតខ្ពស់ ដោយមានដាក់ពង្រាយកម្លំាងបាញ់ស៊ីបនៅតាមជាន់អាគារជាប់នឹងផ្លូវដង្ហែរក្បួនព្យុះហយាត្រា និងការដាក់កំាមេរ៉ាឃ្លំាមើលប្រមាណជា ១៥ ០០០គ្រឿង ព្រមទំាងហាមឃាត់គ្រប់យន្តហោះមិនឲ្យហោះហើរពីលើតំបន់។
គួរជម្រាបជូនថា បុណ្យជាតិឥណ្ឌាថ្ងៃនេះបានធ្វើឡើងចំពេលដែលលោកអូបាម៉ាកំពុងបំពេញទស្សនកិច្ចនៅឥណ្ឌារហូតដល់ថ្ងៃអង្គារ ទី២៧ មករាស្អែក។ តំាងពីថ្ងៃអាទិត្យម្សិលមិញ លោកអូបាម៉ា និងលោកម៉ូឌីបានលើកឡើងពីមិត្តភាព និងពីការទុកចិត្តគ្នារវាងប្រទេសទំាងពីរ នោះបើទោះបីជានៅមានបញ្ហាខ្លះដែលនំាឲ្យទំនាក់ទំនងរវាងគ្នាតែងតែជួបនឹងភាពរកាំរកូសក្តី ពិសេសនៅក្នុងវិស័យនុយក្លេអ៊ែរស៊ីវិល។ ក្រៅពីសន្យានឹងពន្លឿនកិច្ចសហប្រតិបត្តិការក្នុងវិស័យនុយក្លេអ៊ែរស៊ីវិល ឥស្សរជនទំាងពីរក៏បាននិយាយពីបញ្ហាអាកាសធាតុដែរ ព្រោះឥណ្ឌាជាប្រទេសទី៣ បន្ទាប់ពីចិន និងអាមេរិកដែលបានបញ្ចេញឧស្ម័នផ្ទះកញ្ចក់ទៅក្នុងភពផែនដីច្រើនជាគេ។
ដោយឡែកក្នុងថ្ងៃនេះ លោកអូបាម៉ា និងលោកម៉ូឌីថ្លែងរួមគ្នាទៅកាន់ក្រុមអ្នកជំនួញនៅក្នុងវេទិការៀបចំដោយ US-India Business Council។ គួររម្លឹកជូនថា ការដោះដូរពាណិជ្ជកម្មរវាងអាមេរិក និងឥណ្ឌាបានគុណឡើង ៥ដងគិតតំាងពីឆ្នំា ២០០០ ពោលមានទឹកប្រាក់ដល់ទៅ ១០០ ០០០លានដុល្លារក្នុង១ឆ្នំាៗ។ កម្មវត្ថុរបស់អាមេរិក គឺនឹងគុណឡើងចំនួន ៥ដងទៀតនៅឆ្នំាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ